Read Zeme Naga PERIAK 13 Bible Online

PERIAK 13 - Zeme Naga bible

PERIAK 13

¹Tingwang ne Mosabe je,

²“Kanaanram ’ngkimpie ra ziemmename je lang gai lau, Israelme hang I peibe heram zeu; hezat leine ge peuna ’nsangne gene ’mpeumi je nang lang gai ra lei, penui bau ruage ka’ngguapeu hangkat changbe kau zeu,” ze kacheu de lei.

³Chigum Tingwang ne samdiegaibe luigum ze Paran hênamchangbe bâm gene penui je Mosabe lang gai de lei, penui ’mpeumi leine ze Israel kibau ge besuitewme ramme de lei.

⁴Zai airamme ze penui ji ramme de lei: Reubenbe kiria gene Zakkurbe na Shammu-abe de lei;

⁵Simeonbe kiria gene, Horibe na Shaphatbe de lei;

⁶Judabe kiria gene, Jephunnebe na Kalebbe de lei;

⁷Issakarbe kiria gene, Josepbe na Igalbe de lei;

⁸Ephraimbe kiria gene Nunbe na Hoshiabe de lei;

⁹Benjaminbe kiria gene, Raphube na Paltibe de lei;

¹⁰Zebulunbe kiria gene, Sodibe na Gaddielbe de lei;

¹¹Josepbe kiria gene (chize â Manassebe kiria gene patbe), Susibe na Gaddibe de lei;

¹²Danbe kiria gene Gemallibe na Ammielbe de lei;

¹³Asherbe kiria gene, Mikaelbe na Sethurbe de lei;

¹⁴Naphtalibe kiria gene, Bophsibe na Nahbibe de lei;

¹⁵Gadbe kiria gene, Makibe na Geuelbe de lei.

¹⁶Airamme ze heram ’ngkimpie ra Mosabe ne langgaime ’mpeumi ji ramme de lei. Zai Mosabe ne Nunbe na Hoshiabe je Joshuabe ze ku de lei.

¹⁷Kanaanram ’ngkimpie ra penui je Mosabe ne lang gai ze, penui je “Negeb tat’nzû ze peloaram ’mbe hang zu lau,

¹⁸zai heram ze ’ndaigum mei be pei gai ni lau, zai chige lungme penui ranchi ze bam mei zai penui ran-ga mei be, penui pebau cham mei nune kie mei be,

¹⁹zai penui kelungbe heram yi mei sia mei be, zai penui lungbe namdi ramme ze sieki ramme mei nune namdi bamrehuîdibe ramme mei be,

²⁰zai heram ze lungyi mei nune kelaksia mei be zai chige heching la mei, ga mei be zeu. Kugiereu ze bam lau, zai heram gu hêrachi gêsa pungwang lau,” kacheu de lei. Chigum ze chipau ting ze â grepchî meipat raîlangbe ting de lei.

²¹Chigum penui hang lu Zin ge hênamchangbe heram gene chu ze Hamath gutbe kemui taihia Rehob riâ heram ze ’ngkimpie gai de lei.

²²Negeb ’mbe penui hang ze Hebron ge wang gai de lei; Ahiman, Sheshai, zai Talmai, Anakbe chaname lungbe bâm gezeu. (Ijip ge Zoan bam mak ’ngka kum sena Hebron â henâm tewkua di de lei)

²³Zai Eshkol kâm ge penui wang gai lu chigene grepchîhuâ huâ kat pekeî gene râmkeu de lei, zai hangna chingkang ne râchapua de lei; zai turiechî ramme benai ’mbeuchî ramme du gêsa â penui teiwang de lei.

²⁴Chipau bâm je Eshkol kâm ze ku lei, chipau bâm gene Israelme grepchîhuâ râmkeube ziegeneu.

²⁵Hezie hedai kam dadege heram ’ngkimpie ra tatbe heram gene penui helatwang kadai de lei.

²⁶Zai Paran hênamchangbe bâm, Kades ge Israelme baudime leine zai Mosabe benai Aaronbe dage penui wang de lei; penui benai baudime dage sam pungwang dai ze heram gu hêrachi penui je teilia gai de lei.

²⁷Zai penui ne pechu, “Anui je tat ra nang langgaibe heram ge anui wangchang de lei; chige tungdui benai ’ngkuidui ne lua ze la lei, zai aize chipau heram rachî de lei.

²⁸Sede chi heram ge lungme ze penui ranchi-desang lei, zai namdi ramme ze bambesing-desang zai di-desang lei; zai chi runne makse, Anakbe chaname je chige anui ngau lei.

²⁹Amalekme ne Negeb gu heram ge lung la lei; Hethme, Jebusme, zai Amorme ne peloaram ge lung la lei; zai sungkling ge Jordan geukung ge Kanaanme ne lung la lei,” ze pau gai de lei.

³⁰Kane Mosabe suagene Kalebbe ne baudime je tew’ntaurim gai lu, acheu sa ze, “Anui ne kelua ze tat lu, chige bamkuaraî ne du kei lei; anui â ngam duîzâne de lei,” ze kacheu de lei.

³¹Dadege pe pamtew ze hangme ne acheu sa ze, “Chime je ’nggi ze â anui â hangchi lak lei; anui suadu penui â chi’nteu la de lei,” ze kacheu de lei.

³²Chigum ze penui piegailube heram rasam kesiabe Israelme je penui pau gai de lei, acheu sa ze, “Heram ’ngkimpie ra anui tatruagaibe heram ze â chige lungme gu sutteube heram de lei; zai chige ziemmena leine anui ngaume ze penui kaurayime ’nnia de lei.

³³Zai chige Nephilimme (Nephilim gene wangme Anakbe name) je anui ngau de lei, zai tîngkau ramme luî hang anui runne anui je ngau’nzuâ gai de lei, zai penui ne du anui je chigum ngau gai de lei,” ze pau gai de lei.