Read Zeme Naga HOSIA 2 Bible Online

HOSIA 2 - Zeme Naga bible

HOSIA 2

¹Chidaze ning puiname je, “Ammi” ze kû zu lau; zai ’mpuimi ramme je, “Ruhama” ze kû zu lau.

²“A name gau ningnui pui je kiâm zu lau, pa a nâu chang ta di, zai I du pe napeu chang ta de leusedu kiâm zu lau, pa kahemabe benai hepum zuateube gene sau de ra pechu kiâm zu lau.

³Maktizai â pechu lungkeube mai ge pa pumlâng bam gum ze bam ra I ne pe paîni kesaktua ’ndu lei. I ne pechu heram kechangbe benai mâ de kaipatlakbe dei gum bam ra tew gai gu lei, zai pa herei ze chai gu lei.

⁴Pe name peireige du I ka’nggiabe bam ra mak lei, penui â ’ngngam mak ze hepumzuateupui name daseu.

⁵Pa ne pe runne pechu, ‘I ka’nraipeu ramme dage I tat ku lei; penui ne a hangge tak benai hedui, mâ-geûpaî benai banutpaî, olib taudui benai wain sak ra pei lei,’ ze kacheu de lei.

⁶Chidaze I ne hetubang ramme ne pechu rienam ’ndu lei, zai pa tatchi lak ra hangge pe gu ’mpuî ge I ne kerie rienam ’ndu lei.

⁷Pa ’nraipeu ramme je pa ’nsamie gu, kane penui je pa ’nsachang ra mak lei; zai penui je pa peu gu, kane penui je peudau ra mak lei, chidezai pa, ‘A napeu keraipeu tailam helatwang dai ra de lei, chuna telung tak sua â chipau ting ge â, a hangge yibi daseu,’ ze acheu gu lei.

⁸Zai Baal hangge pa herâtew ra hangge, chêu, wain, olib taudui, gepût benai gechâk ramme pa ngaube leine I ne pechu peipeu lei be pa chî mak daseu.

⁹Chidaze helugatbe ting ge I ne peibe chêu ramme benai wain ze I ne lu dai ’ndu lei, zai mâ-geû benai banutpaî pa bâ ra hang I ne peibe ze du lutat dai ’ndu lei.

¹⁰Pa ’nraipeu ramme masua gene pe pumrua bam ra pe paîni I ne kesaktua ’ndu lei, zai a gu reziechibe gene mî ne de pechu ’nripatchi dai ra mak lei.

¹¹Pe gu luube-bâm ramme leine, patingkum gu benai hekêu-tenang-ngi ramme zai ’ntakbambe mai reibambe zai pe râsie gu ka’nduibe ramme leine I ne tew’nsau kam ’ndu lei.

¹²Zai pa ne, ‘Airamme ze a hangge a ’nraipeu ramme ne tewdeki ra peibe ramme de lei,’ ze kacheube chi pe gu grepchîria benai ’mbeuchî bang ramme ze I ne tew’nsia kam gai gu lei. Chiramme ze I ne hênam chang ra tew gai gu lei, zai peningkâm gu mârekaune ramme ne chiramme ze teu kam ’ndu lei.

¹³Pa heraluîtewbe ramme je kellum ze mâ-perîmyibe penui hangge ’ntau gai, zai pa du kunchei kaipring gai ze, teluichu yibe ramme kai lu ze, achu ’ngngaî nan ze, pa ’nraipeu ramme je ’nsarua bambe ze pechu I tewsâ himchang gu lei, ze Tingwang ne rang lei.

¹⁴“Chidaze pie le lau, pechu I ’ngngaiwang dai himchang gu lei, zai tingkangram ’mbe nguatat ze, kehungbe sam ramme ne pechu ’mpau ze kiâm’nreiwang dai gu lei.

¹⁵Zai pe gu grepchî merie ramme pechu pei gai dai bu, zai Akor kâm ge kaheguîbe kemuiki chang ra I ne tew gai gu lei. Zai chige pa kahenabe ting ge gum ze achu a samkak ku lei, Ijipram gene pa patbe ting ge gum zeu.

¹⁶“Chipau mai ge nang achu, ‘A napeu’ acheu ze kû gu lei,’ zai ‘A gu Baal,’ acheu ze achu nang kû ta du de lei, ze Tingwang ne kacheu de lei.

¹⁷Pe mui gene Baal luîtewbe ji ramme kû ra I pei dai ra mak lei.

¹⁸Chipau ting dezai â a gu ziemmena je tew’nsia mak ra hangge hekaune ramme dage, ’nruine ramme dage, zai kedei ge liaruabe zat leine dage I ne samria gai gu lei. Zai I ne hetubaimpi benai hiazutkie rîaubet ’ndu zai herei ka’nggibe kerua ramme heram gene lutua ’ndu lei, zai a gu ziemmena lungzeunetew ze kehingbe ga ze lung ra pei gai gu lei.

¹⁹Dezai betingbeta a nâu chang de ra I ne ningchu lu gai gu lei; I kapelingbe gene, zai I hungka’ntipbe gene, zai ngauka’nggiabe gene I ne a nâu hang ningchu lu gai gu lei.

²⁰I ne ningchu a nâu hang lu gai sing gu lei; chidezai I â Tingwang lei be nang chî gu lei.

²¹“Chipau mai wangchang dezai â, a gu Israelme kakellumbe kuâ I kak ku lei.

²²Kedeirei ge tingrui ra I ne tew gai gu, zai kedei gene hemeurachî, zai grepchî ramme, zai olib ramme ’nchikeu gu lei;

²³zai a hangge pechu kedeirei ge I ne ling gai gu lei. Zai ngau’nggia mak kau peireige I ka’nggiabe bam gu lei, zai a gu ziemmena makme je I ne pechu, ‘Nang â a gume lei,’ ze acheu gu lei; chidezai pa ne, ‘Nang â a Rapeu lei,’ acheu gu lei,” ze kacheu de lei.