Read Zeme Naga PERIAK 18 Bible Online

PERIAK 18 - Zeme Naga bible

PERIAK 18

¹Chidadege Tingwang ne Aaronbe je, “Ka’nchibe bâm deu ge nang benai ning na ’mpeumi ramme, zai ning dage bamme ning kipeuna zene hemui-helutpâu pung ra lei; zai nang tingku tâ tewbe deu ge, nang benai ning dage bamme ning na ’mpeumi ramme ne hemui-helutpâu pung ra lei.

²Zai ning peu zat Lebibe zat, ning puiname je du ning dage ngua lu wang lau, dezai ningchu penui herua lu, hingdebung bambe paîki suage nang benai ning dage bamme ning na ’mpeumi ramme bambe luage ning guâ ’ngguachi le ra hangge zeu.

³Penui ne ningnui guâ ’nggua zai hetiampaîki tâ leine ’nggua ra lei; kane ka’nchibe bâm gu merua ramme taige mei nune herâtewbe-kaira ge mei wang’nna mak ra lei, penui benai nang chai mak ra hangge zeu.

⁴Ning dage penui herua ra lei, zai hetiampaîki tâ ’ngguarabe leine hangge kakellumbe-paîki guâ ’nggua ra lei; zai ningnui taige mî de wang’nna mak ra lei.

⁵Zai ka’nchibe bâm gu tâ-ngeu ramme benai herâtewbe-kaira gu tâ-ngeu ramme ningnui ’nggua ra lei, chidezai Israelme peireige helumpumbe bam ta de ra hangge zeu.

⁶Zai pie le lau, Israelme ruagene ningnui puiname Lebime je I ne lu ’ndi de lei; kakellumbe-paîki guâ ’ngguarabe hangge penui â ningnui hangge kela chang ze Tingwang dage pei gai de lei.

⁷Zai herâtewbe-kaira benai lîmsungbe lungge bambe leine deu hangge nang benai ning dage bamme ningnui name ne ningnui gu tingku tâ-ngeu tew ra lei; zai nang ne ’nggua ra lei. Ning gu tingku tâ-ngeu ze â kela gum I ne pei lei, zai mi-mige du wangka’nnabe kau je â tewchat ’nde ra lei,” ze kacheu de lei.

⁸Chidadege Tingwang ne Aaronbe je, “Zai pie le lau, a dage herâtewbe peipatbe hangge kaibe leine, Israelme gu diepat’nchigaibe kerua zat leine ningchu I ne pei gai de lei; chiramme ze â ning dam hang zai ning na ’mpeumi ramme dage betingbeta peize bamrabe hangge I ne ningchu pei gai de lei.

⁹Aize hemi gene ’nsakkaikuabe, ’nchilangbe merua ramme ze ning hang chang ra de lei; penui gu peipatbe leine, penui gu mâ-himlei peipatbe leine, zai penui gu hemui-râtewbe peipatbe leine zai penui gu kemaube-râtewbe peipatbe leine a dage penui kela peigaibe ze, nang benai ning na ’mpeumi ramme hangge ’nchilangbe chang ra lei.

¹⁰’Nchilangbe bâm ge chize nang teu ra lei; ’mpeumi leine chize teu dui lei; chize ning hangge ka’nchibe lei.

¹¹Aize du ning gu lei, penui gu kela peipatbe, Israelme gu kakezapbe-râtewbe peipatbe ramme leine zeu; chiramme ze nang benai ning dage bamme ning na ’mpeumi ramme benai ’mpuimi ramme hangge peipatbamrabe hang I ne pei gai de lei; ning ki ge ka’nchibe kau ziemmena leine â chize teu dui lei.

¹²Mâ-châ ge yilangbe leine, wain ge benai mâ-himlei ge yilangbe leine, Tingwang dage penui peigaibe mâ-hêrachi ’nchikeube keraîbe ramme leine I ne ning dage pei gai de lei.

¹³Penui ram lungge bambe mâ-hêrachi meipatraibe Tingwang dage penui teiwangbe ramme leine, ning gu chang ra lei; ning ki ge ka’nchibe kau ziemmena leine â chize teu dui lei.

¹⁴Israelram ge diepat’nchigai’ndibe merua leine ning gu chang ra lei.

¹⁵Lungkeuraibe leine, ziemmena mei, nune hekaubena mei, penui ne Tingwang dage peipatkaibe ze ning gu chang ra lei; acheusede ziemmena lungkeuraibe ze â nang ’nri dai ra lei, zai hekaune ’nchimakbe gene lungkeuraibe leine nang ’nri dai ra lei.

¹⁶Zai penui je ka’nribe mî ze (kêu kat chang dezai chiramme nang ’nri ra lei) ka’nchibe bâm gu shekel sie luî gene gepût shekel mengeu hangge nang ria gai ra lei, chize gerah ’ngkai changbe zeu.

¹⁷Kane getum lungkeuraibe mei nune meli lungkeuraibe mei nune kemei lungkeuraibe mei ze â nang ’nri mak ra lei; chiramme â ka’nchibe kau lei. Herâtewbe-kaira peireige penui jai nang kezin gai ra lei, zai hemi gene herâtewbe peipatbe chang ze chiramme châ rû ra lei, Tingwang hangge mâ-perîmyibe chang zeu;

¹⁸kane pe ga ze â kezapkaibe luigum, zai hezet’mbia ’ngkoa ze â ning gu changbe luigum ze penui pumji ramme ze ning gu chang ra lei.

¹⁹Israelme ne Tingwang dage kela peigaibe ka’nchibe-râtewbe peipatbe leine nang benai ning name ’mpeumi benai ’mpuimi leine, ning dage bamme hangge peipatbamrabe hang I ne pei gai de lei; chize nang benai ning haîhikme hangge, Tingwang masuage betingbeta bam-bamrabe gu samria de lei,” ze kacheu de lei.

²⁰Zai Tingwang ne Aaronbe je, “Penui ram lungge ning gu kedei bam mak ra lei; Israelme ruage I ze ning gu hedam benai ning heurâ de lei.

²¹“Lebime hangge â Hera bambe paîki ge penui ka’ngguabe ze, penui tâka’ngguabe hî hangge Israelram ge kereu ge kat kaibe leine I ne pei gai lei.

²²Zai chuna gene seu ze Hera bambe paîki taige Israelme wang’nna ta ra de lei; penui hemui pung ze chai mak ra hangge zeu.

²³Kane Lebime ne Hera bambe paîki gu tâ’ nggua ra lei, zai penui gu hemuipâu â penui ne pung ra lei; rehei leine tâluî aize ningnui gu rawgai’ndibe hingde chang ze bam bam ra lei; zai Israelme ruage penui gu heram bam mak ra lei.

²⁴Israelme gu kereu ge kat, Tingwang dage herâtewbe chang ze penui peipatkaibe ze Lebime je penui heurâ hangge I ne pei gai ’ndi daseu; chipauziegene Israelme ruage penui heurâ bam mak ra lei be penui deu ge I ne rang gai de lei,” kacheu de lei.

²⁵Zai Tingwang ne Mosabe je,

²⁶“Chipau peireige du Lebime suage aigum ze nang salia ra lei, ‘Israelme dagene kereu ge kat ningnui heurâ hangge I ne peigaibe ningnui lu dezai, chigene Tingwang hangge kereu ge kat ngaube gene kereu ge kat nang pei gai ra lei.

²⁷Zai ningnui peipatkaibe ze kechaîpung gu chêu ngaube, zai wain niakbe bâm gu puitingbe gum ze ningnui hangge riam gai be ra lei.

²⁸Chigum ze Israelme dagene ningnui gu kereu ge kat ngaube ramme gene ningnui du Tingwang hangge mâ-kela peibe pei gai ra lei; zai chigene Tingwang gu hedam ze tingkupeu Aaronbe je ningnui pei gai ra lei.

²⁹Ningnui dage kela ramme peigaibe leine yilangbe ruage chige ka’nchibe dam Tingwang dage peigaisingrabe kela zat leine ningnui peipat ra lei,’ acheu zeu.

³⁰Chidaze penui suage nang aigum ze salia ra lei, ‘Chigene yilangbe ningnui peipat kai dezai ka’nsakbe ze kechaîpung gene patbe, zai wain niakbe bâm gene patbe gum ze Lebime hangge riam gai be ra lei;

³¹zai ningnui benai ningnui kibaume, ningnui ne teu nei-neibe bâm gene chize teu dui lei; kakellumbe-paîki ge ningnui ka’ngguabe hangge chize ningnui gu hetoahi daseu.

³²Zai chigene yilangbe ningnui peipatbe luage, chige zene ningnui hemui pung mak ra lei. Zai Israelme gu ka’nchibe merua ramme ningnui tewhebâ mak ra lei, makchai â ningnui chai gu lei’ acheu zeu,” ze kacheu de lei.