Read Zeme Naga PERIAK 11 Bible Online

PERIAK 11 - Zeme Naga bible

PERIAK 11

¹Zai Tingwang keseube gene baudime penui pausiabe ramme deu ge hechuaikiebe bam di de lei; zai chize Tingwang seu lu dege, pe lumpum-desang di de lei, zai Tingwang gu hemi penui ruage tau di de lei, zai sieki-’ngra helabe gu gêsa â rû ’ndi de lei.

²Chidadege â baudime Mosabe je kû’nrung chu di de lei; zai Mosabe ne Tingwang dage kellum gai bei ze hemi ze ’mmitbi-bi di de lei.

³Chidadege chipau bâm ji ze Tabera ze ku de lei, Tingwang gu hemi penui ruage taudibe ziegeneu

⁴Penui ruage hezat hairiap bamme ne hemei teu gai nei ze gesutlak ti de lei; zai Israelme ’nsangdu hap dai di de lei, zai acheu sa ze, “Hei, anui hemei ngau lu laîzai hêu!

⁵Ijipram ge pemî pei mak ze hekâ ji, ’nggaîne ramme, peduibunggaîne ramme, zai tingrâma ramme, tingrâgiebe ramme, zai tingrâ-hâbe ramme teube ze mi ’nningdau-desang lei,

⁶kane chuna â anui ran-gakeu mui de lei, zai aipau manna sâu ze â mâ de ga daseu,” ze kacheu de lei.

⁷Chunage manna ze â bakutchiâmbe chêu gum tai de lei, zai peluî â dellium luigum tai de lei.

⁸Baudime ne tatrua ze kuairua de lei, zai mâ-niakbe ’ngkum gene niak lu ze mei nune mâ-tâubekuak ramme gene tâu lu ze mei, zai chize heli ramme gene sua lu ze mei chigene tingku ramme hang teleu gai de lei; zai teuyibe pa’nggum tak â taudui ne tingku langlube teuyibe gut gum de lei.

⁹Tingmuîzeu ge kezikdui sieki peireige keube luage manna ruikeuka’mpam de lei.

¹⁰Baudime penui kelak ramme ge ’mpeumi ramme leine pe gu-gu hetiampaîki kemui ge bam lu hapriau-riau bambe Mosabe seu di de lei; zai Tingwang ne pe lumpum di de lei, zai Mosabe â pa’nning mak luisui bam di de lei.

¹¹Mosabe ne Tingwang je, “Ning guâ ka’ngguapeu je ’ndaitew ze nang tewkahereu lau? Zai daitew ze a peireige aime bau leine gu heput keritbe nang achu tua gai ze ning mikngau ge keyitewbe I ngau mak lau?

¹²I ne penui je lungkeu gai semei? Nang achu, ‘Penui peume je pei ra nang ne hatkai’ndibe heram ’mbe hena ka’mpâmpui ne puatungbe poine je pua gum ze ning ga gene penui je puatatchu lau’ ze acheu ra I ne penui je lungpat kai kau semei?

¹³Aime bau leine je pei ra hemei ’ndai gene I ngau ra lau? A suage penui hap ze acheu sa ze, ‘Anui teu ra anui je hemei pei lau,’ ze kacheu de lei.

¹⁴A runne ne aime bau ’nteumena je I ngua kam lak te lei, a hangge heput rit’mpia de lei.

¹⁵A dage nang ne chigum tâtew gai ra dizai â I kahereube ngau mak ra hangge ka’nggia ze luakatne achu tewchat ne lau,” ze kacheu de lei.

¹⁶Zai Tingwang ne Mosabe je, “Israelme ruagene gechîngme riaksena a hangge nguawang lau, penui ruage gechîngme hang benai tâ-muipuame hang yirame nang ne gechîme jeu; zai ka’nduibe-paîki ge penui je nguawang gai lau, zai chige penui je peize ningchu nguasapda lau.

¹⁷Zai I wangkeu ze chige ningchu ’mpau gu lei: zai ning peireige herui bambe I ne gêsa lu lu penui peireige kai gu lei; dezai baudime gu heputkeritbe ze penui ne ningchu punggaihâ gu lei, chidezai chige ning runne pung mak ra hangge zeu.

¹⁸Zai baudime je acheu salia lau, ‘’Nchuamai hang ningnui runne ningnui je tew’nchi le lau, zai ningnui hemei teu gu lei; Tingwang keseube gene ningnui hap ze, acheu sa ze, “Hemei teu ra anui je châu ne pei ra lau? Ijipram ge lungbe ze anui hangge yibe lei,” ze kacheu dadegeu. Chidaze Tingwang ne hemei ningnui je pei gu lei, dezai ningnui teu gu de lei.

¹⁹Mai kat mei, hezie kena mei, hezie mengeu mei, hezie kereu mei nune hezie ’ngkai mei runne ningnui teu gai lu tarabe mak ze,

²⁰kane ningnui nêuki ramme gene chize pat dai ze ningnui je tewtenagairabe riâ chang mak tâne ningnui bekêu ting tâluî teu ze bam gu lei, ningnui ne ningnui ruage bampeu Tingwang je tuâpat kai ze, “’Ndaitew ze anui Ijip gene pat ti se lau?” acheu sa ze hapkaibeibe ziegeneu’ ze acheu zeu,” ze kacheu de lei.

²¹Kane Mosabe ne sa ze, “Tatruame baudime riak achu sei’mpam gai dege lâk seruk lei; zai nang ne acheu sa ze, ‘Kêu kat tâluî penui teurabe hang I penui je hemei pei gu lei!’ ze kacheu de lei.

²²Penui ka’nnangbe hangge melidung ramme benai kauruidung ramme penui hang gîchat kai ra mei? Makchai penui ka’nnangbe hangge sungkling ge hekâ bambe leine penui hangge teiwang’ndui gai ra mei?” ze kacheu de lei.

²³Zai Tingwang ne Mosabe je, “Tingwang ba ran-ga di de mei? Chunage a sam luigum ze ning hangge wangchang gu mei wangchang mak kû mei be nang ngau gu lei,” ze kacheu de lei.

²⁴Chidadege â Mosabe tatpat lu baudime je Tingwang gu sam ramme ranglia de lei; zai baudime gu gechîngme riaksena je pa nguawang’ndui lu penui je paîki hiage kaiguâling gai de lei.

²⁵Chidadege kemâu gene Tingwang wangkeu ze pechu ka’mpau de lei, zai pe peireige herui bambe gêsa lu lu gechîngme riaksename peireige kai bei de lei; zai penui peireige herui bam gai dege â kemeu sam penui sa di de lei. Kane penui chigum tew’nduâ mak lei.

²⁶Chunage sieki lungge hangna bam lei, hangkat ji â Eldadbe lei, zai kêdapeu ji â Medadbe lei, zai herui penai peireige bam de lei; penai ze heji rawgai’ndime ruage bam lei, kane penai â paîki gene hela tatpat mak lei, zai chigum ze penai sieki lung gene kemeusam pau de lei.

²⁷Zai rehang’mpeu hangkat ne pakwang lu Mosabe je, “Eldadbe benai Medadbe â sieki lungge kemeusam pau la de lei,” ze pau gai lei.

²⁸Zai Nunbe na Joshuabe, Mosabe guâ ka’ngguapeu, pe gu kelânglume ruage hangkat ne, acheu sa ze, “A pau Mosa gau, penai je tew’nsau ne lau,” ze kacheu de lei.

²⁹Kane Mosabe ne pechu, “A hangge nang ’nningkahereu mei? Tingwang gu ziemmena leine ne kemeume chang kam di nung laîzai hêu, dezai Tingwang ne pe gu herui penui peireige kai be ra hang!” ze kacheu de lei.

³⁰Dadege Mosabe benai Israelme gu gechîngme ramme sieki ’mbe helat dai di de lei.

³¹Zai chige Tingwang dagene tingkai guigepâupatbe zene sungkling ’mbene hekuai ramme ze guiwang de lei, zai chiramme ze sieki hiage kêu gai ra tew gai bei de lei, sieki gene kat lam’mbia mai kat beî riâ zai kêda ’mbia mai kat beî riâ ge, zai kedei gene sâu kat huchube riâ chiramme zene puigit bam di de lei.

³²Zai baudime chu lu kebabe ting tâluî benai kemuîbe ting tâluî, zai bechai mai tâluî, hekuai ramme tuîka’ndui de lei; tuî’nchamlangpeu, homer kereu (pehit chang kereu) riâ tuîwang de lei; zai sieki hia leine ge penui hangge chiramme penui pukî chu di de lei.

³³Penui geu kakge hemeikâng bambe ’nneikeu gai makge Tingwang lumpum baudime dage wangtâu di de lei, zai herarît kechibe ne baudime je Tingwang ne tewsâ de lei.

³⁴Chidadege chipau bâm ji ze, Kibroth-hattaaba acheu ze ku de lei, chipau bâm ge ziemmena penui teusuaradime je penui baigaibe ziegeneu.

³⁵Kibroth-hattaaba gene Hazeroth riâ baudime tebeîtew de lei; zai Hazeroth ge penui bam gai de lei.