Read Zeme Naga AMOS 9 Bible Online

AMOS 9 - Zeme Naga bible

AMOS 9

¹Herâtewbe-kaira taige Tingwang sapbambe I ngau de lei, zai pa ne sa ze: “Kiziêsua ze ’ngngai kam mak tâne kechia’ndi peî ramme ze lak kai lau, zai ’nteumena peî gene chize ’ngngaîkeu ze gechimpâng gai be lau; zai chi gene ’nsakpatme je hiazutkie ne I ne bichat ’ndu lei; penui ruage hangkatte paktat ra mak lei, zai mî de pak’mbia ra mak lei.

²“Kechaiberam ’mbe penui gitgut sede chigene a ba ne penui je lupat ’ndu lei; tinggîm ’mbe penui keuchu sede chigene penui je I teikeu ’ndu lei.

³Karmel loa’ntûm ge penui ’mbai leusede chi gene penui je I peudau lu ngua ’ndu lei; zai a mikngau gene penui sungkling sîng ’mbe ’mbai leusede chige henêu je I ne samdie gai bei ze penui je ’nsâu gu lei.

⁴Zai penui teureime suage kebang hangge kumtat ti leusede, chige hiazutkie je I ne samdie gai bei ze chize ne penui je gî ’ndu lei; keyibe hanggene mak se, kane kesiabe hanggene I ne penui peireige a mik piereking ze bam gu lei,” ze kacheu de lei.

⁵Tingwang, baudime Rapeu, kedei ze pa ne deî gai bei chize ’nnung kam di, chige bamme leine puîhap ra, zai chige pelane Nail geuki gum ze dichu ze bam ra, zai Ijipram gu Nail geuki gum ze chipkeu dai ra tewpeu nung zeu;

⁶tinggîm ge pe gu ’nreibe kisîam ramme tew gai ze, zai kedei gene bepeirei ge tinggîm bambe ngaube kaigaibeipeu nung zeu; sungkling gu hedui hang kû gai ze chiramme ze kedeipeirei ge ruîgaipeu— Tingwang ze pe ji de lei.

⁷“Hei Israelme gau, ningnui ze a hangge Ethiopiame gum bam mak semei?” ze Tingwang ne kacheu de lei. “Ijipram gene Israel je, zai Kaphtor gene Philistinme je, zai Kir gene Siriame je, I ne teichu gai mak semei?

⁸Pie le lau, Tingwang Hera mik â, kahemuibe heguangram peireige rak lamui lei, zai kedeirei gene I ne chize tew’ngga ’ndu lei; I ne tew’ngga kam-gaimaktarabe Jakob ki runne zangnêu,” ze Tingwang ne kacheu de lei.

⁹“Pie le lau, I ne samdie gai gu lei, zai heram zat ramme leine ruage Israelbe kiduîme je kesau’ngngai gai gu lei, hezangrak ze hangkat ne teikesaugaibeibe gum zeu, kane kedei ge hegit katte ’ngngaîkeu gai ra mak lei.

¹⁰A gume kahemuime, ‘Anui je â kesiabe ne ngam ra mak lei, zai dau du dau ra mak lei,’ ze kacheume leine ze hiazutkie gene chai kam gu lei.

¹¹“Chipau mai ge Dabidbe gu hetiamki kâudibe ze I ne kuakchu gai dai ze tew’nsia’ndibe ramme getak kai dai gu lei, zai sia di ze kâudibe tei’nsap kai dai gu lei, zai tingtie ge bambe luigum ze chize I ne tew gai dai gu lei;

¹²chidezai Edom gene ’nsakpatbe, zai a ji gene kûpatlube heram zat ramme leine ze penui ne ’nram le ra hangge zeu,” aize tewgaipeu Tingwang ne kacheu de lei.

¹³“Pie le lau, beting ze wang mui de lei,” “heningpupeu ne helu ge hemeugatpeu je ’nzûtatrabe, zai grepchî niakpeu ne grepchî chêu lingpeu je ’nzûtatrabe ting zeu; kedeiloa ramme ne wain gekumbe ’nrimpatrabe, zai peloa ramme leine ze chi gene lua ze bamrabe ting zeu, ze Tingwang ne kacheu de lei.

¹⁴A gume bau Israelme gu betingyibe ramme I ne pei gai dai gu lei, zai tew’nsiakam’ndibe namdi ramme ze penui ne teleuchu dai lu chiramme ge penui lung ze bam gu lei; penui grepchî merie ramme tew gu, zai chi merie gu wain ze penui sak ku lei, zai merie ramme penui tew ze perachî raiteu ze bam gu lei.

¹⁵Penui ram ge penui je I ne ling gai gu lei, zai penui hang heram I peigai’ndibe gene mâtew-tewsede penui je lipat dai ra mak lei,” ze Tingwang ningnui Rapeu ne kacheu de lei.