Read Zeme Naga PERIAK 15 Bible Online

PERIAK 15 - Zeme Naga bible

PERIAK 15

¹Tingwang ne Mosabe je acheu sa ze,

²“Israel kibau je acheu salia lau, I ningnui je peigaibe heram ge ningnui lung ra gut dezai,

³samhatkailube tewpui ra lêuzai misuiyibe kela peipatbe hang lêuzai Tingwang dage mâ-perîmyibe hang tew gai ra ning gu kahengîbe hangge lêuzai chige kaurui ruagene mei nune melidung ruagene mei ze lupat lu hemi gene peipatbe gene mei nune rûkambe-râtewbe gene mei nune herâtewbe gene mei ze, Tingwang hangge peipat kai dezai

⁴mi-mige Tingwang dage pe gu mâ-kela peipatpeu je dekuîyibe ephah kereu ge kat ge taudui hin kat gu dau kat kebutkailube mâ-himlei-râtewbe Tingwang dage pei gai ra lei;

⁵zai melipoine rûkambe-râtewbe hang lêuzai herâtewbe hang lêuzai chi melipoine kat-kat ge kesakbe-râtewbe hang chang ze wain hin kat gu dau kat teleu gai ra lei.

⁶Makchai mâ-himlei-râtewbe hang taudui hin kat gu dau chum ge dau kat kebutlube dekuî yibe ephah dau kereu ge dau na gu mâ-himlei-râtewbe meli’nsei kat hangge nang peipat kai ra lei;

⁷zai sakbe-râtewbe hangge wain hin kat gu dau chum ge dau kat nang peipat ra lei, Tingwang hangge hesuiyibe gu mâ-perîmyibe tewgairabe changbe zeu.

⁸Tingwang dage mâ-kadeseube kedibe hang lêuzai tingnatewbe-râtewbe hang lêuzai rûkambe-râtewbe hang mei nune herâtewbe hanggene mei ze nang ne getumseipoine pei ra teleu dezai

⁹hangkat ne taudui hin kat gu pa’mpi kebutkailube dekuîyibe ephah kat gu dau kereu ge dau chum gu mâ-himlei-râtewbe ze getumsei benai peipat kai ra lei;

¹⁰zai kesakbe-râtewbe hangge wain hin kat gu pa’mpi ze Tingwang hangge hesuiyibe gu mâ-perîmyibe hang changbe hemi gene kela peipatbe gum ze nang peipat kai ra lei.

¹¹“Chigum ze getumsei mei nune kemei’nsei mei zai meli’nseipoine ramme mei nune kemei’nseipoine ramme chi kat-kat ge chigum ze tew gai ra lei.

¹²Ningnui kakedâbe ’ndaikie la mei be kat-kat ge chigum ningnui tew kam gai ra lei.

¹³Heramname leine â aigum ze airamme tew ra lei, Tingwang dage hesuiyibe gu mâ-perîmyibe tew gai ra kela peipatbe ge hemi gene kela peipat ra lei.

¹⁴Zai hesang heluîchâmbe kau ningnui dage rêu ze bam mei, nune ningnui rehei luî ge mige â ningnui ruage bam mei dizai â zai Tingwang hangge hesuiyibe gu mâ-perîmyibe changbe hemi gene kela peipat nei dizai â ningnui tew gum ze pa tew ra lei.

¹⁵Baudi ka’nduibe ningnui benai ningnui dage hesang heluîchâmbe kau hangge rawgaibe hingde kat bam ra lei, ningnui gu rehei ’nsangne betingbeta hang rawgai’ndibe hingde changbe zeu; ningnui bam gum ze, hesang-rêugaipeu je Tingwang masuage peize bam ra lei.

¹⁶Ningnui hangge benai ningnui ruage hesang peluîchâmbe kau hangge hingde kat zai rawgai’ndibe hingde kat ra lei,” ze kacheu lei.

¹⁷Tingwang ne Mosabe je rang ze,

¹⁸“Israelme je acheu salia lau, Ningnui je I nguawanggaibe heram ge ningnui gut tezai,

¹⁹zai heram gu hetak ningnui teu dezai, Tingwang dage ningnui kela pei gai ra lei.

²⁰Ningnui gu tenuateube teseu raîlangbe ge kela hang gum ze tingkuliâp ningnui peipat kai ra lei; kechaîpung gene kela peipatbe gum ze, chigum ningnui peipat ra lei.

²¹Ningnui rehei piakeu tânege ningnui gu tenuateube teseu raîlangbe ge kela Tingwang dage ningnui pei gai ra lei.

²²“Kane Tingwang ne Mosabe je saliabe hingde airamme leine ningnui ne tewmau zai sui mak,

²³Mosabe dage Tingwang ne ningchu diegaibe leine, Tingwang hingde peigaibe mai gene seu ze, zai ningnui rehei hangdairabe ge aigum ze bam dizai â

²⁴zai baudime gechîbe gabe gene tew gai dizai â hingdetewgaibe bambe sie luigum ze Tingwang hangge mâ-perîmyibe hang chang ze chipau gu mâ-himlei-râtewbe benai kesakbe-râtewbe ge ’mpam ze baudime ’nteumena ne rûkambe-râtewbe hang getumseipoine kat, zai hemui-râtewbe hang kemei’nsei kat peipat kai ra lei.

²⁵Zai Israelme wangka’nduime leine hang tingkupeu ne kelunbe-râtew gai ra lei, dezai penui je lun gai bu de lei; chize â tewmaugai’ndibe kau daseu, zai Tingwang dage hemi gene kela peipatbe penui ne kela teiwang gai ze, zai penui tewmaube hangge penui gu hemui-râtewbe Tingwang masuage teiwang gai bei daseu.

²⁶Zai hepeî riak luî pelane kemaube tâtewbe ge kebutkaikamdibe ziegene, penui ruage hesang heluîchambe kau benai Israel baudime leine je lun kam gai bu lei.

²⁷“Chimakluisui ze mige ne hemui gai ’ndizai â hemui-râtewbe hangge kemeimeleu kum kat kau pa peipat kai ra lei.

²⁸Zai mige pa ne chi mak ze pa hemui gai ’ndizai â chi tewmaupeu hangge Tingwang suage tingkupeu ne kelunbe-râtewbe ze pe hang kelunbe-râtew gai ra lei; dezai pechu lun gai bu de lei.

²⁹Mige chimezîngbe gene mâ-mâ-tew’nsiagaipeu hang, Israelme ram keloa’mpeu hang, zai hesang heluîchâmme penui dage rêupeu hangge ningnui dage hingde kat bam ra lei.

³⁰Kane ziemmena mige keloa’mpeu lêuzai hesang-rêugaipeu lêuzai pa ne pe kunrachi ze Tingwang je ’nggi dizai â chipau ziemmena je â pebaume ruagene lutua ’nde ra lei.

³¹Tingwang sam ze pa ne ngau’nna ze, zai pe gu hingde tew’nsia’ndibe ziegene chipau ziemmena je â lutua’nchichiak ’nde ra lei; pe gu hemui-helut ze pe put hang de lei,” ze kacheu de lei.

³²Israelme hênamchangbe heram ge ’ntakbambe mai ge mige hechingkeî ramme kuaika’nduibe ngau de lei.

³³Zai pa heching keî ramme kuaibe ngaudaume ne Mosabe benai Aaronbe, zai baudime ’nteumena tailam pechu teiwang gai de lei.

³⁴Zai pechu ze kereîbe bâm ge kaikua gai de lei, pechu ze ’ndaikau tew gai ra mei be teleu’nchigaimakbe ziegeneu.

³⁵Zai Tingwang ne Mosabe dage rang gai ze, “Chi ziemmena je tewchat ’nde ra lei; sieki gene hela ’mbe nguapat lu pechu tingchu ne tuâ ra lei,” kacheu de lei.

³⁶Dadege baudime leine ne pechu ze sieki gene hela ’mbe nguapat lu pechu tingchu ne tuâchat te lei, Tingwang ne Mosabe dage diegaibe luigum zeu.

³⁷Tingwang ne Mosabe je rang gai ze,

³⁸“Israelme bau dage salia lau, zai penui rehei ramme ge penui paî ramme peri kebit ra rang gai lau, zai kelangria ka’nzaibe ze peritûn kai ra rang gai lau;

³⁹dezai ningnui lung benai ningnui mik ne kanchiebe ge tat mak ze Tingwang gu hingde ramme leine chî lu sui ze tewbamrabe hang piebamrabe paîri chize ne chang gu lei.

⁴⁰Chigum ze ningnui ne chibam ra zai a gu hingde ramme leine sui, zai ningnui Rapeu hangge ’nchi ze bam ra de lei.

⁴¹I â Tingwang ningnui Rapeu lei, ningnui Rapeu chang ra ningnui je Ijipram gene nguapatkaipeu: I â Tingwang ningnui Rapeu lei,” ze kacheu de lei.