Read Zeme Naga AMOS 2 Bible Online

AMOS 2 - Zeme Naga bible

AMOS 2

¹Tingwang ne acheu ze sa lei: “Moab gu hedieka’ngkabe ramme kechum medai bamdibe ziegene tewsabe daurabe ze I tew’ntau ra mak lei; pa ne Edom gu heguang ra ramme ze ’nnei gum ze rû-patkai’ndibe ziegeneu.

²Chidaze Moab peireige hemi I lang gai gu lei, zai chize ne Kerioth gu keriengdi ramme rû’ngga kam gai gu lei, zai Moab â ’nchuanuabe ’ncheu gene ka’nrungbe kuâ benai hegeîluîkie kuâ ne chai gu lei;

³chipau ruagene samrampeu je I ne tew’ngga ’ndu lei, zai chige Heguangsin me leine je du I ne pe dage tew’ngga’mpam gai ’ndu lei,” ze Tingwang ne kacheu de lei.

⁴Tingwang ne acheu ze sa gai lei: “Juda gu hedieka’ngkabe ramme kechum medai bamdibe ziegene tewsabe daurabe I tew’ntau ra mak lei; Tingwang gu hingde ze penui ne tuâ nan ze, pe gu rawdiakkaibe-hingde ramme penui ne rei mak, kane penui peume ne tewbe gum ze penui karasa sam ramme sabe zene penui je nguakezittatkaidibe ziegeneu.

⁵Chidaze Juda peireige hemi I lang gai gu lei, zai chize ne Jerusalem gu keriengdi ramme ze rûkam ’ndu lei,” ze acheu zeu.

⁶Tingwang ne acheu ze sa lei: “Israel gu hedieka’ngkabe ramme kechum medai bamdibe ziegene tewsabe daurabe ze I tew’ntau ra mak lei; penui ne ziemmena kapelingme je gepût mî hangge zua ze kegame je pîchûp pechin kat hangge zuabe ziegeneu—

⁷kelaksiame peî ze kedei ge chaîkeniak kai, zai kategabe lieme je ’mpuî’ntai ’mbe ngeituagaime bau zeu; pe na benai pe peu heleu’mpui hangkat dage tat lei, a ji ka’nchibe ze tewhebâ ra hangge zeu;

⁸herâtewbe bâm leine hiage ’nchunggaileube paî ramme peireige penui jeirua lei; zai penui Rapeu ki ge miramme ne ’nzuagaibe wain ze penui sak lei.

⁹“Acheuleusede penui masua gene Amorme zat je I ne tew’ngga kam gai de lei, penui kaurayibe ze kedarching bang gum hu ze bam, zai ’mpubang gum ze penui ranchi ze bamme bau zeu; ’nrei ’mbe pe gu perachî bambe benai ’ngkang ’mbe pemahiambe ze I ne tew’ngga kam ’ndi lei.

¹⁰Ijipram gene du ningnui je I ne nguapat kai lei, zai hênam ge kum hedai riâ ningnui je I ne nguatat lei, Amorme gu heram ze ningnui ne ’nram le ra hangge zeu.

¹¹Zai ningnui na ’mpeumi hanggesame je kemeume chang ra, zai ningnui gu rehangme hanggesame je Nazir kau ramme chang ra I ne teichu gai bei de lei. Hei Israel gau, chize gesang mak se mei?” ze Tingwang ne kacheu de lei.

¹²“Kane Nazir kau ramme je wain sak ra ningnui ne tew gai bei, zai kemeume je, ‘Kemeu sam ningnui pau ra mak lei,’ acheu ze ningnui ne samdie gai lei.

¹³“Pie le lau, getumtimriang ge mekum ne kua’mpum bambe himkeu di gum ze, ningnui je du I ne ningnui bambe bâm ge nîmgesip kai gu lei.

¹⁴’Ngngaine (’nruipoine) dagene liamchibe tak ze ga gai du lei, zai peranchibe kau du peranchibe ze pe dage bam ta gu lei, zai reziechibe kau ze du pe pum keringbe ze tew’nringchi lak ku lei;

¹⁵bai’mpi teipeu ze sap ra mak lei, zai pe pî ne pakchipeu ze pe runne pechu tew’nring ra mak lei, zai hekunchingchuapeu ze du pe pum keringbe ze tew’nring ra mak lei;

¹⁶zai peranchime ruage pelungchipeu du chipau mai ge â pumlâng paktat tu lei,” ze Tingwang ne kacheu de lei.