Read Zeme Naga HOSIA 7 Bible Online

HOSIA 7 - Zeme Naga bible

HOSIA 7

¹Israelram je I ne tew’mmi gai ra ’nning gai dege, Ephraim peling tewmakbe ngau di de lei; zai Samaria gu tâ-kesiabe tewbe ramme teilia lei, penui â karasa tew, mâ-kahegame ne riput gut, zai hela ge hegasut-teume ne kedungrua daseu.

²Kane penui tâ-kesiabe tewbe ramme leine ze, I ’nningdau lamui lei be penui ’nning gai mak lei. Chunage penui tatew ramme ne penui je guâgit ze la lei, chiramme ze a mikngau ge bam bam lei.

³Penui lungriaksiabe gene heguang pe suiyi’nta ra, zai penui choâsiabe gene heguangsinme je du chigum ze penui ne tew gai lei.

⁴Penui ’nteumena kahemame kam lei; penui â dekuî kakeneibe luagene chu ze chize chu mak tâne tingku langpeu ne hemi kedia gai ta di lumbup bambe hemang gum lei.

⁵Anui gu heguang gu naimikpui ge â, heguangsinme â wain sak-meneulube-cheu gene ’nrâhei ze bam lei; pa â kika’nnuime dage pe ba nguagetuapat kai lei.

⁶Mâ-’ngkim kaladdeibe gene penui lung â hemang gum ze tau bam lei; kemuîbe ting tâluî penui lumpumbe heigie bam lei, hechua dege â chize hemi-melei gum ze tauben bam di de lei.

⁷Penui ’nteumena ze hemang gum ze teusie ze bam lei, zai penui gu samramme je penui ne tewka’ngga lei, penui gu heguang ramme kâukeu kam di de lei; zai penui ruage mî de achu kû mak lei.

⁸Ephraim â, ziemmena kêdabe zat ramme je nguakakebut lei; Ephraim â kuakkedetkaimakbe tingkukuak te lei.

⁹Hesangme zat ne pechu peran tewka’ngga lei, zai pa â chize chî mak lei; hetampûbe ramme pe peî ge ’nruk kai bei de lei, zai pa â chize chî mak lei.

¹⁰Israelram kahegiêbe ne pechu chau’ngkui gai de lei; sede Tingwang penui Rapeu dage penui helatwang mak lei, airamme deu hanggene pechu peu du peu mak lei.

¹¹Ephraim â peruânggabe, zai mâ ’nningchibe gabe temaune gum lei, Ijip je kû zai Assiria ’mbe tat lei.

¹²Penui tat dezai penui peireige a gu chîak I ne ’nsung gai gu lei; Tingkai ge liamruabe ’nruine ramme je gum ze I ne penui je teikeu ’ndu lei; Kesiabe tâ ramme penui tewbe ziegene penui je I ne tewsâ gu lei.

¹³Penui duângga gu lei, a dagene penui tatlie di daseu! Penui dage tewka’nsiabe wang gu lei, achu penui ne tingkang bei daseu! Penui je I ripat kai be nei lei, kane a peireige penui karasa sa lei.

¹⁴Penui lung sing gene achu penui kû mak lei, kane penui jeî gene penui desui ze bam lei; chêu benai wain hanggene penui runne penui je tewjâm gai, zai achu penui katingkang daseu.

¹⁵I ne penui je teihebîn ze penui baran tew’nchi gai bei sede, a peireige kesiabe tâ tew gai ra penui chiam bam lei.

¹⁶Baal lam penui lung ’nrei gai lei; penui â pe choâsiabe bai’mpi gum lei, gechîrettewbe leiria ziegene penui gu heguangsinme â hiazutkie gene kau gu lei. Ijipram dei lungge aize penui je teihenuitewbe chang gu lei.