Read Zeme Naga HOSIA 5 Bible Online

HOSIA 5 - Zeme Naga bible

HOSIA 5

¹Aize ’ngking le lau, Hei tingkume gau! ’Ngking ’mmi gai lau, Hei Israel kibaume gau! ’Ngking gai lau, Heguang kiduîme gau! Samrambe ze â ningnui hang de lei; ningnui ne Mizpa ge ’mpia chang, zai Tabor peireige ge chiâk ’nsunggaibe chang di daseu.

²Zai Shittim gu hûmkuiki penui ne rua’nchuk kai bei de lei; kane penui ’nteumena je I ne sâ ze laddei gu lei.

³Ephraim je I chî lei, zai Israelram â a dagene ’mbai mak lei; chunage Hei Ephraim gau, nang kahailabe tâ tew gai ’ndi daseu, Israelram â tewhebâ ’ndi de lei.

⁴Penui Rapeu lam helatwang ra penui tatew ramme ne penui je lun mak te lei. Kahailabe herui ze penui lung ge bam, zai Tingwang je penui chî mak daseu.

⁵Israelram gechîrettewbe pe ju ge teilia lei; pe mâu gene Ephraim â ’nrap lu kau gu lei; Juda du penui benai kau’mpam gu lei.

⁶Tingwang je peu ra hang melidung benai kebuidung je ngua lu penui tat ku, kane pechu penui peudau ra mak lei; penui dagene pa â tat’mbia di de lei.

⁷Lungsangtewmakbe tâ Tingwang dage penui tew gai ’ndi de lei; heluîherane poine ramme penui ne lungkeu gai daseu. Chunage â penui benai penui gu helu je hekêu-tenang ne tew’nsia kam ’ndu de lei.

⁸Gibea ge mâkie ’mmut kai zu lau, zai Rama ge hegeîluîkie ’mmut kai zu lau. Beth-aben ge ’ntîngrabe ’ncheu hû’nrak kai zu lau; Benjamin gau, hingkedun zu lau!

⁹Tewsabe mai ge Ephraim â, gua’mpiezîng’ndibe bâm chang gu lei; ’ndaikau wangchang sing ra mei be Israel zatme ruage I rangba gai lei.

¹⁰Juda ge besuitewme â, heramrai chu puikakelime gum chang di de lei; a lumpumbe ze penui peireige hedui gum ze ruîpat kai gu lei.

¹¹Ephraim je â tewsâ de lei, samrambe gene chaîkeniak kai bei de lei, peruânggabe ge pe lung peigai’ndibe ziegeneu.

¹²Chidaze I â Ephraim hangge pekaukeriepui gum chang, zai Juda kibau hangge tew’nriamgairabe gum ze chang de lei.

¹³Ephraim ne pa ka’nrâbe ngau lu, zai Juda ne pe jâm ngau lu dege, Ephraim ne Assiria ’mbe tat ti de lei, zai heguang kedibepeu dage lang gai de lei. Kane pa ne nang ka’nrâbe tew’mmichi lak, zai ning jâm ze tew’mmichi lak lei.

¹⁴I â Ephraim hangge duilui gum chang gu, zai Juda kibau hangge duiluipoine gum chang gu daseu. I ne chize I sing ne kuipânghakhai gai lu tat tu lei, I ne zutat kû zai mî ne du meupat ra mak lei.

¹⁵Penui kemaube penui ’nningtâu gai ze a ju ngau ra peu, zai penui duânggabe gene achu peu ze,