Read Zeme Naga AMOS 7 Bible Online

AMOS 7 - Zeme Naga bible

AMOS 7

¹Tingwang Hera ne aigum ze achu mâ-teilia de lei: pie le lau, heguang hangge hemeu gat-nâlangbe chângge chi pametai ramme puakpatkadaibe ting ge pa ne tîngkau ramme tew gai bei de lei.

²Tîngkau ramme ne heram gu hereuneu teu kam gai dege, I ne acheu sa de lei, “Hei Tingwang Hera gau, lun gai lau, ningchu I ne kiam lei! ’Ndaigum ze Jakobbe sapchi ra lau? Pa â chei-’mpia de lei!” ze acheu zeu.

³Aipau tedeu ge Tingwang ne pe lung heli kadai de lei; “Chize wangchang ra mak lei,” ze Tingwang ne kacheu de lei.

⁴Tingwang Hera ne achu aigum ze mâ-teilia de lei: pie le lau, Tingwang Hera â samram gai ra hemi gezene kû gai de lei, zai chize ne sungkling gechukbe ze rû kam lu ze heram ze teu ’nde ra tew de lei.

⁵Chidadege I ne, “Hei Tingwang Hera gau, tew’ntau gai lau, I ningchu kiam lei! ’Ndaigum ze Jakobbe sapchi le ra lau? Pa â chei’mpia de lei!” ze kacheu de lei.

⁶Aipau tedeu ge Tingwang ne pe lung heli kadai de lei; “Aize du wangchang ra mak lei,” ze Tingwang Hera ne kacheu de lei.

⁷Pa ne achu mâ teilia de lei: pie le lau, Tingwang ne ’ndîng-’ndeuka’nsambe ria ne ’ndeu ze tewgai’ndibe ’mbie hiage sap ze, pe ba ge ’ndîng-’ndeuka’nsambe ria tei lu ze bam lei.

⁸Zai Tingwang ne achu, “Amosbai, nang ’ndaikau ngau lau?” ze kacheu de lei. Dadege I ne, “’Ndîng-’ndeuka’nsambe ria I ngau lei,” ze acheu bei de lei. Chidadege Tingwang ne, “Pie le lau, a gume Israelme ruage ’ndîng-’ndeuka’nsambe ria ze I tei’nsap kai lei; zai penui je I mâtew-tewsedu tat’mbia dai ra mak lei;

⁹Isaakbe gu kehube bâm ramme ze gua’mpiezîng gai ra tew gai gu, zai Israel gu kakellumbe bâm ramme ze tew’nsia kam ’ndu lei, zai hiazutkie tei lu ze Jeroboam ki peireige I ne zuachu ze ’nggi gu de lei,” ze kacheu de lei.

¹⁰Dadege Bethel gu tingkupeu, Amaziabe ne Israel gu heguang Jeroboambe dage, acheu ze sam lang gai ze, “Amosbe ne Israel kiduîme ruage ningchu tewkau ra hang kelutew de lei; heram zene pe sam ramme ze lielak ti de lei.

¹¹Amosbe ne, ‘Jeroboambe â hiazutkie gene chai gu, zai Israelme je â pe ram gene kedeu ’mbe kebang hang nîmtat sing gu lei,’ ze acheu sa dadegeu,” ze kacheu de lei.

¹²Zai Amaziabe ne Amosbe je, “Hei mâ-keliâbe teipeu gau, tatchu lau, Juda ’mbe pak kai de lau, zai chige mâ teu lau, zai chige rangka’ntuabe sam pau gai be lau;

¹³kane Bethel ge â mâtew-tewsedu mâ-rangka’ntuabe sam pau gai se lau, chize â, heguang gu pebâm ka’nchibe chang daseu, zai chize â, heguangram luî gu kellumki de lei,” ze kacheu de lei.

¹⁴Dadege Amosbe ne Amaziabe je kak ze, “I â kemeu’mpeu mak lei, zai kemeume na du mak lei; kane I â kaurui teipeu lei, zai ’ndutchî bang ramme kateleupeu lei,

¹⁵zai Tingwang ne I melidung chai suibe gene achu ngua ’ndi lei, dadege Tingwang ne achu, ‘Tat ze a gume Israelme dage mâ rangka’ntuabe sam pau gai lau,’ kacheu de lei.

¹⁶“Chidaze chunage Tingwang gu sam seu le lau. Nang ne, ‘Israel peireige mâ-rangka’ntuabe sam pau gai se lau, zai Isaak ki peireige mâ-sam pau’nsia gai se lau,’ kacheu de lei.

¹⁷Chipauziegene Tingwang ne acheu ze rang lei: ‘Ning nâu ze â namdi ge pe pumzuateupui chang gai gu de lei, zai ning na ’mpeumi benai ’mpuimi ramme â hiazutkie gene kâu kam gai gu de lei, zai ning gu heram ze â, mâ-ka’ndetbe ria ne ’ndeu ze ’nzipâng kam gai gu lei; nang ze du kahebâbe heram gene chai gai gu lei, zai Israel ze penui ram gene kedeu ’mbe kebang hangge tat himchang gu de lei,’ ze acheu zeu,” ze kacheu de lei.