Read Zeme Naga PERIAK 12 Bible Online

PERIAK 12 - Zeme Naga bible

PERIAK 12

¹Miriamle benai Aaronbe ne Mosabe je pa kelaktewpui Kus’mpui ziegene pechu kia de lei, Kus’mpui je pa ne nguakelaktewbeibe ziegeneu;

²zai penai acheu sa de lei, “Tingwang ne Mosabe dagene runne ka’mpau run semei? Anai dagene â ’mpau mak mei?” ze acheu zeu. Zai chize Tingwang ne seu di de lei.

³Chipau ting ge kedeirei ge ziemmena kebamme leine suadu Mosabe â pe lung renualangbe chang ze bam lei.

⁴Zai luakatne Mosabe dage zai Aaronbe benai Miriamle dage Tingwang ne acheu ze sa ze, “Ka’nduibe-paîki ’mbe ningnui hangchum pat lau,” ze kacheu de lei. Zai penui hangchum zuapat te lei.

⁵Zai kemâukang gene Tingwang wangkeu de lei, zai paîki kemui ge sap kai lu ze Aaronbe benai Miriamle je ku de lei; zai penai zuawang’nna gai de lei.

⁶Dadege pa ne acheu sa ze, “A kuâ ’ngking le lau: ningnui ruage mige kemeu’mpeu bambe luage â keliâbe gene I, Tingwang I sing ne achu pa chî ra tewlia gai de lei, hemang gene pechu I ka’mpau de lei.

⁷A guâ ka’ngguapeu Mosabe dage â chigum tew mak lei; a kibaume leine je reî ra pechu I pei gai lei.

⁸’Nchichiak ze pechu I a mui sing gene ka’mpau lei, zai mâ-mâ chîhungbe tak gene mak zeu; zai Tingwang luîtak pa ngau lei. Acheuzai ’ndaitew ze a guâ ka’ngguapeu Mosabe je sa’nsia ra ningnai hing mak lau?” ze kacheu de lei.

⁹Chidadege penai peireige Tingwang pe lumpum di de lei, zai pa tatrimna di de lei;

¹⁰zai paîki peirei gene kemâu ’mbaîbakpat ti dege, pie le lau, Miriamle ze kebun gum hâ gai di ze ka’mpapui chang gai di de lei. Zai Aaronbe Miriamle tailam ’nreiwang pie gai dege, pa â ka’mpapui chang gai di laleu de lei.

¹¹Zai Aaronbe ne Mosabe je, “Hei, a pau gau, anai mâ-tewmau gai ze hemuidibe ziegene anai je tewsâ se lau,

¹²mige pe pui nebâm gene zuakeube luage pechie pa’mpi â sia gai di ze chaidipoine gum ze peize pechu chang gai se lau,” ze kacheu de lei.

¹³Dadege Mosabe Tingwang dage kû’nrung ze, “Pechu tew’mmi gai be lau, Hei Hera gau, I ningchu kiam lei,” ze kacheu de lei.

¹⁴Kane Tingwang ne Mosabe je, “Pe peu ne pe ju ge ’nchai’ntuigaibeibe gene hezie sena pa ’ngngam gai mak ta ra semei? Peize sieki gene hela ’mbe hezie sena pechu bangnam gai be lau, zai chipau châng dezai pechu nguagut kai dui lei,” ze acheu bei de lei.

¹⁵Chigum ze sieki gene hela ’mbe hezie sena Miriamle je â bangnam gai ’ndi de lei; zai Miriamle je nguagut kai mak tâne baudime hela ’nzangpat mak lei.

¹⁶Chipau châng dezaine baudime Hazeroth gene zuapat te lei, zai Paran ge hênamchangbe heram ge sieki tew gai de lei.