Read Zeme Naga PERIAK 21 Bible Online

PERIAK 21 - Zeme Naga bible

PERIAK 21

¹Kanaan’mpeu, Arad gu heguang, Negeb ge lungpeu, Israelme Atharim ’mpuî gene wang mui de lei be seu lu dege, pa Israelme je ka’nggi de lei, zai penui hanggesame je â kebang hang nîm ’ndi de lei.

²Dadege Israelme ne Tingwang dage deseu ze, acheu sa de lei, “Nang ne aime bau je a ba ge pei gai sing gu lei bei zai â I ne penui gu namdi ramme tew’nsia kam ’ndu lei,” ze acheu zeu.

³Zai Tingwang ne Israelme kuâ ze ’ngking gai bei de lei, zai Kanaanme je pei bei de lei; zai penui ne penui benai penui gu namdi ramme ze tew’nsia kam gai bei de lei; chidadege chipau bâm ji ze Horma ze ku de lei.

⁴Hor Loa gene Kegiebe Sungkling tatbe ’mpuî tat kai ze Edomme gu heram ze tatguâ ra hangge penui tatchu di de lei; kane ziemmena ramme ze ’mpuîki ge sianeipat ti de lei.

⁵Dadege ziemmena ramme ze Hera benai Mosabe je sa’nsia ze, “’Ndaitew ra ningnai anui je Ijipram gene nguapat kai lau, ai hênamkang ge chai gai ra hangge zeu? Tak benai hedui ga zai anui â ai kesiabe hetak â ’nseî lei,” ze kacheu de lei.

⁶Dadege Tingwang ne henêu kube zat ramme baudime ruage lang gai bei de lei, zai chi ramme zene baudime je ’nsâu bei ze, Israelme baudime misongga chai di de lei.

⁷Dadege baudime ne Mosabe dage wang lu ze, “Anui hemui gai ’ndi de lei, Tingwang benai ningchu sa’nsiagai’ndibe ziegeneu; Tingwang dage kie gai zu lau, henêu ramme anui dagene peize pa ne lutua ’nde ra hangge zeu,” ze kacheu de lei. Chidadege Mosabe ne Israelme hangge kie gai de lei.

⁸Dadege Tingwang ne Mosabe deu ge rang ze, “Henêu kube luî chiam le lau zai hetuizuâ ge da gai lau; zai mi-mige henêu ne ’nsâubeime leine chize pie gai dezai ring gu lei,” ze kacheu de lei.

⁹Dadege Mosabe ne kangngâgeî ne henêu luî chiambe ze hetuizuâ ge da gai de lei. Chidadege â mi-mige henêu ne ’nsâubeime kangngâgeî ne chiambe henêu je pie gai lu ring di de lei.

¹⁰Zai Israelme baudime zuapat ze Oboth ge sieki tew lu bam de lei.

¹¹Zai Oboth gene zuapat dai ze hênamchangbe heram ge Iyeabarim, chize Moab teidabe, tingnaimikpat ’mbia ge bambe ge sieki tew lu bam gai de lei.

¹²Chigene penui zuapat dai ze Zered kâm ge penui sieki tew lu bam de lei.

¹³Chigene zuapat dai ze Amorme gu heramrai riâ changbe hênamchangbe heram ge bambe Arnon gene katlam ’mbia chige penui sieki tew lu bam de lei; Moab benai Amorme kakge Arnon ze Moab gu heramrai dadegeu.

¹⁴Chidadege Tingwang gu Herei leisikuak gene rangbe ze, “Supha ge bambe Waheb, zai Arnon geukâm,

¹⁵zai Ar namdi riâ changbe bekâm ge peloa’ntûm, Moabme gu heramrai riâ chang lei,” kacheu de lei.

¹⁶Zai chigene penui Beer riâ tatka’nduâ de lei; chize Tingwang ne Mosabe je, “Baudime je nguawang’ndui gai lau, dezai I ne penui je hedui pei gu lei,” acheu ranggaibe gu dekuaki de lei.

¹⁷Chidadege Israelme aipau leutew de lei: “Sungchu zu lau, Hei dekuaki gau! chize toa lau!—

¹⁸chi dekuaki heguang na ramme ne kuigaibe, chi ziemmena gu kaningchingbe ne peupatbe, penui samrambe tui benai, langsiutui ramme ne su ze kuigaibe zeu,” ze acheu zeu. Zai hênamchangbe heram gene Mattanah ’mbe penui tatka’nduâ de lei,

¹⁹zai Mattanah gene Nahaliel ’mbe tat zai Nahaliel gene Bamot ’mbe tat,

²⁰zai Bamot gene, Pisga loa’ntûm gene senpieyibe bâm, Moab kuîbak ge bambe bekâm ’mbe tat lei.

²¹Dadege Israelme ne hepâupaume je Amorme gu heguang Sihonbe dage lang gai ze,

²²“I ning gu heram lung gene tatpela ra pei lau; anui helu mei, nune grepchî merie mei je ’nreipie gai ra mak lei; anui dekuaki ge hedui sak kai ra mak lei; anui Heguang gu Puidi gene tat ku lei, ning gu heram tat’ntua mak tâneu,” ze kacheu de lei,

²³kane Sihonbe ne Israelme je pe gu heram tatpela ra lunmeu lei. Pa ne pe gu ziemmena ramme je kûwang’ndui lu ze, Israelme je ’nggi ra hênamchangbe heram ’mbe zuapat ti de lei, zai Jahaz ge wang ze Israelme je ka’nggi de lei.

²⁴Zai Israelme ne pechu hiazutkie ne bichat ’ndi de lei, zai Ammonme gu heram riâ changbe, Arnon gene Jabbok riâ pe gu heram lu ’ndi de lei; Jazer ze Ammonme gu heramrai dadegeu.

²⁵Zai Israelme ne aipau namdi leine lu ’ndi de lei, zai Amorme gu namdi leine ge, Heshbon ge, zai keloa leine ge Israelme bam de lei.

²⁶Heshbon ze â Arnon riâ chang ze tingtie ge Moab gu heguang je ’nggi ze pe ba gene pe ram leine lu’ndipeu, Amorme gu heguang Sihonbe gu namdi dadegeu.

²⁷Chipauziegene ballad heleutewme ne sa ze, “Heshbon ge wang lau, peize chize ’nrangchu de zu lau, peize Sihon namdi ze tew’nsapchu de zu lau.

²⁸Heshbon gene hemi zuapat, Sihon gu namdi gene hemimelei pat daseu. Sihon namdi gene hemimelei pat daseu. Chize ne Moabme gu Ar ze rûmut ’ndi de lei, zai Arnon gu peloa’ntûm kehube ramme zeu.

²⁹Ning duângga gu lei, Hei Moab gau! Nang â ga gai gu de lei, Hei Kemos ge baudi gau! Pa ne pe name je penui ki ram ga ze lung ra zai pe na ’mpuimi ramme je kebang chang ze bam ra tew gai bei de lei, Amor wangpeu, Sihonbe dageneu.

³⁰Chigum ze penui gu reheime ze â Dibon riâ chang ze Heshbon gene ga gai de lei, hemi ze Medeba lapatchang de mak tâne anui ne tew’nsia gai de lei,” ze kacheu de lei.

³¹Chipauluigum ze Israelme Amorme gu heram ge lung lei.

³²Zai Mosabe ne Jarer heram ’ngkimpie ra hangge ziemmena lang gai de lei; zai penui ne chige keloa ramme lu lu de lei, zai Amorme chige bamme je guatua ’ndi de lei.

³³Chidadege Bashanram tatbe ’mpuî ’mbene penui tat’nrik hang di de lei; zai Bashan gu heguang Ogbe pe baume leine je ngua lu Edrei ge penui je ’nggi ra zuapat ti de lei.

³⁴Kane Tingwang ne Mosabe je rang ze, “Pechu hing se lau; I ne pechu ning ba ge pei gai ’nde lei, zai pe gu ziemmena leine benai pe gu heram zeu; zai Heshbon ge bambepeu, Amorme gu heguang Sihonbe je nang tew gum ze pechu du tew gai ra lei,” ze kacheu de lei.

³⁵Chigum ze penui ne pechu, zai pe na ’mpeumi ramme je zai pe gu ziemmena leine je bichat ’ndi de lei, bichat ’nzâuchiak kai ’ndi de lei; zai pe gu heram ze penui ne ’nram ’ndi de lei.