Read Zeme Naga HOSIA 8 Bible Online

HOSIA 8 - Zeme Naga bible

HOSIA 8

¹Ning mui ge hegeîluîkie chua gai zu lau, lawai â Tingwang kibaume peireige la daseu, penui ne a gu samhatkaibe tewpâng, zai a gu hingde ’ngkadibe ziegeneu.

²Penui ne a dage ’nrung ze, A Rapeu gau, anui Israelme â, ningchu chî lei, ze kacheu de lei.

³Israelbe â mâ-keyibe ze tuâpat ’ndi de lei; heteureime ne pechu gua’nchu gu lei.

⁴Heguang ramme hangge penui ne sum gai lei, kane a dagene mak lei, heguangsinme je penui ne sum gai lei, kane achu chiliâ gai mak ze chize tew gai lei, penui je tew’nsiagairabe hangge penui gu gepût benai gechâk ne heraluîtewbe ramme penui tew gai lei.

⁵Hei, Samaria gau, ning gu getumseipoine luî tewbe I ne tuâpat kai ’nde lei. Penui peireige a lumpum de lei, Israelram ze chiramme gene ’nchichiak de ra ’ndaidaune ra se lau?

⁶Hechiâm tâ tewchime ne chize Israelram ge tewgaibe kau lei; chize â Hera mak lei. Samaria gu getumseipoine je â, tewpângdesuirui gai gu lei.

⁷Penui ne tingkai ling gai daze penui natri gat ku lei, hemeu bang sapbe ze pebuî ’mbuî mak lei, hetak hangge perachî ngau ra mak lei; perachî ’nchi lêuzai du hesangme ne chize teu kam ’ndu lei.

⁸Israel je â ’nzuakeu ’ndi de lei; heramzatme ruage penui â betâugabe li gum lei.

⁹Hênam gu hekunmerângne pe runne kezitruabe kau gum ze Assiriaram ’mbe penui hang di daseu; Ephraim â pa merai ramme je kûwang gai de lei.

¹⁰Heramzatme ruage penui je nguakahezuâme je penui puîwang sede, penui je I ne teiheruawang gai kelua gu lei. Zai heguang benai heguangsinme penui kakelângbe ting kat â, penui sau gai du lei.

¹¹Hemui tâ tewrabe hangge herâtewbe-kaira ramme Ephraimme ne tewpung gai daze, pe hangge â chiramme ze hemuitewrabe hangge herâtewbe-kaira chang di de lei.

¹²A gu hingde chang kereu pe hangge I raw gai bei lêuzai du chiramme ze penui ne mâdau chimakbe hangge chak kai ’ndu lei.

¹³Herâtewbe ze penui ka’nchâ lei; hemei ne penui herâtew ze chize penui teu lei; kane chiramme ge Tingwang ne pe suiyibe ga lei. Chunage pa ne penui gu hemui-helut ramme chî bam gu, zai penui gu hemui ramme ziegene tewsâ gu lei; Ijipram ’mbe penui helatwang dai gu lei.

¹⁴Israel ne pechu ka’ndampeu je ’ngngaî nan ze heguangki ramme tew gai daseu; zai Juda ne rieguabe namdi ramme tewpung gai de lei; kane pe gu namdi ramme peireige I ne hemi lang gai gu lei, zai chize ne pe gu keriengdi ramme rû kam ’ndu lei.