Read Zeme Naga AMOS 4 Bible Online

AMOS 4 - Zeme Naga bible

AMOS 4

¹“Ningnui Bashan gu getumpui ramme, Samaria deiloa ge bamme, kelaksiame je kagetedme, kegame je tewka’nsiame, penui napeu ramme je, ‘Anui sak kai ra teiwang lau!’ kacheume bau gau, aipau sam ze seu le lau.

²Tingwang Hera ne pa ka’nchibe ne deseu gai ze, pie le lau, ningnui dage tingnaimikpui ramme wangchang mie de lei, chidezai penui ne ningnui je hegeî-kaguak ne guaktat ra, ningnui ruage hekaplang kau ’nsang je du kakuai ne guak lu ze teitatrabe ting zeu.

³Zai mâ-kakki ramme gene ningnui tatpelatat ku lei, ’nteumena penui sua luî ’nzeitun ze tat ku lei; zai Harmon ge ningnui je tuâpat kam gai bu lei,” ze Tingwang ne kacheu de lei.

⁴“Bethel ge wang lau, zai chige hedieka’ngkabe tâ tew gai be lau; Gilgal ge wang lau, zai hede ka’ngkabe tâ tewpung gai be lau; hechua ’nsangne ningnui gu herâtewbe ramme teiwang gai lau, ningnui gu kereu ge kat ze hezie pakechumbe mai ’nsangne ge teiwang gai lau;

⁵’nduihîkailube zene ningnui gu misuiyibe herâtewbe peipat kai lau, zai ningnui gu misuiyibe-hâ ramme pei ra hang pauliâ gai be lau; Hei Israelname gau, chigum tew ra ningnui â ka’nchâ daseu!” ze Tingwang Hera ne rang lei.

⁶“Ningnui gu namdi ramme leine ge ningnui geu ramme ’nchichiak ze bam ra ningnui je I pei gai de lei, zai ningnui bâm ramme leine ge hetak riâ ze bam ra pei gai de lei, acheuleusedu a lam ningnui helatwang mak tai de lei,” ze Tingwang ne kacheu de lei.

⁷“Zai hechitchîrabe kêu chum suage tingrui mak ra du I ne ningnui hang tew gai bei de lei; namdi kat peireige tingrui ra I ne lang gai lei, zai namdi kêdabe ge tingrui ra I ne lang gai mak lei; helu kat ge tingrui gai bei de lei, zai tingruigaimakbe helu ze â kîkeruî gai di de lei;

⁸chigum ze namdi kena kechum ne namdi kat ge hedui sak kai ra zuamiepang bam de lei, zai penui hedui kahereibe ze meugaichi lak ze bam lei; acheuleusede a lam ge ningnui helatwang mak tai de lei,” ze Tingwang ne kacheu de lei.

⁹“Kezai benai rehâm ne ningnui je I tewhereu gai de lei; ningnui gu merie benai grepchî merie ramme ze I ne tew’nsia gai de lei; ningnui gu ’mbeuchîbang ramme benai ningnui gu olib bang ramme hekûm-tîngkau ne tew’nsia ra tew gai bei de lei; acheusedu a lam ningnui helatwang mak tai de lei,” ze Tingwang ne kacheu de lei.

¹⁰“Ijipram ge gum ze ningnui ruage herarît I ne lang gai de lei; ningnui gu rehangme je hiazutkie ne I ne bichat kai de lei; ningnui gu hekun ramme I ne teitat ’ndi de lei; zai ningnui gu tejeîki gu perîmsiabe ze ningnui nêuki ge ’nchui gai bei de lei; acheusedu a lam ningnui helatwang mak tai de lei,” ze Tingwang ne kacheu de lei.

¹¹“Hera ne Sodom benai Gomorra je tuâkeugaibe mai gum ze, ningnui ruage hanggesame je I ne tuâkeu gai de lei, zai hemi taube gene mesumpui tukpat’ndibe gum ze ningnui bam de lei; acheuleusede a lam ningnui helatwang mak tai de lei,” ze Tingwang ne kacheu de lei.

¹²“Chipauziegene Hei Israel gau, ning peireige chigum ze I tew gai gu de lei; aize ningnui peireige tew gai ra changbe ziegene Hei Israel gau, ning Rapeu je hedau ra kedâkua zu lau!”

¹³Pie le lau ni, peloa ramme ’ndamgaipeu zai tingkai teugaipeu, zai pe lung ka’nningbe tak ziemmename suage rangka’nsuipeu zeu; hechua ze kemuîbe chang ra tewgaipeu, zai kedei ge peloa hube ramme ge kutruapeu— Tingwang, baudime gu Hera ze pe ji de lei!