Read Zeme Naga HOSIA 4 Bible Online

HOSIA 4 - Zeme Naga bible

HOSIA 4

¹Tingwang gu sam ’ngking le lau Hei, Israelme gau; ningnui ram lungge pelingtewbe ga, ka’nggiabe du ga, zai Hera je gechîbe du gabe ziegene aipau ram deiname je Tingwang ne chau’ngkuigaibe lamui lei.

²Penui samhatlube penui ne tewpâng dai, penui karasa sa, kegîbe tâ tew, hegateu, zai kahemabe tâ tew lei. Tâ-kesiabe tew ’ngkiebi-bi, zai kegîbe tâ tewdesua ze bam lei.

³Chidaze chi heram ze desungra ze bam gu, zai chipau heram lungge lungme leine, hekaubena ramme benai ’nruine ramme leine beted’nsî ze bam gu lei; eu lei, sungkling gu hekâ ramme ’nsangdu lutua kam ’ndu lei.

⁴Acheusede mî de peize tingkang se lau, zai miramme je du ’ngngiam se lau; ning gu ziemmename â tingkume je penui tingkang ka’nziebe luî ze de lei.

⁵Chidaze tîngna hî ge nang kâukeu gu, zai tingkupeu du tingmuî ge ning dage nguakau’mpam gu lei; zai I ne ning pui je tew’ngga ’ndu lei.

⁶Mâ-gechîbe gabe ziegene a gu ziemmename je tew’nggarabe wangchang de lei. Mâ-gechîbe je nang ne mâ-hangge ’nning gai mak ze tuâpat’ndibe ziegene I du ningchu tuâpat kai gu lei, chidezai nang a gu tingku chang ta de ra hangge zeu. Ning Rapeu gu hingde nang ne ’ngngaî’ndibe ziegene ning name je I du ’ngngaî ’ndu lei.

⁷Penui riak pungbi-bibe luigum ze a mikngau ge penui hemui gai ’ngkiebi-bi di de lei. Chidaze penui ngeudibe ze ka’ngngambe hangge I ne tew gai gu lei.

⁸A gu ziemmename gu hemui penui ne ’nzuakeu kam ’ndi de lei, zai penui hemui tâ tewbe ge penui lung du hua gai ze bam lei.

⁹Chidaze baudime dage gum ze tingkume peireige du wangchang gu lei, zai penui gu hemui ’mpuî ramme ziegene penui je I tewsâ gu, zai penui tatew peireige I ne tewsâ himchang gu lei.

¹⁰Penui teu gu, kane teu’nggeu ra mak, zai penui lung hailarua ze bam sede heluîhing sua ra mak lei, penui ne achu sâu nan ze kêdabe râ ramme je ’nchâdibe ziegeneu.

¹¹Wain perie benai karchibe ne a gu ziemmena lung ge mâ-gechîbe ngualietat lei.

¹²Hechingdâng dagene a gu ziemmena mâ-ka’mmêt lei, zai penui tui ne penui je penui mâ-chineibe ranglia lei! Lungkahailabe herui ne penui je ngualietat ti, zai kahailabe tâ tew ra hanggene penui Rapeu je sâu gai ’ndi dadegeu.

¹³Peloa’ntûm kehube ramme ge penui herâtew lei, zai kedeiloa ramme ge, ’mpubang, poplar bang, zai terebin bang kang gene penui kela ramme peipat lei, chipau bang kezui ramme yi bei dadegeu. Chipauziegene ningnui na heleume kahailabe tâ tew lei, zai ningnui mupui ramme kahemabe tâ tew lei.

¹⁴Ningnui na heleume kahailabe tâ tew dezai, zai ningnui mupui ramme kahemabe tâ tew dezai du I ne tewsâ ra mak lei; ’mpeumi ramme ’nsangdu penui pum zuateume je puî’mbia tat, zai kellumki ge hepum zuateume je nguaherâtew daseu, zai mâ-gechîbe gabe kau ziemmena â, pe dage tewka’nsiabe wangchang gu lei.

¹⁵Hei Israelme gau, ningnui kahailabe tâ tew sede peize Judame â ka’ngkuibe chang se lau. Gilgal ge gut kai so, zai Beth-aben ge du hang gai se lau, zai “Tingwang ring la daze” acheu ze deseu se lau.

¹⁶Hekuapheumakbe getumsei gum ze Israelram â hekuâ pheukeu lak lei; peningkâm kedibe ge meli je gum ze chunage Tingwang ne penui je guîchi duî semei?

¹⁷Ephraim â heraluîtewbe ramme ge herua gai di de lei, pe sui-suitew ra sâu gai be lau.

¹⁸Hezau kameneume bau â, kahailabe tâ tew ra penui pum peipat kai lei; penui ngeudibe je sua â, ka’ngngambe je penui ka’nchâ lei.

¹⁹Tingkai kechibe ne pe kan lungge penui je ’nzuichim gai ’ndi de lei, zai penui gu herâtewbe-kaira ramme ziegene penui ’ngngam gu lei.