Read Zeme Naga AMOS 1 Bible Online

AMOS 1 - Zeme Naga bible

AMOS 1

¹Judaram heguang Uzziabe benai Israelram heguang, Joasbe na Jeroboambe ting ge keteika’nchibe wangrabe kum, kum na suage Tekoa keloa gu melireîme ruage hangkat Amosbe ne Israelme peireige mâ-mâ wangrabe ngaulube gu sam ramme ze aigum bam lei.

²Zai pa ne acheu sa ze: “Zaion gene Tingwang ne pe kuâ ’nrahim la lei, zai Jerusalem gene pe kuâ sapat la lei; melireîme gu timpeizeu ramme puîhap te lei, zai Karmel loa’ntûm ze huikeu de lei,” ze kacheu de lei.

³Tingwang ne aigum ze salia de lei: “Damaska gu hede ka’ngkabe ramme kechum medai bamdibe ziegene tewsabe daurabe ze I tew’ntau ra mak lei; Gilead je chêu niakbe hegeî ne penui ne niakkai’ndibe ziegeneu.

⁴Chidaze Hazael ki peireige hemi I lang gai gu lei, zai chize ne Ben-hadadbe gu keriengdi ramme ze rûmut ’ndu lei.

⁵Damaska gu kerie ’ngkamcha ze I ne tewbet ’ndu lei, zai Aven kâm ge kelungme je tew’ngga ’ndu lei, zai Beth-eden gene langsiutui teipeu je tew’ngga ’ndu lei; zai Siriaram gu ziemmena ramme je Kirram ge kebang hang nîmtat tu lei,” acheu zeu.

⁶Tingwang ne acheu ze sa lei: “Gaza gu hede ka’ngkabe kechum medai bamdibe ziegene tewsabe daurabe ze I tew’ntau ra mak lei; penui ne hezat kat gu ziemmena gechu je Edom dage peipat kai ra penui je nîmtattibe ziegeneu.

⁷Chidaze Gaza gu kerie peireige I ne hemi lang gai gu lei, zai chize ne pe gu keriengdi ramme ze rû kam ’ndu lei.

⁸Ashdod ge bamme benai Ashkelon gene langsiutui teipeu je I ne tew’ngga ’ndu lei; Ekron peireige a ba huachu gai gu lei; zai Philistinme ruage ’nsakpatme ga gai kam gu lei,” ze Tingwang Hera ne kacheu de lei.

⁹Tingwang ne acheu ze sa lei: “Tira gu hede ka’ngkabe kechum medai bamdibe ziegene tewsabe daurabe ze I tew’ntau ra mak lei; penui ne hezat kat gu ziemmena gechu je Edom dage kebang hang peipat kai bei, zai kat-kat dage puinakattewbe gu samhatkaibe ze penui ne chibam mak taibe ziegeneu.

¹⁰Chidaze Tira gu kerie peireige hemi I ne lang gai gu lei, zai chize ne pe gu keriengdi ramme ze rû kam ’ndu lei,” ze acheu zeu.

¹¹Tingwang ne acheu ze sa lei: “Edom gu hede ka’ngkabe kechum medai bamdibe ziegene tewsabe daurabe ze I tew’ntau ra mak lei; pe sikina je hiazutkie tei lu gua’nsa, zai mâ-ka’nzaîbe gabe ziegeneu, zai pe lumpumbe ’mbumpat’nsui ze bam, zai pe râtabe ze betingbeta bambambeibe ziegeneu,” ze acheu zeu.

¹²Chidaze Teman peireige hemi I lang gai gu lei, zai chize ne Bozra namdi gu keriengdi ramme ze rû kam ’ndu lei.

¹³Tingwang ne acheu ze sa lei: “Ammon name gu hedieka’ngkabe kechum medai bamdibe ziegene tewsabe daurabe ze I tew’ntau ra mak lei; penui gu heramrai ze tew’ndirabe hang ziegene Gilead ge ka’mpungme bungpui gechapri’ndibe ziegeneu.

¹⁴Chigum ze Rabba namdi kerie riebe ge hemi I ne ’ntau gai gu lei, zai chize ne pe gu keriengdi ramme ze tau’nsia kam ’ndu lei, kahereibe mai ge ka’nrungbe kuâ gum, zai natri guibe mai ge tingkai kechibe gumbe geneu;

¹⁵zai penui gu heguang benai pe gu heguangsinme je kebang hang luakatne nîmtat’nsam gu lei,” ze Tingwang ne kacheu de lei.