Read Zeme Naga AMOS 6 Bible Online

AMOS 6 - Zeme Naga bible

AMOS 6

¹“Zaion ge lung’ntaza ze bamme, zai Samaria deiloa ge ’ntêulung ze bamme, heram zatme ramme ruagene heram zat dilangbe gu kedime, penui dage Israel kiduîme ne wang’nsui ze bamme bau ze penui duângga gu lei!

²Kalne ge kapat ze pie gai ni lau; zai chigene Hamath kedibe geze tat lau; zai chipau chângge Philistinme gu Gath ge tatkeu gai lau. Ai heguangram ramme sua â chiramme â yi-ka’nteu se mei, makchai du ningnui gu heramrai suane â, penui gu heramrai dika’nteu se mei?

³Ningnui kesiabe tingnaimikpui ze kedeu ’mbe kai nan ze, Hei tewkakebuakbe bâm ze teiwang’nnagaime bau gau?

⁴“Hepuagim ne tewbe jeî ge jeime bau, zai penui jeîra ge temichai ze jeikakelame bau, zai melidung ruagene melipoine je langteume bau, zai kauruidung ruagene getumpoine je langteume bau ze penui duângga gu lei;

⁵’nrabung kuâ ge peruânggabe leu nguajieme bau, zai Dabidbe ne tew gum ze penui hangge ’nrabung ramme chiampatme bau penui duângga gu lei;

⁶hepiak kedibe ramme gene wain sakme bau, zai taudui yilangbe ne penui runne penui je ka’nnukme bau, kane Josepbe kiduîme je tew’nsiagaibe peireige helung hereumakme bau ze penui duângga gu de lei!

⁷Chidaze chunage kebang hang nîmtat-rame ruage penui ne keraime chang gu de lei, zai jeikelarua ze ’ntakediâu ze bamme ga gai kam du de lei.”

⁸Tingwang Hera ne pe runne ne deseu gai ze (Tingwang baudime Rapeu ne acheu ze sa lei): “Jakobbe ne gechîrettewbe ze I ngauka’nneî lei, zai pe gu keriengdi ramme deze I ngaugailak lei; zai chi namdi benai chige kebamme leine je nîm ra I ne pei gai gu daseu,” ze acheu zeu.

⁹Zai heki-kelak kat ge ziemmena hangkereu ringpat lêuzai du penui chai kam gu lei.

¹⁰Zai hangkat chaidipeu kiduî’mpeu, pechu rû ze kechai kateleupeu ne heki lung gene chaidibe ra ramme teipat ra hang heki lung nuksing ge bampeu je nguapat lu pechu, “Ning dage mige â larei mei?” ze acheu ’nneu gai dezai pa ne, “Ga de lei,” ze acheu gu lei; dezai pa ne, “Ning kuâneu se lau! Tingwang ji anui ne kûpatkaimau ra mak lei,” ze acheu gu lei.

¹¹Pie le lau ni, Tingwang ne pe samdie gai lei, zai heki kedibe ze lakdesuirui gai bu lei, zai heki kecheibe du tewpângdesuirui gai gu lei.

¹²Hekun ramme tingchutelie peireige pak semei? Mige getumsei tei lu ze sungkling pu gu semei? Kane ningnui â mâ-pelingtewbe ze chairabe reheu siabe hang tew gai bei, zai kapelingbe rachî ze keza karîbe hang tew gai bei de lei—

¹³ningnui Lo-debar ge hesuiyi’nta ze bamme, “Karnaim ze anui hangge anui ranchi ne anui ne sutlube mak semei?” ze kacheume bau gau.

¹⁴“Pie le lau ni, Hei Israel kiduîme gau, ningnui je ’nggi ra hangge pezat kêdabe zat je I teichu gai gu lei,” ze Tingwang baudime Rapeu ne kacheu de lei; “zai ningnui je Hamath gutbe keriekemui gene Araba geuki riâ chang ze tewhereu gai gu de lei,” kacheu de lei.