Read Zeme Naga HOSIA 14 Bible Online

HOSIA 14 - Zeme Naga bible

HOSIA 14

¹Hei Israel gau, ning Rapeu Tingwang dage helatwang zu lau, ning gu hemui-helut gene nang kau di daseu.

²Sam ramme ning dage tei’mpam lu, Tingwang dage helatwang zu lau; pe dage pau gai ze, “Hemui-helut leine lutua gai lau; ka’nggia ze anui je lutau gai lau, dezai anui mui ne hatkailube getumsei ramme anui peipat kai gu lei.

³Assiriaram ne anui je tew’nring gai ra mak lei, hekun ramme ching ge anui chua ra mak lei; zai anui batâ ramme je, ‘Anui Rapeu,’ ze acheu dai ta du de lei. Ning dage ’nggiâne ne ngauka’nggiabe ngau lei,” ze acheu lau.

⁴Penui keneibe ran-gabe ze I ne tew’mmi gai gu lei; a lung leine ne penui je I hung gu lei, penui dagene a râtabe sau dai de daseu.

⁵Israel hangge I ne kezikdui gum ze chang gu lei; lilipâ gum ze pa pe pâ papat ku lei, pa â Lebanon gum ze pema ’ntiprip ze bam gu lei;

⁶pepuâk ramme buapat ku lei; pa peluîyibe â olib bang gum gu lei, zai pa perîmyibe ze â Lebanon bang gum gu lei.

⁷Penui helatwang dai ze a kezui kangge ’nseu gu lei, merie gum ze ringchim bam gu lei; grepchî hiâm gum ze penui pa gu, penui rîmyibe ze Lebanon gu wain gum gu lei.

⁸Hei Ephraim, heraluîtewbe ramme zene a hangge ’ndaikau chang ra lau? Ning kuâ kak ze ningchu kereîpeu ze â I de lei, I â ’ndiakri bambe chingkeleu bang gum lei, a dagene ning rachî pat lei.

⁹Kaningchingbe kau â, airamme ze peize ’nningchi le lau; keyi-kesia gepachibe kau â peize chiramme chî le lau; Tingwang gu ’mpuî ramme â peling daseu, zai ka’nzeibe kau â chipau ’mpuî ramme ge tat lei, kane hedieka’ngkabe kau ramme â, chiramme ne ’nrap lu kâu di de lei.