Read Zeme Naga HOSIA 6 Bible Online

HOSIA 6 - Zeme Naga bible

HOSIA 6

¹“Kei lei, Tingwang dage helatwang zu kei lei; pa ne tewpânghakhai gai bei daze, pa ne anui je tew’mmi gai dai be ra hangge zeu; pa ne tewjâm gai bei de lei, zai pa ne dum gai dai gu lei.

²Hezie kenane chang dezai â, pa ne anui je tew’nrak kai dai gu lei; pakechumbe mai ge pa ne anui je zuchu gai gu lei, pe masuage anui bamchi le ra hangge zeu.

³Mâ-gechîbe bam zu kei lei; Tingwang je chî le ra rankai zu kei lei; pa zuapatbe ze â, hechua tingbapat singrabe gum lei; tingsim kedibe gum kepuakting ge kedei ge tingruigaibe gum anui dage pa wang gu lei,” ze acheu mak tâne I bambe bâm ’mbe I â helatwang du lei.

⁴Hei Ephraim gau, ning dage ’ndaikau tew gai ra se lau? Hei Juda gau, ning dage I ’ndaikau tew gai ra se lau? Ning gu kehungbe â hechua gu muangziu gum, zai gagaikeluadibe kezik gum lei.

⁵Chipauziegene kemeume je lang gai ze I ne penui je ’mpattua ’ndi de lei. A mui sam ramme gene penui je I ne gîchat ’ndi de lei, zai a gu sam ramme ze kebabe gum ze zuapat te lei.

⁶Herâtewbe mak ze, hungka’ntipbe I lunei, zai kerube-râtewbe ramme je suadu Hera je gechîbe ze I lunei daseu.

⁷Kane Adambe gene samhatkaibe penui hede’ngka di de lei; chige a dage penui lungsang tâ tew gai mak te lei.

⁸Gilead â tâ-kesiabe tewme gu namdi, zai hejai ne kutgie bambe namdi lei.

⁹Hegasut-teume ne ziemmena je lîmkua ze bambe gum ze, tingkume pebaulia lu ze bam lei; Shekem ’mpuî ge penui kegîbe tâ tew lei. Eu lei, katîmphibe tâ penui tew lei.

¹⁰Israel kibau lungge mi kehingbe I ngau lu de lei; chige Ephraim gu kahailabe tâ tewbe la lei, Israel je tewhebâ gai ’ndi de lei.

¹¹Hei Juda, ning hangge du gatrabe mai hang ria gai ’nde lei. A gu ziemmena hangge betingyibe I teiwang gai dai ra ’nning gai dege,