Read Zeme Naga PERIAK 16 Bible Online

PERIAK 16 - Zeme Naga bible

PERIAK 16

¹Chuna â Izharbe na Korabe, Kohathbe na Lebibe na zai Eliabbe na Dathanbe na benai Abirambe zai Pelethbe na Onbe

²ne ziemmena ramme je ngua lu de lei; zai penui chika’mmime baudime gu kanguame Israelme misonggame haî na ze rengeume je ’nduiwangbe ruagene kelâng lu Mosabe suage penui zuachulia de lei;

³zai penui ne Mosabe benai Aaronbe je ’nggi ze zuawang’ndui lu penai je, “Ningnai ’nzû’mpia de lei! Baudi ka’nduime ’nteumena ze ka’nchime kam lei, penui ’nteumena dage Tingwang â la de lei; ’ndaitew ze Tingwang gu baudi ’nduiwangme peirei gene ningnai runne ningnai je suang gai lau?” ze kacheu de lei.

⁴Mosabe chize seu lu dege, pe ju ’ngkumkeu di de lei;

⁵zai pa ne Korabe benai pe kumme leine je, “Hechua ge Tingwang ne châu ze pe gu mei, zai châu ze ka’nchi mei be teilia gu lei, zai pechu pe dage wang’nna ra tew gai gu lei; pa ne kelânggairapeu je pe dage wang’nna ra pa ne tew gai gu lei.

⁶Aize tew du lau: Korabe benai pe kumme leine ne mâ-perîmyibe ka’ntaube kuak ramme ze tei le lau;

⁷’nchuamai dezai Tingwang masuage hemikuak ramme ge hemi kai lu mâ-perîmyibe moîne chiramme peireige kai lau, zai Tingwang ne kelânggaibe ziemmena zene ka’nchibe chang ra de lei. Lebibe chaname nung gau, ningnui ’nzû’mpia de lei!” ze kacheu de lei.

⁸Zai Mosabe ne Korabe je, “Chuna ’ngking le lau, ningnui Lebibe chaname nung gau:

⁹Israelme Rapeu ne ningnui je Israelme bau wangka’nduibe gene ningnui je pe dage nguawang’nna gai ra Tingwang gu kakellumbe-paîki ge tâ’nggua ra zai baudime je ’nggua ra hangge penui suage sap ze bam ra ningnui je teichâmpatkaibeibe runne ningnui lungneu gerei mei;

¹⁰zai nang benai ning dage ning puiname Lebi chaname bamme je pa ne pe dage nguawang’nna gai bei zeu? Zai ningnui tingku tâ hangge du peu ra rei mei?

¹¹Chidaze ai nang benai ning kumme leine ne ’nduikaheruabe ze â Tingwang je ka’nggibe kau de lei; Aaronbe peireige ningnui ne sa’nsia ze katelumbe ze Aaronbe ze châu bei lau?” ze kacheu de lei.

¹²Dadege Eliabbe name Dathanbe benai Abirambe je ku ra Mosabe ne lang gai de lei, zai penai ne acheu sa ze, “Anai â hang ra mak lei.

¹³Anui peireige nang du ning runne heguang hang suang gai ra hênam gene anui je tewchat kam gai ra zai tungdui benai ’ngkuidui ne luabe heram gene anui je nguapatbeibe zene â ning lungneu gerei mei?

¹⁴Zainedu tungdui benai ’ngkuidui ne luabe heram ge anui je nang nguagut kai mak, helu ramme benai grepchî merie ramme nguaheu ra du anui je nang pei gai me lei. Nang ne aime mik ramme kuitua gai ra tew mei? Anai â hang ra mak lei,” ze kacheu de lei.

¹⁵Dadege Mosabe pe lumpum-desang di ze, Tingwang dage acheu sa ze, “Penui gu kela peipatbe ’nning’ndi gai se lau. Penui dagene hekunmerângne katte I lu me lei, zai penui ruage hangkat je du I ne tewhereu gai me lei,” ze kacheu de lei.

¹⁶Zai Mosabe ne Korabe dage acheu rang ze, “’Nchuamai ge nang benai ning kumme leine, Tingwang masuage nang benai penui zai Aaronbe ze bam ra lei;

¹⁷zai ningnui ’nteumena ne peize pe run-runne gu mâ-perîmyibe rube kuak tei lu zai chige mâ-perîmyibe moîne kai lu ningnui ’nteumena ne Tingwang masuage mâ-perîmyibe rube kuak haî na ze rengeu teiwang gai ra lei; nang benai Aaronbe du pe gu-gu mâ-perîmyibe rube kuak tei lu zeu,” ze kacheu de lei.

¹⁸Chigum ze ’nteumena pe run-runne gu mâ-perîmyibe rube kuak tei de lei, zai chiramme ge penui hemi kai lu zai bepeirei ge mâ-perîmyibe moîne terup kai de lei, zai kakellumbe-paîki kemui ge penui Mosabe benai Aaronbe je nguasap’mpam gai de lei.

¹⁹Chidadege Korabe ne penai je ’nggi ze ka’nduibe-paîki kemui ge baudime je nguawang’ndui gai de lei. Dadege Tingwang ngeudibe ze baudime ’nteumena dage liâ gai de lei.

²⁰Zai Tingwang ne Mosabe benai Aaronbe dage acheu rang gai ze,

²¹“Ai baudime ruagene ningnai runne bamchâm de lau, luakatne penui je I tew’ngga kam ne ra hangge zeu,” ze kacheu de lei.

²²Zai penai ju ’ngkum gai lu, acheu sa ze, “Hei Hera ziemmena keringme leine Rapeu gau, mi hangkat gu hemui ziegene baudime leine je ning lumpum gai ra de mei?” ze kacheu de lei.

²³Dadege Tingwang ne Mosabe dage acheu rang ze,

²⁴“Korabe, Dathanbe, zai Abirambe bam bambe bâm gene ’mbia kam de ra baudime je rang gai lau,” ze kacheu de lei.

²⁵Chigum ze Mosabe zuachu lu Dathanbe benai Abirambe tailam tat ti de lei; zai Israelme gu gechîngme ramme pe chai sui de lei.

²⁶Zai baudime je pa ne, “Aime Ziemmena kesiame ramme gu hetiampaîki ramme gene, ’mbiatat kam de lau, I ne ningnui je kiam lei, zai penui gu mâ de deîtau se lau, makchai â penui gu hemui ramme ge ningnui je du biaktua’mpam nan ta du lei,” ze kacheu de lei.

²⁷Chigum ze Korabe, Dathanbe zai Abirambe bam bambe bâm gene penui ’mbiatat kam di de lei; dadege Dathanbe benai Abirambe penai nâu, penai na ramme, zai penai na kahedeume ramme je ngua lu pat ze penui gu hetiampaîki kemui ge sap kai de lei.

²⁸Zai Mosabe ne acheu rang gai ze, “Aipau tâ ramme leine tew ra Tingwang ne achu lang gai de lei be benai aize a suî’nning gene tewbe mak lei be ai gene ningnui chî gu de lei.

²⁹Ziemmename gu hechit zat gene aime chai lêuzai â, zai ziemmena leine dage dauchibe chit zene penui dage hedau gai lêuzai â Tingwang ne achu langgaibe kau mak lei,

³⁰kane Tingwang ne mâge â tewrechida gai ze, zai kedei ’ngkakpat ze penui gu kebambe leine benai penui je ’nzuagut ze, zai keringbe pum luî gene Kechaiberam ’mbe penui tatkeu lêuzai â aime ziemmena ramme zene Tingwang je mâ-hangge du chak kai mak te lei be ningnui chî gu lei,” ze kacheu de lei.

³¹Zai aipau sam ramme leine pa sa kam gai dege, penui kang gene kedei ’ngkakpedakpat leu de lei;

³²zai kedei mui ’ngngapat ze penui benai penui kibaume zai Korabe kiangna leine benai penui gu merua leine ze ’nzuagut kam ’ndi de lei.

³³Chigum penui benai penui dage bambe leine ’nring Kechaiberam ’mbe wangkeu kam di de lei; zai penui peireige kedei ne gekapchim ’ndi de lei, dadege â baudime zuilung gene penui â ’ngga gai di de lei.

³⁴Dadege penui taige ka’mbutme Israelme ’nrung ze paktat kam di de lei, “Kedei ne anui je ’nzua nan ta du lei!” ze acheu zeu.

³⁵Dadege Tingwang dagene hemi pat ze, chi mâ-perîmyibe kela peipatme ziemmena haî na ze rengeume je rû ’ndi de lei.

³⁶Chigum ze Tingwang ne Mosabe dage rang gai ze,

³⁷“Aaronbe na tingkupeu Eleazarbe je hemi tauben bambe gene mâ-perîmyibe ka’ntaube kuak lupat ne ra rang gai zu lau; zai hemi du kuirarip kai be du lau. Chi mâkuak ramme ze â ka’nchibe de lei,

³⁸penui pum chairabe hing mak ze hemuigai’ndime gu mâ-perîmyibe rube kuak ramme zeu; chidaze herâtewbe-kaira chûmchimrabe hangge chiramme ze bepakpi ramme hangge peize hekipat kai lau, chiramme ze â Tingwang suage penui ne peipatkai’ndibe kau ramme de lei; chipauziegene chiramme ze â ’nchi lei. Chigum ze airamme zene Israelme hangge ka’nchetbe chang ra lei,” ze kacheu de lei.

³⁹Chidadege rû’ndime ne peipatkaibe kangngâgeî ne tewbe mâ-perîmyibe rube kuak ramme tingkupeu Eleazarbe ne tei lu de lei; zai chiramme zene herâtewbe-kaira chûmchimrabe hangge heki gai de lei,

⁴⁰chidezai tingkupeu makbe kau, Aaronbe chaname makbe kau â Tingwang suage mâ-perîmyibe ’ntau ra wang’nna mak ra lei be Israelme je rang’ngkiagaibamrabe hangge zeu, Korabe benai pe kangme gum ze pa chang mak ra hangge zeu, Mosabe dagene Eleazarbe dage Tingwang ne ranggaibe luigum zeu.

⁴¹Kane bechai mai ge Israelme bau leine ne Mosabe benai Aaronbe peireige tiak ze acheu sa ze, “Ningnai ne Tingwang gu ziemmename je tewchat kam ’nde lei,” kacheu de lei.

⁴²Zai Mosabe benai Aaronbe je tingkang ra baudime wang’ndui gai dege, kakellumbe-paîki ’mbia penui ’nreiwang de lei; zai pie le lau, chize kemua ne chûm lu, zai Tingwang ngêudibe liâ gai de lei.

⁴³Zai kakellumbe-paîki suage Mosabe benai Aaronbe wang gai de lei,

⁴⁴zai Tingwang ne Mosabe je,

⁴⁵“Luakat ne penui je I tew’nggachi le ra hangge aime bau ruagene ’mbia de lau,” kacheu de lei. Zai penai ju kei’ngkumkeu gai di de lei.

⁴⁶Zai Mosabe ne Aaronbe je, “Ning gu mâ-perîmyibe ka’ntaube kuak tei le lau, zai herâtewbe-kaira gene hemi lu lu chige hemi kai le lau, zai chige mâ-perîmyibe kai lu, kelua ze baudime wangka’nduime tailam teipat ze penui hangge kelunbe-râtew gai be du lau; Tingwang dagene helumpumbe zuapat te de lei, herarît kechibe putchu de lei,” kacheu de lei.

⁴⁷Chidadege Mosabe ne rangbe luigum ze Aaronbe ne chize tei lu, baudime zuilung ge pakgut ti de lei; zai pie le lau, ziemmename ruage herarît kechibe putchu di de lei; zai pa ne mâ-perîmyibe ’ntau gai lu, ziemmename hangge kelunbe-râtew gai de lei.

⁴⁸Zai kechaime benai keringme kakge pa ne sap kai de lei; dadege herarît ze sau di de lei.

⁴⁹Korabe deu gene chaidime je sâu ze chunage herarît gene chaime ze chang kereu ze medai ze haî sena de lei.

⁵⁰Zai herarît kechibe sau di dege, kakellumbe-paîki kemui ge Mosabe tailam Aaronbe helatwang dai di de lei.