Read Zeme Naga PERIAK 17 Bible Online

PERIAK 17 - Zeme Naga bible

PERIAK 17

¹Tingwang ne Mosabe je,

²“Israelme je rang gai lau, zai penui dagene hetui ramme lu le lau, penui peuna ’nsangne kelei ge hetui kat-kat, penui gu besuitewme leine dagene penui ki peuna riak luigum ze hetui kereu ze kena lu le lau. Ziemmena hangkat-kat ji pe gu-gu hetui ge raw gai lau,

³zai Lebime gu hetui ge Aaronbe ji raw gai lau. Pe kipeuna ’nsangne ge besuitewpeu hangge hetui kat-kat bam ra chang gu daseu.

⁴Chidezai ningnui je I kahedaube bâm, kakellumbe-paîki ge hingdebung suage chiramme nang kai’ndui gai ra lei.

⁵Zai I ne kelânggaibe ziemmena gu hetui ze â pesûne tumpat ku lei; aigum ze Israelme hechuaikiebe ramme ze a dagene sau de ra I ne tew gai gu lei, ningnai peireige penui hechuaikiebe zeu,” ze kacheu de lei.

⁶Mosabe ne Israelme je salia de lei; zai penui gu besuitewme leine ne pechu hetui ramme pei de lei, penui kipeuna ramme riak luigum ze besuitewpeu changme leine hangge hetui kat-kat, hetui kereu ze kena pei de lei; zai penui gu hetui ramme ruage Aaronbe gu hetui bam de lei.

⁷Zai hingdebung bambe paîki ge Tingwang masauge Mosabe ne hetui ramme kai’ndui gai de lei.

⁸Zai bechai mai ge hingdebung bambe paîki lungge Mosabe zuagut te lei; zai pie le lau, Lebibe kibau hangge kaibe Aaronbe gu hetui pesûne tumpat ze pepâ-ngûmne ramme pat ze, zai pepâ papat te lei, zai chigene telauchi ramme ’nchikeu de lei.

⁹Chidadege Mosabe ne Tingwang masuage hetui ramme leine lupat lu Israelme leine dage teipatlia gai de lei; zai penui pie gai de lei, zai ziemmena leine pe gu-gu hetui tei kam gai de lei.

¹⁰Zai Tingwang ne Mosabe je, “Ka’nggime hangge teiliabe chang ra hang kaikua ra hangge hingdebung suage Aaronbe gu hetui kai dai ne lau, dezai a peireige penui hechuaikiebe ramme nang tew’nsauchi le ra, dezai penui chai mak ra hangge zeu,” ze kacheu de lei.

¹¹Chigum ze Mosabe tew gai de lei; Tingwang ne pechu diegaibe luigum ze pa tew de lei.

¹²Zai Israelme ne Mosabe je, “Pie le lau, anui ga gai gu de lei, anui je tew’nsia gai gu de lei, anui ’nteumena je tew’nsia gai gu de lei.

¹³Wangkahechutbe kau leine, Tingwang gu kakellumbe-paîki hiage wangkahechutbe kau leine chai gu de lei. Anui ’nteumena ga kam de ra de mei?” ze kacheu de lei.