Read Zeme Naga HOSIA 9 Bible Online

HOSIA 9 - Zeme Naga bible

HOSIA 9

¹Hei Israel! Ning suiyi’nta se lau. Miramme zat gum ’nsumchai ze bam se lau; ning Rapeu je nang sâu ze kahemabe tâ nang tew gai ’ndi daseu. Kechaîpung leine ge hepum zuateube mî ze nang â ’nchâ di de lei.

²Kechaîpung benai grepchî zau gu gepup zene penui je kei ra mak, zai penui hangge wain karchibe ngau dai ra mak lei.

³Tingwang gu heram ge penui bam bam ra mak lei; kane Ephraim â Ijip ’mbe helatwang gu lei, zai Assiriaram ge ’nchimakbe hetak ze penui teu gu lei.

⁴Tingwang hangge penui wain ruîkeu gai ra mak lei; zai penui herâtewbe ramme zene pe suitew’mmi ra mak lei. Penui gu tingku ze â, kechai kadesuime gu kuaktak gum chang gu lei; chize teugaime leine je â tewhebâ gai ’ndu de lei; penui gu tingku ze â penui ka’njeibe hang runne daseu; chize Tingwang ki ge chang ra mak lei.

⁵Riagai’ndibe hengi mai ge, zai Tingwang gu luube mai ge nang ’ndaikau tew ra lau?

⁶Pie le lau, penui â Assiria ’mbe tat ku daseu; Ijip ne penui je gekumherua kam gai gu, Memphis ne penui je heraw ge bai gai gu lei. ’Mbubang ramme ne penui gu gepûtgeî gu pemîhungbe merua ramme lu ’ndu lei; penui gu paîki ramme ge hetubang ramme ’nnia bam gu lei.

⁷Tewsabe naimikpui ramme wangchang de lei, peiruibe (hekûmtewbe) naimikpui ramme wangchang de lei; chize Israelme chî gu lei. Ningnui gu hemui-helut benai ngaugailakbe (ka’nriebe) kedibe ziegene kemeu’mpeu ze â pe suî-pangpeu chang, zai herui gu ziemmena â kemiepeu chang de lei.

⁸Kemeu’mpeu ze â a Rapeu gu ziemmena, Ephraim gu hekêtkaipeu de lei, sede pe gu ’mpuî ramme leine ge ’mpia tewpeu gu ’mpia â lamui lei, zai pe Rapeu kilûng ge ngaugailakbe lamui lei.

⁹Gibeabe ting ge gum ze kesiabe ’mpuî ge penui runne penui je nguagut’nchuk kai ’ndi de lei: penui gu hemui-helut ze pa ne chî ze bam gu lei, penui gu hemui ramme ziegene penui je pa ne tewsâ gu lei.

¹⁰Tingkangram ge grepchî ramme bambe luigum ze Israelme je I ne ngaudau lei. ’Nchikeuraîlangbe nehî ge ’mbeuchîbang ge perachî raîlangbe je gum ze I ne ningnui paume ramme je ngaudau de lei. Kane penui Baal-peor ge wang ze Baal dage penui pum peipat kai ’ndi de lei, zai penui ne ka’nchâbe merua gum ze penui ze du mi ngaukatenetbe chang di de lei.

¹¹’Nruine gum ze Ephraim ngeudibe ze liamtat tu lei— lungkeube ga, ka’mpungbe ga, hena ka’ngkaube ga zeu!

¹²Penui ne hena ’ngkutchu lêuzai du ga’nzâu mak tâne I ne penui keringbe lutat kam ’ndu lei. Penui dage I rimna gai dezai penui duângga-desang gu de lei!

¹³Ephraim name â I ne ngaugai’ndibe luigum ze, nîmteu’nderabe heteu hangge teleu’ntua gai ’ndi de lei; gîchat ra hangge Ephraim ne pe na ’mpeumi ramme je nguapat himchang gu lei.

¹⁴Hei Tingwang, penui je pei be lau— ’ndaikau nang pei ra lau? Henakeube nebâm benai hetung gechangbe ramme penui je pei be lau.

¹⁵Penui kesiabe tâ tewgaibe leine ze â Gilgal ge la lei; chigene penui je I ngau’nneîchu de lei. Penui tâtewbe ramme kesiabe ziegene penui je a ki gene kumtua ’ndu lei. Penui je I hung dai ra mak lei; penui gu heguangsinme leine ze â, achu ka’nggime kam de lei.

¹⁶Ephraim je â lak’nsia ’nde lei, penui gu pema changku la de lei, penui â perachî ’nchikeu dai ra mak te lei. Penui rachî ’nchikeu lêuzai du, penui hungbe name je gî ’ndu lei.

¹⁷Penui je â a Rapeu ne tuâpat kai ’ndu de lei, penui ne pe kuâpheumakbe ziegeneu; heramzatme ruage penui â kezitruame chang gu lei.