Read Zeme Naga PERIAK 10 Bible Online

PERIAK 10 - Zeme Naga bible

PERIAK 10

¹Tingwang ne Mosabe je,

²“Gepût hegeîluîkie kena tew gai lau; chibe kena ze gepût ne nang heki gai ra lei; zai sieki rakeurabe hangge benai baudime je kûkelaurabe hangge nang chibe kena tei ra lei.

³Zai chibe kena ’mmut kai dezai ka’nduibe-paîki kemui ge ning dage baudime leine penui run-runne wang’ndui gai ra lei.

⁴Kane kat runne ’mmut kai dizai â chigum ze kanguame ramme, Israelme zat gu besuiteume ramme ne penui run-runne ning dage wang’ndui gai ra lei.

⁵’Ntîngrabe kuâ zat hang ningnui ne ’mmut kai dezai, tingbia ’mbia sieki ramme bambe gene zuapat ra lei.

⁶Zai hegeîluîkie pakenabe ningnui ne ’mmut kai dezai, tingpî ’mbia ge sieki ramme bambe gene zuapat ra lei. Penui zuapat ra tânege hegeîluîkie ’mmut kai ra lei.

⁷Kane baudime wang’ndui ra dezai â ningnui ne hegeîluîkie bekuâ ’mmutpat sâng ’mmutpat kai ra lei, kane ’ntîngrabe kuâ zat hang ningnui ’mmutpat kai mak ra lei.

⁸Zai Aaronbe name, tingkume ramme ne hegeîluîkie ’mmut ra lei. Ningnui gu reheime ramme dage betingbeta gu rawgaibe hingde hang chang ze hegeîluîkie ramme ningnui dage bam ra lei.

⁹Zai ning gu heram lungge ningnui je tewsame heteureime dage herei’nggi ra ningnui zuapat dezai, hegeîluîkie ramme gene ningnui ’mmutzia gai ra lei, dezai Tingwang ningnui Rapeu suage ningnui je chibamrabe hang, zai ningnui teurei ramme dagene ningnui je ’nripat kai be ra hangge zeu.

¹⁰Zai ningnui, ningnui suiyibe mai ge du, zai ningnui gu hengi ramme diegaibe hî sing ge zai ningnui gu hekêu pîbang ramme ge, ningnui gu rûkambe-râtewbe peireige benai ningnui gu desieyibe kela peipatbe ramme gu herâtewbe ramme peireige ningnui hegeîluîkie ramme ’mmut kai ra lei; ningnui Rapeu suage chibamrabe hang chiramme zene ningnui tâudeu hang chang ra lei; I â Tingwang ningnui Rapeu lei,” ze kacheu de lei.

¹¹Tingkum pakenabe ge, hekêu pakenabe gu hezie ’ngkai mai ge, hingdebung bambe paîki peirei gene kemâu ze tei’mbiachu kam gai ’ndi de lei.

¹²Zai Sinai ge hênamchangbe heram gene Israelme pebau-bautew ze zuapat ti de lei; zai Paran ge hênamchangbe heram ge kemua hiamkeu ze jei bam de lei.

¹³Mosabe dage Tingwang gu samdiegaibe gene penui zuapat kai raî de lei.

¹⁴Juda gu sieki ge bamme bau ne penui gu hepiepaî kang gene zuapat kai raî de lei. Amminadabbe na Nahshonbe ne pemui chang de lei.

¹⁵Zai Zuarbe na Nethanelbe ne Issakar zat gu besuitewpeu chang lei.

¹⁶Zai Helonbe na Eliabbe ne Zebulun zat gu besuitewpeu chang lei.

¹⁷Zai kakellumbe-paîki rakeu lu dege Gershonbe name benai Meraribe name kakellumbe-paîki puame zuapat te lei.

¹⁸Zai Reubenbe gu sieki ge bamme bau ne chipau chângge zuapat kadai de lei, penui gu hepiepaî kangge neu; zai Shedeurbe na Elizurbe ne penui bau gu besuitewpeu chang de lei.

¹⁹Zai Zurishaddaibe na Shelumi-elbe ne Simeonbe kibaume gu pebau ge besuitewpeu chang de lei.

²⁰Zai Deuelbe na Eliasapbe ne Gadme zat gu pebau ge besuitewpeu chang de lei.

²¹Chipau chângge Kohathme ka’nchibe merua ramme pua lu ze zuapat te lei, zai penui wangchangrabe suage kakellumbe-paîki â tew’nsapchu gai ’ndi de lei.

²²Chipau chângge Ephraim gu sieki ge bamme bau ne penui gu hepiepaî kang gene zuapat te lei, zai Ammihudbe na Elishamabe ne penui bau gu besuitewpeu chang lei.

²³Zai Pedahzurbe na Gamalielbe ne Manasse ge bamme zat gu besuitewpeu chang lei.

²⁴Gideonibe na Abidanbe ne Benjaminme zat gu pebau ge besuitewpeu chang lei.

²⁵Nâlangbe ge Dan gu sieki ge bamme bau ne pebau ramme zeu hang pie ze nguareîtatbe chang ze penui gu hepiepaî kang gene zuapat te lei. Ammishaddaibe na Ahiezerbe ne chige pemuitew lei.

²⁶Zai Okranbe na Pagielbe ne Asherme zat gu pebau ge besuitewpeu chang lei.

²⁷Zai Enanbe na Ahirabe ne Naphtalime zat gu pebau ge besuitewpeu chang lei.

²⁸Aize Israelme penui je kanguame bakang gene zuapat ka’nsuibe sietak te lei.

²⁹Zai Mosabe ne Midian’mpeu Reuelbe na Hobabbe, Mosabe nâu peu je, “Tingwang ne, ‘Ningnui je I ne pei gu lei,’ ze kacheube bâm ’mbe anui ne zuatat lei; anui dage wang lau, zai anui ne ning hangge mâ-keyibe ’nning gai gu lei; Tingwang ne Israelme hangge mâ-keyibe hat kai la de lei” ze kacheu de lei.

³⁰Kane Hobabbe ne pechu, “I â tat ra mak lei; I â a gu heram ’mbe zai a zatme tailam tat tu lei,” kacheu de lei.

³¹Zai Mosabe ne, “Anui je put kai se lau, I ne ningchu kiam de lei, hênamchangbe heram ge ’ndaigum anui ne sieki tew ra mei be nang chi de zeî lau, zai nang ne anui je nguarua ra de lei.

³²Zai nang ne anui dage tat bei zai â Tingwang ne anui hangge mâ-keyibe tewgaibeibe ze anui ning hang tew gai gu lei,” ze kacheu de lei.

³³Chigum ze Tingwang gu ka’nchibe deiloa gene penui zuapat ze hezie kechumne tebeîtew de lei, zai hezie kechumne tebeîtewbe ge Tingwang gu samhetkaibebung ne penui suage raîtat lei, penui ’ntâkkairabe bâm hang peupatlerabe hangge neu.

³⁴Zai sieki gene penui zuapat tânege, ’nrîmbeting ge Tingwang gu kemâu ne penui peireige bam de lei.

³⁵Zai hingdebung puapat tânege Mosabe ne, “Chu lau, Hei Tingwang gau, zai peize ning teureime je rariptat kam de lau; zai peize ningchu ngaugailakme je ning suagene paktat te lau,” ze kacheu de lei.

³⁶Zai chi hingdebung saugaibe luage pa ne, “Hei Tingwang, Israelme changsenângme dage helatwang dai lau,” ze kacheu de lei.