Read Zeme Naga AMOS 5 Bible Online

AMOS 5 - Zeme Naga bible

AMOS 5

¹Hei Israelbe kiduîme gau, ai ningnui peireige puîhapbe leu I tewgaibeibe sam ze seu le lau:

²“Chu dai ta de ra leusangka’nchipui Israel ze kâu di de lei; mî ne de pechu teichu gai ra ga ze put kai ’nde lei,” kacheube zeu.

³Tingwang Hera ne acheu ze sa daseu: “Israelbe kiduîme hangge ziemmena chang kat ne herei ra tatpatbe namdi ze ziemmena haî kat runne ’nsakpat ku lei, zai ziemmena haî kat ne herei ra zuapatbe namdi ze ziemmena hangkereu runne ’nsakpat ku lei,” ze acheu zeu.

⁴Israel kiduîme dage Tingwang ne acheu ze sa gai daseu: “Achu peu lu ze ring le lau;

⁵kane Bethel je peu se lau, zai Gilgal ge zuagut se lau, zai Beer-sheba tatka se lau; Gilgal ze â kebangtewberam ge tathimchang gu daseu, zai Bethel ze du matâu hang ga dai du lei,” ze acheu zeu.

⁶Tingwang je peu lu ring le lau, acheu makchai â hemi gum ze pa ne pat ze Josep ki tew’ngga gai gu lei, zai Bethel ze mî ne ’ncha’mmit kai ra ga ze tau kam gai gu de lei,

⁷Hei, ningnui samram ka’nzeibe je keza karîbe hang tewgaime, zai kapelingbe ze kedei ge tuâkeugaime gau!

⁸Hegi ramme, Pleiades (hegi dung sena) benai Orion (hegi dung haî kat) tewgaipeu, zai muî’ntiprip bambe ze hechua chang ra tewgaipeu, zai ’nrîmbeting je tingmuî hang tewgaipeu, sungkling ge hedui bam ra kûgaipeu, zai chiramme kedeirei ge ruîkeu ra tewgaipeu, Tingwang ze pe ji de lei,

⁹peranchibe zat peireige tewka’nggabe luakatne wangchang ra tewgaipeu, chidezai keriengdi peireige tewka’nggabe wangchangrabe hangge zeu.

¹⁰Keriekemuiki ge miramme je kiâchipeu je penui ngaugailak lei, zai samsang sapeu je penui ngauka’nrie lei.

¹¹Chidadege kelaksiabe kau je ningnui kutgetie ze pe dagene chêu ’nchi-chine ’mpuâ hang lube ziegene, tingchu gialube ne tewbe heki ramme ningnui tew gai de lei, kane chipau ki ramme ge ningnui bam ra mak lei; grepchî merie ngauyibe ramme ningnui ne tau gai de lei, kane chigene wain ningnui sak ra mak lei.

¹²Ningnui gu hedieka’ngkabe zat ramme ’ndaizeu bambe, zai ningnui gu hemui ’ndaizeu bambe, kapelingbe kau je ningnui tewkahereume, ningnui henim luteume, zai kegame je keriekemuiki gene ngeituame, ningnui je I chî lei.

¹³Chidaze ziemmena gesutchibe kau â, aigumbe hî ge pe kuâneu mak ze bam gu lei; aipau hî ze â beting kesiabe hî di daseu.

¹⁴Keyibe peu lau, zai kesiabe peu se lau, dezai ningnui ring le ra hangge zeu; chidezai Tingwang, baudime Rapeu ningnui dage bam gu lei, ningnui ne sabe gum zeu.

¹⁵Kesiabe je ngaugailak lau, zai keyibe je ’nchâ lau, zai keriekemui ge mâ-ka’nzeibe tâ tew lau; chi acheu dezai Tingwang, baudime Rapeu ne Josep kiria gene ’nsakpatme je ngau’nggia gai lêu gu lei.

¹⁶Chipauziegene Tingwang, baudime Rapeu, Heguang ne acheu ze rang lei: “Keloaning leine ge hapka’nrungbe bam gu lei; zai puidi leine ge penui ne ‘’Nzehêu! ’nzehêu!’ ze acheu gu lei. Helu tâ tewme je desuigaihâ ra penui kû gu lei, zai puîhapbe tak chiamchime je hapkaihâ ra kû gu lei,

¹⁷zai grepchî merie leine ge hapka’nrungbe bam gu lei, ning dage I ne tatpelapat kû daseu,” ze Tingwang ne kacheu de lei.

¹⁸Ningnui Tingwang gu tingnaimikpui wangchang ra luneime ningnui duângga gu lei! ’Ndaitew Tingwang gu tingnaimikpui wangchang ra ningnui lunei lau? Chize â kemuîbe de lei, zai kebabe mak te lei;

¹⁹chize â mige duilui dagene paktibe riâ de lei, zai hegum ne pechu hedaulube riâ de lei; makchai du pe ki lam tat lu, ’mbie ge pe ba ’ngngêugaibe riâ de lei, zai henêu ne pechu ’nsâubeibe riâ de lei.

²⁰Tingwang gu tingnaimikpui ze kebabe mak ze kemuîbe mak ti lau, zai pa’mbi ga ze kemuîbe runne mak ti lau?

²¹“Ningnui gu kahengîbe ramme je I â ngaugailak, zai mâ-hang du ning gai mak lei, zai ningnui ’nsimrim ze wangka’nduibe ramme ge I â a suiyi’nta mak lei.

²²Ningnui gu rûkambe-râtewbe benai mâ-himlei-râtewbe ze achu pei gai bei sede chiramme I ne lu ra mak lei, zai ningnui gu peleuyibe kaurui ramme desieyibe-râtewbe hang achu pei gai bei sede chize I â pie ra mak lei.

²³Ning gu heleu ramme tewbe kakebiengbe kuâ ze a dagene lutua ne lau; ning gu ’nrabung bekuâ ’nrahimbe I ne ’ngking ra mak lei.

²⁴Kane peize pelingtewbe ze hedui gum ze luakeu bam lau, zai peize kapelingbe ze heduitering geuki gum ze lua’nniâmba bam lau.

²⁵“Hei Israel kiduîme gau, hênamkang ge kum hedai lungge a dage ningnui gu herâtewbe benai misuiyibe kela peipatkaibe ramme ningnui teiwang gai se mei?

²⁶Ningnui gu heguang Sakkuth, zai ningnui gu hegi rapeu Kaiwan, ningnui gu mâ-luîtewbe ramme chi ningnui runne ningnui hang tewlube ramme ze ningnui tei zangneu;

²⁷chipauziegene Damaska ’nzû ze kebang hang ningnui je I ne teitat kai gu lei,” ze pe ji baudime Rapeu ze kûpeu, Tingwang ne kacheu de lei.