Read Zeme Naga PERIAK 1 Bible Online

PERIAK 1 - Zeme Naga bible

PERIAK 1

¹Penui Ijip gene zuapattibe châng, patingkum pakenabe zai hekêu pakenabe gu hezie raîlangbe mai ge Sinai hênamchangbe bâm ge ka’nduibe hetiampaîki ge Tingwang ne Mosabe je ka’mpau de lei, acheu sa ze,

²“Israelme kibaume leine je hepiau raw-wang zu lau, penui kibaume, penui peume kibaume ’mpeumi leine, hangkat, hangkat penui ji bamdibe riak luigum zeu;

³kum ’ngkai gene pa’nrei Israel ge herei’nggi ra zuapatduime leine je nang benai Aaronbe ne penui riak pebau-bautew ze sei gai ra lei.

⁴Zai hezat kat ge ’mpeumi hangkat-kat, pe peume kiria gene besuitew ze bamme ningnai dage bam ra lei.

⁵Zai airamme ze ningnai dage bamrame ’mpeumi ji ramme de lei. Reubenbe ki gene Shedeurbe na Elizurbe;

⁶Simeonbe ki gene Zurishaddaibe na Shelumi-elbe;

⁷Judabe ki gene Amminadabbe na Nahshonbe;

⁸Issakarbe ki gene Zuarbe na Nethanelbe;

⁹Zebulunbe ki gene Helonbe na Eliabbe;

¹⁰Josepbe name dagene, Ephraimbe dagene, Ammihudbe na Elishamabe, zai Manassebe ki gene Pedahzurbe na Gamalielbe;

¹¹Benjaminbe ki gene Gideonibe na Abidanbe;

¹²Danbe ki gene Ammishaddaibe na Ahiezerbe;

¹³Asherbe ki gene Okranbe na Patgielbe;

¹⁴Gadbe ki gene Deuelbe na Eliasapbe;

¹⁵Naphtali ki gene, Enanbe na Ahirabe, acheu zeu,” ze kacheu de lei.

¹⁶Aime bau ze baudime wangka’nduibe ruagene kelângpatkailume bau de lei, penui peume kiria ge ka’ngguame besuitewme, Israel ki baume ruage bepeî changme bau zeu.

¹⁷Aime heji kûgai’ndime je Mosabe benai Aaronbe ne kangua de lei,

¹⁸zai hekêu pakenabe gu hezie raîlangbe mai ge, penui peume kiria ge kum ’ngkai gene pa’nrei kau hepeî riak ’nsangne gu heji bambe riak luigum ze penui run-runne penui ji raw ze bamme baudime ’nteumena je penai ne gekumwangkandui de lei.

¹⁹Tingwang ne Mosabe je diegaibeibe luigum zeu. Chigum ze Sinai hênamchangbe bâm gene pa ne penui riak sei de lei.

²⁰Israelbe na meraipeu Reubenbe dagene piakeume, penui rehei piakeube ramme ge penui kibaume, penui peume kibaume, heji ramme seibe luigum ze, hepeî riak, ’mpeumi leine, kum ’ngkai gene pa’nrei kau herei’nggi ra zuapatchiduime leine:

²¹Reubenbe kiriame riak ze chang hedai ze seruk ze haî mengeu lei.

²²Simeonbe dagene piakeume, penui rehei piakeube ramme ge, penui kibaume, penui peume kibaume, herei ge zuapatchiduime leine, hepeî riak riambe ge lugai’ndime, heji riak kum ’ngkai gene pa’nrei kau ’mpeumi leine seigaibe:

²³Simeonbe kiriame riak ze chang rengeu ze sekui ze haî chum lei.

²⁴Gadbe dagene piakeume, penui rehei piakeube ramme ge, penui kibaume, penui peume kibaume heji ramme seikeube luigum ze, hepeî riak ’mpeumi leine kum ’ngkai gene pa’nrei kau, herei’nggi ra zuapatchiduime:

²⁵Gadbe kiriame riak ze chang hedai ze mengeu ze haî seruk ze rengeu lei.

²⁶Judabe dagene piakeume, penui rehei piakeube ramme ge, penui kibaume, penui peume kibaume, heji ramme seibe luigum ze, hepeî riak ’mpeumi leine kum ’ngkai gene pa’nrei kau, herei’nggi ra zuapatchiduime:

²⁷Judabe kiriame riak ze chang riaksena ze medai ze haî seruk lei.

²⁸Issakarbe dagene piakeume, penui rehei piakeube ramme, penui kibaume, penui peume kibaume, heji ramme seibe luigum ze, hepeî riak, ’mpeumi leine kum ’ngkai gene pa’nrei kau, herei’nggi ra zuapatchiduime:

²⁹Issakarbe kiriame riak ze chang rengeu medai ze haî medai lei.

³⁰Zebulunbe dagene piakeume, penui rehei piakeube ramme ge, penui kibaume, penui peume kibaume, heji ramme seibe luigum ze, hepeî riak ’mpeumi leine kum ’ngkai gene pa’nrei kau, herei’nggi ra zuapatchiduime:

³¹Zebulunbe kiriame riak ze chang rengeu ze sena ze haî medai lei.

³²Josepbe dagene piakeume, chize Ephraimbe dagene piakeume, kacheume penui rehei piakeube ramme ge, penui kibaume, penui peume kibaume, heji ramme seibe luigum ze, hepeî riak ’mpeumi leine kum ’ngkai gene pa’nrei kau, herei’nggi ra zuapatchiduime:

³³Ephraimbe kiriame riak ze chang hedai ze haî mengeu lei.

³⁴Manassebe dagene piakeume, penui rehei piakeube ramme ge, penui kibaume, penui peume kibaume, heji ramme seibe luigum ze, hepei riak ’mpeumi leine kum ’ngkai gene pa’nrei kau, herei’nggi ra zuapatchiduime:

³⁵Manassebe kiriame riak ze chang himreu ze kena ze haî na lei.

³⁶Benjaminbe dagene piakeume, penui rehei piakeube ramme ge, penui kibaume, penui peume kibaume heji ramme seibe luigum ze, hepeî riak, ’mpeumi leine kum ’ngkai gene pa’nrei kau, herei’nggi ra zuapatchiduime:

³⁷Benjaminbe kiriame riak ze chang himreu ze medai ze haî mengeu lei.

³⁸Danbe dagene piakeume, penui rehei piakeube ramme ge, penui kibaume, penui peume kibaume, heji ramme seibe luigum ze, hepeî riak ’mpeumi leine kum ’ngkai gene pa’nrei kau, herei’nggi ra zuapatchiduime:

³⁹Danbe kiriame riak ze chang riakseruk ze kena ze haî sena lei.

⁴⁰Asherbe dagene piakeume, penui rehei piakeube ramme ge, penui kibaume, penui peume kibaume, heji ramme seibe luigum ze, hepeî riak ’mpeumi leine kum ’ngkai gene pa’nrei kau, herei’nggi ra zuapatchiduime:

⁴¹Asherbe kiriame riak ze chang hedai kat ze haî mengeu lei.

⁴²Naphtalibe dagene piakeume, penui rehei piakeube ramme ge, penui kibaume, penui peume kibaume, heji ramme seibe luigum ze, hepeî riak ’mpeumi leine kum ’ngkai gene pa’nrei kau, herei’nggi ra zuapatchiduime:

⁴³Naphtalibe kiriame riak ze chang rengeu ze kechum ze haî medai lei.

⁴⁴Aime ramme ze ’mpeumi hangkereu ze kena penui peume ki ji gene hangkat-kat zuapatme, Israelme ruage kanguame besuitewme je Mosabe benai Aaronbe ne ngua lu seipatkaibeime bau de lei. ’Mpeumi hangkereu ze kena penui peume kibau kelei gene mi hangkat-kat ne ’ngngâ bei ze seigai’ndime bau de lei.

⁴⁵Chigum ze Israelme kibau seigaibe leine, penui peume kibaume, kum ’ngkai gene pa’nrei kau, Israelram gene herei’nggi ra zuapatchiduime—

⁴⁶penui riak pelane lâk seruk ze chang chum ze haî mengeu ze rengeu lei.

⁴⁷Kane Lebime zat je â penui peume kibaume ne penui dage seiherua gai mak lei.

⁴⁸Tingwang ne Mosabe dage ranggaibe ze,

⁴⁹“Lebibe kiria je runne ningnai sei gai mak ra lei, zai Israelbe kibau ruage ningnai penui je hepiau rawherua gai mak ra lei;

⁵⁰kane Lebime kakellumbe-paîki gu hingde peireige, zai merua leine peireige zai chige bambe leine peireige besuitew ra sum gai lau; penui ne kakellumbe-paîki benai merua ramme tei’nsap ze reî ra, zai kakellumbe-paîki ze lungguâ ra lei.

⁵¹Kakellumbe paîki rakeu ra Lebime ne chize rakeu ra lei; zai kakellumbe-paîki tew’nsapchu ra dezai, Lebime zat ne chize tew’nsap kai ra lei. Zai mige chige wangka’nnabe kau je â tewchat ne ra lei.

⁵²Israelme kibaume ne penui bâm taige penui gu hetiamki tew gai ze, ’nteumena ne pe gu-gu sieki benai hepiepaî hiage penui gu hetiamki ramme tei’nsap kai ra lei;

⁵³kane Lebime ne samdebung bambe kakellumbe-paîki ze lungguâ ra lei, chidezai Israelme kibaume wangka’nduime peireige Tingwang lumpum pei bam mak ra hangge zeu; zai Lebime ne samdebung bambe kakellumbe paîki ze reî ra lei” ze acheu bei dadegeu.

⁵⁴Israelme ne chigum ze tew gai de lei; Tingwang ne Mosabe dage diegaibe leine luigum ze penui tew gai de lei.