Read Zeme Naga PERIAK 20 Bible Online

PERIAK 20 - Zeme Naga bible

PERIAK 20

¹Zai raîlangbe kêu ge Israelme baudime leine Zin ge hênamchangbe heram ge wang gai de lei, zai Kades ge baudime sau’ntak kai de lei; zai chigene Miriamle chai di ze, chige bai gai de lei.

²Chunage chige baudime hang hedui ga di de lei; zai Mosabe benai Aaronbe je ’nggi ze penui wangka’ndui de lei.

³Zai baudime ne Mosabe je geikang ze, acheu sa ze, “Tingwang masuage anui sikiname chaibe luage (ting ge) anui chai di nung laîzai â yi gu de lei!

⁴’Ndaitie ze anui benai anui gu kaurui ramme ze aige anui chaigairabe hangge aipau hênamchangbe heram ge Tingwang gu baudime je ningnai ne nguagut kai lau?

⁵Zai ’ndaitew ze aipau kesiabe bâm ge anui je nguawang gai ra Ijip gene anui zuapat ra ningnai tew gai lau? Aize â chêu mei, nune ’mbeuchî mei, nune grepchî hiâm mei, nune turiechî mei ze bambe bâm mak lei; zai hedui sak kai ra ga lei,” kacheu de lei.

⁶Chidadege Mosabe benai Aaronbe baudime wangka’nduibe gene zuapat lu kakellumbe-paîki kemui ’mbe tat ti de lei, zai penai ju kei’ngkumkeu gai di de lei. Zai Tingwang ngeudibe penai je liâ de lei,

⁷zai Tingwang ne Mosabe je,

⁸“Hetui tei le lau, zai nang benai ning sipeu Aaronbe ne baudime je kûwang’ndui gai lau, zai penui mikngau gene hedui pat ra tingchutum je rang gai lau; chigum ze penui hangge tingchutum gene nang ne hedui lupat kai ra lei; chigum ze baudime benai penui gu kaurui hangge nang ne hedui sak ra pei ra lei,” kacheu de lei.

⁹Zai Tingwang masua gene Mosabe ne hetui tei lu de lei, pa ne pechu diegaibeibe luigum zeu.

¹⁰Zai Mosabe benai Aaronbe ne tingchutum suage baudime je nguawang’ndui gai de lei, zai pa ne penui je, “Chunage seu le lau, ningnui geikumme gau; aipau tingchutum gene ningnui hangge anai ne hedui lupat kai ra mei?” kacheu de lei.

¹¹Dadege Mosabe ne pe ba huachu ze pe gu hetui ne tingchutum ge luana lak kai de lei; zai misongga ze hedui pat ze baudime benai penui gu kaurui ze hedui sak te lei.

¹²Zai Tingwang ne Mosabe benai Aaronbe je rang gai ze, “Israelme mikngau ge ningnai ne achu ’nnum’mmi ze ka’nchibe hangge ’nning’ndigaimakbe ziegene, I ne penui je peigaibe heram ge ai baudime je ningnai nguagut chang ra mak lei,” ze kacheu de lei.

¹³Airamme ze Meriba gu hedui buâk, Israelme ne Tingwang je geikangbe bâm, zai penui ruage pe runne pa ka’nchibe teiliabe bâm de lei.

¹⁴Kades gene Mosabe ne Edom gu heguang dage hepâupaume je lang gai de lei, “Ning sikina’mpeu Israel ne aigum ze rang lei: Anui peireige tewkahereube wangchangbe leine nang chî de lei;

¹⁵anui peume Ijip ’mbe wangkeube benai betinggetie Ijip ge anui ne bambe tak zeu; zai Ijipme ne anui benai anui peume je tewhereu-desang gai de lei;

¹⁶zai Tingwang je anui kû gai bei dege, pa ne anui kuâ ’ngking gai bei de lei, zai tinggîm angelme lang gai ze Ijip gene anui je nguapat kai bei de lei; zai anui â aige Kades ge la de lei, ning gu heramrai hia namdi gezeu.

¹⁷Chunage ning ram gene anui tatpela ra pei lau. Anui â helu benai grepchî merie gene tatpela ra mak, zai dekuaki ge du anui â hedui sak kai ra mak lei; anui â heguang gu Puidi luî-luî tat ku lei, ning ram anui tatpela de mak tâne, anui â hezat’mbia du zai heku’mbia du kiam’nrik kai ra mak lei,” ze kacheu de lei.

¹⁸Kane Edom ne pechu kak ze, “Nang tatpela mak ra lei, I ne ningchu ’nggi ra hiazutkie tei lu zuapat kai mak ra hangge zeu,” ze kacheu de lei.

¹⁹Dadege Israelme ne pechu rang ze, “Puidi gene anui tat-hang gu lei; zai I benai a gu kaurui ne ning gu hedui sak zai â I ne pemî pei gu lei; tatpela sâng tatpela gai ra pei lau,” ze kacheu de lei.

²⁰Kane pa ne, “Nang tatpela mak ra lei,” kacheu de lei. Dadege penui je ’nggi ra ziemmena misongga ngua lu lungchikai ze Edom ze zuapat ti de lei.

²¹Aigum ze Edom ne pe gu heram tatpela ra Israelme je lun mak te lei; dadege pe dagene Israel ze â helattat ti de lei.

²²Zai Kades gene penui tebeîtewtat ti de lei, zai Israelme baudime leine Hor loa ge wang gai de lei.

²³Zai Edomram gu heram’nrai, Hor Loa gene Tingwang ne Mosabe benai Aaronbe je,

²⁴“Aaronbe je â pe gu ziemmename dage nguabai gai ne ra de lei; Israelme je I ne peigaibe heram ge pa gutchang ra mak daseu, Meriba gu heduibuâk ge a gu samde je ningnai ne geikangbe ziegeneu.

²⁵Aaronbe benai pe na Eleazarbe je ngua lu, Hor Loa ge penai je nguahang gai lau;

²⁶zai Aaronbe je pe puâ ramme gâutua lu, pe na Eleazarbe je chiramme luak kai be lau; zai Aaronbe je â pe gu ziemmename dage nguabai gai bei ze, zai chigene pa â chai de ra de lei,” kacheu de lei.

²⁷Tingwang ne diegaibe luigum ze Mosabe tew gai de lei; zai baudime leine ngaube gene Hor Loa ’mbe penui hang di de lei.

²⁸Zai Mosabe ne Aaronbe puâ ramme gâupat lu pe na Eleazarbe dage luak kai bei de lei; zai peloa’ntûm peireige Aaronbe chigene chai gai di de lei. Chidadege peloa gene Mosabe benai Eleazarbe wangkeu de lei.

²⁹Zai Aaronbe chaidibe baudime leine ne ngau lu dege, Israel kibau leine ne Aaronbe je hezie himreu puîhap ze bam de lei.