Read Zeme Naga JONA 4 Bible Online

JONA 4 - Zeme Naga bible

JONA 4

¹Kane chize Jonabe pa-’nning makluisui di de lei.

²Zai Tingwang dage pa acheu ze kakellum de lei. “Hei Tingwang gau, I ning dage kie lei, a ram ge I bambe ting ge sagai’ndibe mak semei? Chipauziegene I keluakkelet Tarshis ’mbe pak’mbia gai di de lei; nang â ’nggiachibe Rapeu, ning raitiepeu zai hungka’ntipbe ne puibepeu zai kesiabe gene nang â helidaichipeu lei be I chî lu dadegeu.

³Chipauziegene chunage, Hei Tingwang gau, a dagene a keringbe ze lu le zu lau, ningchu I kiam lei, a hangge â ringrabe suadu chaiderabe yibi gu daseu,” ze acheu zeu.

⁴Dadege Tingwang ne, “Nang achu ning râtabe ze ning hangge mâ-keyibe la se mei?” ze kacheu de lei.

⁵Chidadege Jonabe namdi ’mbe tat ti de lei, zai namdi gene naimikpat ’mbia ’ntau gai lu chige pe runne pe hang hetiamki liâm gai de lei. Zai chi hetiamki kezui kangge pa ’ntau gai di de lei, zai chi namdi peireige ’ndaikau wangchang gu mei be pa ngau mak tâneu.

⁶Zai Tingwang ne mâ-bang kat chaupat kai de lei, zai Jonabe bamtemibi ra hang, pe peirei sungkezui ra mâ-bang puakpat ra tew gai bei de lei. Chigum ze Jonabe a chi mâ-bang ziegene pe suiyi-desang di de lei.

⁷Kane bechaibe mai ba’nzangrapatbe luage, chi mâ-bang je tew’nsiarabe hang Hera ne pa’ngkit kai bei de lei, chidadege â chipau bang ze heguikeu di de lei.

⁸Zai tingnaimik pat dege, Hera ne tingbia ’mbene tingkai lumbe pei gai bei ze, tingnaichiê ted ne Jonabe je pu bei ze pe jiesia di de lei; zai pa chai gai de ra hang acheu ze kie de lei. “A hang â ringrabe suadu chaiderabe ze yibi gu de lei,” ze acheu zeu.

⁹Kane Hera ne Jonabe je, “Mâ-bang hangge nang ning lumpumbe ze ning hang yi semei?” kacheu de lei. Zai pa ne, “I â a lumpum ra run de lei, chai du chairabe riâ hang a lumpum de lei,” ze kacheu de lei.

¹⁰Dadege Tingwang ne pechu, “Nang mâ-bang je ngau’nggia lau, chi nang ne tâtewhereugaimakbe, zai puakpatrabe hang du tâtewhereugaimakbe tingmuî kat lung gene pa pat lu, zai tingmuî kat lung gene gagaidaidibe bang zeu.

¹¹Zai chigum ze ziemmename mâ-keyi-kesia ’nning chimakme lâk kat ze chang ’ngkai suadu kie ze bambe namdi kedibe Ninebi benai kaurui misongga bambe je I ngau’nggia mak ta ra se mei?” ze kacheu de lei.