Read Zeme Naga PERIAK 14 Bible Online

PERIAK 14 - Zeme Naga bible

PERIAK 14

¹Chidadege â baudime leine ne ’nrungkeleuliachu di de lei; baudime chipau mai muî ge hap lei.

²Zai Israelme leine ne Mosabe benai Aaronbe je tiaktelum chu di de lei; baudime ’nteumena ne penai je acheu sa ze, “Ijipme gu heram lungge anui chai gai di nung laîzai hêu! Makchai hênamchangbe heram gene anui chai gai di nung laîzai hêu!

³’Ndaitew aipau heram lungge Tingwang anui je nguawang gai rei lau, hiazutkie gene kâu gai ra hangge zeu? Anui nâume benai anui name ze chai kam gai gu de lei; Ijipram ’mbe tatdaidibe ze anui hangge yi mak ra mei?” kacheu de lei.

⁴Dadege penui kat-kat je, “Anui je kanguapeu hang kelâng lu Ijipram ’mbe tat dai kei lei,” ze kacheu de lei.

⁵Dadege Israelme baudi wangka’nduime leine suage Mosabe benai Aaronbe penai ju ’ngkumkeu gai di de lei.

⁶Zai Nunbe na Joshuabe benai Jephunnebe na Kalebbe, heram ’ngkimpie ra tatme ruage bambe kena ne penai paî ramme hit ze,

⁷Israelme baudi ’nteumena je, “Heram anui ’ngkim ngaugaibe ze â heram yi-kadesangbe heram lei,

⁸Tingwang ne anui je ’nchâ dizai â aipau heram lungge anui je nguawang gai gu zai anui hang chize pei gai gu lei, tungdui benai ’ngkuidui ne luabe heram zeu.

⁹Tingwang peireige ’nggi ta du lau; zai chi heram gu ziemmena ramme je hing se lau, penui ze anui hetak hang de lei; penui je ka’nggumbe ze penui dagene tei’mbia ’nde lei; zai Tingwang anui dage la lei; penui je hing se lau,” ze kacheu de lei.

¹⁰Kane baudime leine ne tingchu ne penai je tuâ ra sa de lei. Dadege wangka’nduibe-paîki ge Israel kibau leine dage Tingwang ngeudibe liâ gai de lei,

¹¹Zai Tingwang ne Mosabe je, “’Ndaitie ge aime bau ne achu tuâpat kai ze bam ra lau? Ka’nchetbe ramme leine I penui ruage tew gai bei ze ’ndaitie ge penui achu ’nnum’mmi mak bam ra rei lau?

¹²Penui je herarît kechibe ne I ne tewhereu gai gu lei, zai penui je tew’ngga kam ’ndu lei, zai penui suadu hezat kedibe benai peranchibe hang ningchu I ne tew gai gu lei,” ze kacheu de lei.

¹³Kane Mosabe ne Tingwang je, “Chigum dizai â, Ijipme chize seuchang gu de lei, penui ruagene ning ranchi ne aime bau je nang ne nguapat kai bei daseu,

¹⁴zai aipau heram ge lungme je penui salia gu de lei. Penui seutâu de lei, Hei, Tingwang gau, penui ruage nang bambe rasam zeu; Hei Tingwang ningchu â ngau sing lu de lei, zai ning gu kemaukâng penui peireige sap kai bei nang ne penui sua-sua tat ze bam dadegeu, ’nrîmbeting ge kemaukâng sapbeibe ge zai tingmuî ge hemimelei sapchubeibe gezeu.

¹⁵Chuna aime je nang ne hangkat je gum ze tewchat kai dizai â ning ’nsâ keyibe seuchangme heramzatme ramme ne,

¹⁶‘Tingwang â aime bau je heram pa pei ra hetkailube ge nguawangchangchi lak ti ze hênamchangbe heram gene penui je pa ne tewchat kai ’nde lei,’ ze acheu gu de zeî lau.

¹⁷Zai chunage ning dage I kie lei, peize Tingwang gu reziechibe ze di bam lau, nang ne samhat kai ze,

¹⁸‘Tingwang â pe lumpum kelua mak, kehungbe ne pui’nniâmba ze bam, hemui kesiabe benai kemaube lun ze bam, kane pa â mâ-getew-mâ-getew bei sede kemaume je tew’ngga gai mak ta ra mak, penui peume gu hemui-helut ze penui chaname peirei gene rehei kechum medai tattibe ge pie ze bam gu lei,’ ze acheugai’ndibe luigum zeu.

¹⁹Aime bau gu hemui-helut ze lun gai lau, ningchu I kiam lei, ning gu hungka’ntipbe di-kadesangbe bambe luigum ze, zai Ijipram gene chuna riâ chang ze aime je nang ne lunbambe luigum zeu,” ze kacheu de lei.

²⁰Dadege Tingwang ne sa ze, “I ne lun gai ’nde lei, ning sam luigum zeu;

²¹kane pelingsing ze I bam bam la daze, Tingwang ngeudibe ne kedeirei leine ge puigit ze bam gu lei,

²²Ijipram ge benai hênamchangbe heram ge a ngeudibe teiliabe benai a gu ka’nchetbe ramme tewgaibe ngaulume, zai lua kereu riâ achu kedak ra tew gai dai ze, zai a kuâ ’ngkingmakme,

²³penui peume hangge heram I ne pei ra hetkai’ndibe ze mî du ngau ra mak lei; zai achu ngauka’nname leine mî du chize ngau ra mak lei.

²⁴Kane a guâ ka’ngguapeu Kalebbe, pe dage ka’nningbe gechâmbe bam, zai achu sui’ntiprip ze bambe ziegene, pa tatkaibe heram lungge I ne pe chu nguawang gai gu lei, zai pe chaname ne chize ’nram gu lei.

²⁵Chunage Amalekme benai Kanaanme bekâm ramme ge lung ze bam di daze ’nchuamai helat dai ze Kegiebe Sungkling tatbe ’mpuî gene hênamchangbe heram ’mbe zuapat te lau,” ze kacheu de lei.

²⁶Zai Tingwang ne Mosabe benai Aaronbe je acheu sa ze,

²⁷“’Ndaitie ge ai helungriaksiame bau zene a peireige tiaktelum bam ra rei lau? Israelme ne mâ-katelumbe I seu de lei, achu sa’nsia ze katelumbe kuâ zeu.

²⁸Penui je rang gai lau, Tingwang ne acheu sa ze, ‘I bam-bambe ziegene I seube ge ningnui ’ndaikau sa mei be ningnui dage I tew gai gu lei:

²⁹aipau hênamchangbe heram ge ningnui pum chai ze kâukeu gu lei; zai ningnui riak leine seigaibe ge, kum ’ngkai gene pa’nrei kau, achu sa’nsia ze katelumme ze,

³⁰ningnui bam ra I ne tew gai gu lei ze I hetkai’ndibe heram ge hangkatte gut ra mak lei, Nunbe na Joshuabe benai Zephunnehbe na Kalebbe runne gut ku lei.

³¹Kane ningnui name ramme, chi ningnui ne hereichit chang kam du de lei ze kacheume bau je â I ne nguagut ku lei, zai ningnui ne saka’nsiabe heram ze penui chî gu lei.

³²Kane ningnui hangge â ai hênamchangbe heram ge ningnui pum chai ze kâukeu gu lei.

³³Zai kum hedai riâ ai hênamchangbe heram ge ningnui name ramme melireîme chang ze bam gu lei, zai ningnui keneibe ’nggabe ziegene penui ne hereu gu lei, ningnui gu kechaipum ramme hênamchangbe heram ge kâukeu’nzâu gai mak tâneu.

³⁴Ningnui ne heram ’ngkimpiebe ge hezie tuâgai’ndibe riak hezie hedai luigum ze patingkum ge nai’nsangne ningnui gu kemaube put ningnui pung ze bam gu lei, chigumbe luî gene kum hedai tat-hang de lei, zai I ne a lung yitadibe tak ningnui chî gu lei,’ ze acheu zeu.

³⁵I Tingwang ne sa gai de lei; pelingsing ze achu ’nggi ze wang’ndui gai ze bamme ai baudime helungriaksiame leine je I ne tew gu lei: ai hênamchangbe heram gene penui ga’nzâu gai gu lei, zai chige penui chai gai gu lei,” ze kacheu de lei.

³⁶Zai heram ’ngkimpie ra Mosabe ne langgaibeime, helatwang dai lu ze heram rasam kesiabe pauhanggaibe gene pechu sa’nsia ze telum ra baudime leine je tewgaibeime

³⁷heram rasam kesiabe pauhanggaime Tingwang suagene herarît kesiabe gene chai gai di de lei.

³⁸Kane chi ziemmena ramme heram pie ra tatme ruage bamme, Nunbe na Joshuabe benai Jephunnebe na Kalebbe â ring ze bam lei.

³⁹Zai Israelme leine je Mosabe ne aipau sam ramme salia bei de lei, zai baudime happuai bam kam di de lei.

⁴⁰Zai hechua ge penui chuzi lu, heram loa’ntûm ge hang lu, acheu sa ze, “Pie gai ni lau, aige anui la lei, Tingwang ne hatkai’ndibe bâm riâ anui hang gu lei; anui ne hemui gai ’ndi daseu,” ze kacheu de lei.

⁴¹Kane Mosabe ne acheu sa ze, “’Ndaitew ze chuna Tingwang gu samde ningnui ka’ngka lau, chize â ngam ra mak te zeî lau?

⁴²Ningnui teureime masua gene peize ningnui je tewkau gai mak ra hangge hang se lau, ningnui ruage Tingwang â ’ngga daseu.

⁴³Ningnui suage Amalekme benai Kanaanme la de lei, zai ningnui hiazutkie gene kau gu lei; Tingwang je suibe gene ningnui helatdaidibe ziegeneu, ningnui dage Tingwang bam ra mak lei,” ze acheu bei de lei.

⁴⁴Kane mâ du hing ra ga lei ze penui ne ’nninggailube gene sieki gene hingdebung lêuzai Mosabe lêuzai zuapat mak leusedu heram loa’ntûm ramme ge penui tat ti de lei.

⁴⁵Chidadege â Amalekme benai Kanaanme peloaram ge lungme ne wangkeu ze Horma gechangbe riâ penui je duî lu ze penui je guatua ’ndi de lei.