Read Zeme Naga PERIAK 19 Bible Online

PERIAK 19 - Zeme Naga bible

PERIAK 19

¹Chunage Tingwang ne Mosabe benai Aaronbe je,

²“Aize Tingwang ne diegaibe hingde gu rawdiakkaibe-hingde de lei: Getum meleu giebe heziâkgabe, pe pum ge bekiêgabe kau, zai mâdau de pe peireige guangkam luakkaimakbe kau, ningnai dage teiwang gai ra Israelme je rang gai lau.

³Zai tingkupeu Eleazarbe dage chize ningnai pei gai ra lei, zai chize sieki hela ’mbe teipat lu Eleazarbe suagene gîchat kai ra lei;

⁴zai tingkupeu Eleazarbe ne pe ba ne pe jai gêsa tei lu, zai hejai gêsa â kakellumbe-paîki sua ’mbe lua sena kezin’nrik kai ra lei.

⁵Zai pa ngaube gene getummeleu ze rû gai be ra lei; pegei, pepumji, zai pe jai, zai pelunglet leine ’mpam ze rû gai ra lei;

⁶zai tingkupeu ne kedarching zai hissop zai tologilangria tei lu getum meleu je rube zuilung ge chiramme tuâ gai ra lei.

⁷Chidezai tingkupeu ne hedui ne pe paîni geta lu pe pum hedui pia ra lei, zai bechâng ge sieki lung ’mbe pa zuawang ra lei; zai hegî riâ chang mak tâne tingkupeu ze ’nchimakbe chang ra lei.

⁸Getummeleu je rupeu ze hedui ne pe paî geta ra zai pe pum heduipia ra lei, zai hegî riâ chang mak tâne ’nchimakbe chang ra lei.

⁹Zai ka’nchibe kau ziemmena zene getummeleu gu merui ramme rui’ndui lu sieki gene hela ’mbe ka’nchibe bâm ge chiramme kai’ndui gai ra lei; zai chiramme ze Israelme bau hangge ’nchimakme hang hemui lutuarabe hangge hedui hang chang ra lei.

¹⁰Zai mige getummeleu gu merui ramme ruika’nduibe kau ze pe paî ramme geta ra lei, zai hegî riâ chang mak tâne ’nchimakbe chang ra lei, zai aize Israelme hang benai penui ruage lunggailêume hesangheluîchâmbe kau hangge rawggai’ndibe hingde chang ze bam bam ra lei.

¹¹“Mi-mige ziemmena kechaipum deîtaube kau â hezie sena ’nchimak bam gu lei;

¹²pakechumbe mai benai pasenabe mai ge hedui ne pe runne pechu tew’nchi ra lei, zai chigum ze ’nchi de ra lei; kane pa ne pakechumbe mai ge benai pasenabe mai ge pe runne pechu tew’nchi maktizai â pa ze ’nchi ra mak lei.

¹³Ziemmena chaidibe kau gu kechaipum mige deîtau lu, zai pe runne pechu tew’nchimakbe kau â Tingwang gu kakellumbe-paîki ze tewkahebâbe chang lei, zai chigumbe kau je â Israel gene tuâpat ’nde ra lei; ’nchimakbe huirabe hedui ze pe peireige ruîgaimakbe ziegene pa ze ’nchimakbe chang gu lei; pa ’nchimakbe pe peireige bam larei lei.

¹⁴“Hetiampaîki gene ziemmena chaibe hangge aize hingde kai de lei: hetiampaîki ge zuagutbe kau leine, zai hetiampaîki ge bambe kau leine, hezie sena ’nchi mak ze bam gu lei.

¹⁵Zai pegum gumnam mak ze, letla ze bambe heli leine â ’nchi mak lei.

¹⁶Hiazutkie ne gîchatkaibeibe kau mei nune kechaipum mei, nune ziemmena ra mei, nune heraw mei je ’nduloa ge bambe deîtaugai-gaibe kau â hezie sena ’nchi mak bam gu lei.

¹⁷’Nchimakbe kau hangge penui ne hemui-râtewbe rûgaibe gu merui ramme tei lu, zai heli ge heduitering dui kai’mpam gai ra lei;

¹⁸chidezai ka’nchibe kau ziemmena ne hissop tei lu, zai chize hedui ge sûm gai lu, zai chize hetiampaîki peireige, heki-kenat ramme leine peireige, zai chige bamme ziemmename peireige, zai kechaime ra mei, nune gîchatkaibe pum mei, nune kechaipum mei, nune heraw mei ze deîtaugaibe kau ziemmena peireige kezin gai ra lei;

¹⁹zai ka’nchibe kau ziemmena ne ’nchimakbe kau peireige pakechumbe mai benai pasenabe mai ge kezin gai ra lei; aigum ze pasenabe mai ge pa ne pechu tew’nchi gai ra lei, zai pa pe paîni ramme geta lu pe runne hedui ne pia ra lei, zai hegî dezai pa ka’nchibe chang gu lei.

²⁰“Kane ziemmena ’nchimakbe kau pe runne pechu tew’nchigaimakbe kau, chigumbe kau je â pebaume wangka’nduibe ruagene tuâpat ’nde ra lei, Tingwang gu ka’nchibe bâm pa ne tewkahebâbe ziegeneu; ’nchimakbe huibe hedui ze pe peireige ruîgaimakbe ziegene pa â ’nchi mak lei.

²¹Zai chize penui hangge rawgai’ndibe bam-bambe hingde chang gu, ’nchimakbe huibe hedui kezin-gaipeu ze du pe paîni ramme geta ra lei; zai ’nchimakbe huibe hedui deîtaube kau ze hegî chang mak tâne ’nchi mak bam gu lei; zai mi-mige du chize deîtaume leine hegî chang ze ’nchimakbe ziemmena chang ra lei.

²²Zai ’nchimakbe ziemmena ne deîtaugaibe zat leine hebâ gai du lei; zai chige deîtaugai-gaime hegî chang mak tâne ’nchi mak ze bam gu lei,” ze kacheu de lei.