Read Zeme Naga OBADIA 1 Bible Online

OBADIA 1 - Zeme Naga bible

OBADIA 1

¹Aize Obadiabe je liâbe de lei, Edom tedeu ge Tingwang Hera ne aigum ze rang lei. Tingwang dagene sam anui seu lu de lei, zai hepâupaupeu hangkat je heramzatme ruage lang gai de lei: Ningnui zuachu zu lau! “Pechu herei ra anui zuachu zu kei lei!” acheu sabe zeu.

²Pie le lau pezat ramme ruage pezat cheibe hangge I ne ningchu tew gai gu lei, zai ningchu tewhelêuku gai gu lei.

³Nang hekâutelang ramme ge lungpeu, zai peloa kehube ramme ge lungpeu gau, ning lung gechîrettewbe ne ningchu duai de lei, ning hanggene, “Châu ne achu kedei ’mbe tewkeu gai dui lau?” ze nang kacheupeu gau.

⁴Keliengrie gum ze nang kin’ngngutau ze bam, zai hegi ramme ruage ning chippua gai lu bam sede, chigene ningchu I ne chakkeu gai ’ndu lei, ze Tingwang ne kacheu de lei.

⁵Ning dage mâ-kahegame benai sut-teume tingmuî ne wang lêuzai— ’ndaizeuge ningchu tew’nsia gai be ra lau!— penui hang buibe riâ runne hega mak ta ra semei? Ning dage grepchî-raime wang lêuzai, penui rai’nsak kai mak ta ra semei?

⁶Esaube gu merua tewka’nsiabe tak, pe heurâ ramme getaitattibe tak nung ze hêu!

⁷Ning lam mêuhâme leine ne ningchu choa gai bei de lei, heramrai riâ ningchu penui ne kumtua gai bei de lei; ning dage desieyi ze nguapuinakattew ze bamme ne ningchu naîchim ’ndi de lei; ningchu takkuak nguateume ne ningchu mi ra ’mpia tew gai bei de lei— chize la lei be mâ de chî mak lei.

⁸Chipau mai ge Edom ge ziemmena kaningchingme je benai Esaube Deiloa gene mâ-’nningchibe ze I ne lutua mak ta ra semei? ze Tingwang ne kacheu de lei.

⁹Hei Teman gau, ning gu heteureipeu ramme hingkedun gai gu de lei, dezai Esaube Deiloa gene ziemmename je gîchat kam ’nde ra hangge zeu.

¹⁰Ning sikina’mpeu Jakob je ’nggi ze tewchatbe ziegene, nang ’ngngam ne ning ju gum lu bam gu lei, zai ningchu â betingbeta hangge ngettua ’ndu de lei.

¹¹Nang sap’mbia’ndeudibe mai ge, pe heurâ ze hesang heluîchâmme ne sut-tattibe mai ge, zai heram kêdabe deiname ne pe gu kerie’ngkam ramme gechimpânggut ze Jerusalem ’nzi ze hedachak ze bambe mai ge, nang du chime ruage hangkat helî gum ze bam de lei.

¹²Kane ning sikina’mpeu pe pausiabe mai ge pe peireige nang pie bam se lau; Judame peireige penui je tewka’nsiabe wangbe mai ge nang ning suiyi’nta gai mak ra lei; pe duânggabe mai ge du ning dit tewlia gai mak ra lei.

¹³Nang â a gu ziemmena gu kerie ’ngkam tewpânggutmakrabe kau de lei, pe pausiabe ’nnangwangbe mai ge zeu; pa pe pausiabe daube mai ge Juda peireige nang pie bam mak ra lei, pausiabe daube mai ge pe gu merua ramme nang sut mak ra lei.

¹⁴Pe gu ziemmena herei gene pak’mbiatatme je nang ne ’mpuîremak ge sapnam mak ra lei; mi duânggabe mai ge pe gu ziemmename kechai’nreipatlume je hereime ba ge nang pei gai mak ra lei.

¹⁵Pezat leine peireige samram ra Tingwang gu naimikpui na de lei. Nang tâtewgai’ndibe luigum ze ning peireige du tew gai gu lei, ning tatew ramme ze ning peireige wang gai dai gu lei.

¹⁶A gu ka’nchibe deiloa gene nang saklube luigum ze, heram zat ramme leine du sak ku lei; penui kedingpitkeu kam ’ndu lei, zai mâ de mak run ze bam gu lei.

¹⁷Kane Zaion Loa ge pak’nreipatlume ramme bam gu lei, zai chize â ka’nchibe bâm chang gu lei; zai Jakob ki ne penui heurâ nguaheu dai kam ’ndu lei.

¹⁸Jakob ki zene hemi chang gu, zai Josep ki zene hemimelei chang gu, zai Esau ki zene megau chang gu lei; penui ne Esau ki ze rû gu, zai heimia gai ’ndu lei, zai Esau ki ge mî de ringpatlube kau bam ra mak lei, ze Tingwang ne sa gai ’ndi daseu.

¹⁹Negeb ge bamme ne Esau Deiloa lu ’ndu lei, zai Shephela ge bamme ne Philistiaram ze lu ’ndu lei; zai chime ne Ephraimram benai Samariaram ’nram ’ndu lei, zai Benjaminbe ne Gilead ze lu ’ndu lei.

²⁰Israelme Hala ge lunglêume ne Phoeniki gene Zarephath riâ chang ze lu kam ’ndu lei; zai Sepharad ge Jerusalem name ’nseugaileu ze bamme ne Negeb gu namdi ramme lu kam ’ndu lei.

²¹Ringpatlume ne Esau Deiloa heraktei ra Zaion loa ’mbe keuchu gu lei; zai chi heguangram ze â Tingwang gu chang gu lei.