Read Zeme Naga JOEL 3 Bible Online

JOEL 3 - Zeme Naga bible

JOEL 3

¹“Zai pie le lau, chipau tingnaimikpui ramme ge zai panehîtitbe ge Judaram benai Jerusalem ze lungyi ze bam ra I tei’nsapchu gai dai dezai,

²heramzat ramme leine je I ne nguawangherua gai lu ze Jehoshaphat kâm ’mbe penui je nguakeu gai gu lei, zai chige I ne penui je samram gu lei, a gu ziemmena ziegene benai I ne kelânglube Israelme hang ziegene aize I tew gu lei, penui ne heramzatme ramme ruage a gume je hûtimrarip kai bei, zai a gu heram ze penui ne ’nzipâng kam gai bei,

³zai a gu ziemmena peireige hedachak ze, zai rehang’mpoine je hepumzuateube hangge ’ngngiak kai, zai wain mî hang heleu’mpoine je zua zai chize penui sakbe ziegeneu.

⁴“Hei Tira benai Sidon zai Philistiaram leine gau, a hangge ningnui ’ndaikau lau? Ningnui ne achu mâ-deu hanggene hekûm lu ra se mei? Ningnui ne peiruî ra zai â ningnui peiruibe ramme keluakkelet ze ningnui peireige I ne tew gai dai gu lei.

⁵Ningnui ne a gu gepût benai gechâk teitat ti, zai a heu kelakyibe ramme leine ningnui gu kellumki ramme ge gekua gai kam ’ndi daseu.

⁶Ningnui ne Juda benai Jerusalem je Grikme dage zua gai ze penui ramrai gene kedeu ’mbe tei’mbiatua kam ’ndi de lei.

⁷Kane chunage â ningnui ne penui je zuatuagai’ndibe bâm ramme gene penui zuapat dai de ra I ne penui je tei’nsapchu gai dai gu lei, zai ningnui tatew ramme leine ningnui peireige wang dai kam ra I ne tew gai gu lei.

⁸Juda name ba ge ningnui name rehangme benai heleume je I ne zua gai gu lei, zai penui ne ningnui name je Sabeanme heram kedeu ’mbe bambe zat dage zua gai gu lei; Tingwang ne rang gai ’ndi daseu,” ze kacheu de lei.

⁹Aize pezat leine dage rangba gai lau: Herei ra kedâ zu lau, heteureipeu ramme je gecheu’nrak kai zu lau. Hereikangme leine je peize wangherua zu lau, peize penui zuachu zu lau.

¹⁰Ningnui gu heningpube gepeu ramme ze hiazutkie ramme hangge heki le lau, zai hingbangkeî ngetbe hekie ramme ne hengeu ramme hang heki le lau; peran-gabe kau ne du peize, “I â kahereibe kau lei,” ze acheu lau.

¹¹Wang kelua zu lau, pehiage lungguâ ze bambe zat leine gau, chige ningnui wang’ndui lau, ning gu herei gu ziemmena ramme je nguawang zu lau, Hei Tingwang gau.

¹²Heramzat ramme ne peize zuachu kam zu lau, zai Jehoshaphat kâm ge peize zuawang gai zu lau; chige heram hiage lungguâ ze bambe zat ramme leine je samram ra I ’ntau gai gu daseu.

¹³Penui sia-kadesang dadege helugatbe gum ze penui je gatkau kam ne zu lau; bekuiki pui mak tâne grepchî niakbe kuiki gene grepchî niak gum ze penui je chaîkeniak zu lau.

¹⁴Baudime ne baudime, Samrambe kâm, kacheube ge la de lei! samrambe kâm kacheube ge, Tingwang gu naimikpui nadibe ziegeneu.

¹⁵Naimik benai hekêu muî de da, zai hegi ramme penui ’mbi pei ta di de lei.

¹⁶Zai Zaion gene Tingwang pe kuâ ka’mbeu lei, zai Jerusalem gene pe kuâ ’nrapat lei, zai tingkehube ramme benai kedei ze kagechui lei. Kane Tingwang â, pe gu ziemmename hangge Ka’nseube bâm lei, zai Israelme hangge keriengdi lei.

¹⁷“Chidezai a gu ka’nchibe deiloa Zaion ge bambepeu, I â Tingwang ningnui Rapeu lei be ningnui ne chî gu lei. Dezai Jerusalem ze ka’nchibe chang gu lei, zai mâdau de chize hesangme heluîchimakme ne tatpelatat dai ra mak lei.

¹⁸“Chipau mai ge kedeiloa ramme ge grepchî dui gekumbe ’nrimchun bam gu, peloa ramme gene tungdui lua gu, zai Judaram geukâm leine ge hedui luahuai bam gu lei; zai Tingwang ki gene hedui-duitering puakpat ze, Shittim kâm ze zuâ’nnimsim gai gu lei.

¹⁹“Judaram name je penui ne ’nggi ze penui lungbe dei ge pemâugame gu hejai tewpatkai’ndibe ziegene Ijipram â sâuzînggai’ndibe heram chang gu, zai Edomram â tingkangram zîngbe chang gu lei.

²⁰Kane Judaram â betingbeta lungpuigit bam gu, zai Jerusalem â rehei leine ge bam bam gu lei.

²¹I ne penui jai pâu ruî gu lei, zai tâ-kesiabe tewme je I ’nsak kai ra mak lei, Tingwang â Zaion ge bam daseu.”