Read Zeme Naga AMOS 8 Bible Online

AMOS 8 - Zeme Naga bible

AMOS 8

¹Tingwang Hera ne aigum ze achu mâ-teilia de lei: pie le lau, rakhau kat ge gepuakting rachî bam de lei.

²Zai pa ne, “Amosbai, nang ’ndaikau ngau lau?” kacheu de lei. Dadege I ne, “Gepuakting gu perachî rakhau kat I ngau lei,” ze acheu bei de lei. Dadege Tingwang ne achu, “A gu Israelme peireige betun-gaibe wangchang gai de lei; zai mâtew-tewsedu penui je I tat’mbia dai ra mak lei.

³Chipau mai ge kellumki gu heleu ramme ze hapka’nrungbe kuâ hang chang gai du lei,” ze Tingwang ne kacheu de lei; “Kechaipum ramme ne misongga ze bam gu lei; pebâm leine ge reine ze penui je tuâpat kam gai ’ndu lei,” ze kacheu de lei.

⁴Aize seu le lau, ningnui kegame peireige kutkagetieme, zai heram ge kelaksiame je tewbetûn gai ze

⁵acheu sa ze, “Hekêu karchibe ’ndaidaune kam ra lau, chêu anui zuachi le ra hangge zeu? Zai ’ntakbambe mai du ’ndaidaune kam ra lau, dezai anui dekuîmeu zua ra peipat le ra, Epha ze anui tew’nchei ze shekel tew’ndi gai le ra, zai pelingmakbe hedu ramme zene duai ze mâ-mâ zua ra hangge zeu,

⁶chidezai kelaksiame je gepût ne anui lui ze, zai kegame je pîchûp bechin kat ne lui le ra, zai chêu zualaktibe zua le ra hangge zeu?” ze kacheume bau gau.

⁷Jakob ji dibe gene Tingwang ne deseu gai ze: “Gesangsing ze penui tatew ramme katte mâtew-tewsede I ’ngngaî ra mak lei.

⁸Aipau ziegene heram ze kedun mak ta ra semei, zai chige bamme leine ze desui mak ta ra semei, zai heram pelane Nail geuki gum gesuâk ze Ijipram gu Nail geuki gum ze gesuâkchu lu keu gai dai mak ta ra semei?” ze kacheu de lei.

⁹“Zai chipau mai ge, Tingnaimik ze tîngna ’nding ge keu gai de ra I ne tew gai gu lei, zai tingba perîsibe luage kedei ze I ne tewmuî gai gu lei,” ze Tingwang ne kacheu de lei.

¹⁰Ningnui gu kahengîbe ramme ze hapkadesuibe hang I ne tew gai gu lei, zai ningnui gu heleu ramme leine ze puîhapbe hang I ne tew gai gu de lei; ningnui ’nteumena kia ge miseigiriapaî I ne ’ngkang gai gu, zai hepeî leine ge hetam gutduak ne ra I ne tew gai gu lei; hangkatgap bambe na je puîhapbe gum ze bam ra I ne tew gai gu lei, zai chi betun-gaibe mai ze betedka’nsîbe mai gum ze chang ra I ne tew gai gu lei.

¹¹Tingwang Hera ne rang ze, “Pie le lau, beting ze wang mui de lei,” “heram lungge herakûm I langgairabe mai zeu; tak benai hedui gu herakûm mak lei, kane Tingwang sam ramme gu herakûm lei.

¹²Sungkling kat gene sungkling kak ze, zai tingpeî ’mbia gene tingbia ’mbia kak ze penui tat’nruirua bam gu lei; Tingwang gu sam peurua ze kat lam pak kai, zai kat lam pak kai ze penui bam gu lei, kane chize penui peudau ra mak lei.

¹³“Chipau mai dezai â, leusang ka’nchime heluîyime benai rehangme ze hedui kahereibe gene penui kâukeu gu lei.

¹⁴Mi-mige Samaria gu heraluîtewbe Ashima ji gene deseu gai ze, ‘Hei Dan gau, ning rapeu ji gene’ zai ‘Beer-sheba rapeu ji gene’ acheu ze kadeseume â kâu kam gu lei, zai mâtew-tewsedu chu dai ra mak lei,” ze kacheu de lei.