Read Zeme Naga PERIAK 22 Bible Online

PERIAK 22 - Zeme Naga bible

PERIAK 22

¹Chidadege Israelme baudime zuapat lu ze Jeriko ge Jordan gene hela ’mbe Moab kâm ge sieki tew lu bam de lei.

²Zai Zipporbe na Balakbe ze Israelme ne Amorme peireige tâtewgaibe leine ngau di de lei.

³Zai penui ziemmena kie-desangbeibe ziegene Moab ne baudime je hing-desang bam di de lei; Israelme baudime ne Moab je tewhingrim gai bei de lei.

⁴Zai Moab ne Midianme gu gechîngme je rang ze, “Ai baudime zene getumsei ne helu ge timpei tegiteu gum ze anui hiage bambe zat leine ze tegiteu kam ’ndu de lei,” ze kacheu de lei. Chidadege â chipau ting ge Moab gu heguang Zipporbe na Balakbe ne

⁵Amawram ge, ’Nggeuki taige bambe Pethor ge Beorbe na Balaambe je kû ra hepâupaume je lang gai ze, “Pie le lau, Ijip gene baudime wang la de lei; penui dei ze chuangpuiting ’nde lei, zai penui achu teidachi ze la lei.

⁶Chuna wang lau, penui â I suadu penui ranchi daze, aime je deset kai be lau; dezai penui je I duî lu ze heram gene guatua dui lelêu gu lei; nang ne ’nnamgaibeibe kau je â ’nnam gai lei, zai nang ne desetkaibeibe kau je â deset kai bei lei be I chî daseu,” ze kacheu de lei.

⁷Chipau chângge Moab gu gechîngme benai Midian gu gechîngme zuapat te lei, penui ba ge heduaî tewgairabe mî hang tei lu zeu; zai Balaambe dage penui wang lu, Balakbe gu sam kela ze pechu pei gai de lei.

⁸Dadege pa ne penui je, “Nemai tingmuî aige rêu lau, zai I ningnui dage sam teiwang dai gu lei, Tingwang ne achu ’ndaikau rang gai gu mei be zeu,” ze kacheu de lei. Chipau luigum ze Moab gu kanguame besuitewme ze Balaambe dage ’nnai gai de lei.

⁹Dadege Hera ne Balaambe dage wang lu sa ze, “Aime ning dage bamme ze chaume lau?” kacheu de lei.

¹⁰Dadege Balaambe ne Hera ze, “Moab gu heguang Zipporbe na Balakbe ne a dage lang gai ze,

¹¹‘Pie le lau, baudime Ijip gene zuapat ze kedei chuangpuigit ’nde lei; chunage wang ze penui je a hanggene deset kai be lau; penui je ’nggi ze I ne kumtua dui lelêu gu lei’ kacheu de lei,” ze kacheu de lei.

¹²Hera ne Balaambe je rang ze, “Nang penui dage tat mak ra lei; nang penui je deset kai ra mak lei, penui je â ’nnamgai’ndibe kau ramme daseu,” ze kacheu de lei.

¹³Dadege Balaambe hechua ge chu lu Balakbe gu kanguame besuitewme je, “Ningnui ram ’mbe tat te zu lau; Tingwang ne ningnui dage I tat ra lunmeu lei,” ze kacheu de lei.

¹⁴Dadege Moabme gu kanguame besuitewme chu lu Balakbe dage tat lu, acheu sa ze, “Balaambe anui dage zuawang ra ngaurau lei,” ze kacheu de lei.

¹⁵Balakbe ne chime bau suadu kie ze betâudibe kau ramme besuitewme je lang gai kadai de lei.

¹⁶Dadege penui Balaambe dage wang lu, acheu sa ze, “Balakbe, Zipporbe na ne aigum ze rang lei: ‘Peize a dage zuawang ra ning dagene mâ de nam se lau;

¹⁷I ne ning ngeutew’ndi sing gai gu lei, zai nang ne a dage sagai-gaibe leine I tew gu lei; wang ze aime bau je a hanggene deset kai lau’ acheu zeu,” ze kacheu de lei.

¹⁸Kane Balaambe ne kak ze, Balakbe guâ ka’ngguame je, “Balakbe ne pe ki gepût benai gechâk ne puigit ze achu pei bei lêuzaidu, cham zai kie zai tâtew ra hangge Tingwang, a Rapeu gu samde I ne ’ntuâchi lak lei.

¹⁹Nemai tingmuî du aige ’nnai gai ra chunage kiam de lei, dezai Tingwang ne achu ’ndaikau bepeirei rang gai gu mei I chî le ra hangge zeu,” ze kacheu de lei.

²⁰Dadege tingmuîzeu ge Balaambe tailam Hera ne wang lu pechu, “Ziemmena ramme ne ningchu kû ra wang gai lalêuzai â chu lu penui je nguatat chu lau; kane I ne ningchu ranggaibe runne nang tew ra lei,” ze kacheu de lei.

²¹Chigum ze hechua dege Balaambe chu lu pe gu hekunmerângne chingchua lu Moab gu ziemmena baudime ruage nguatat ti de lei.

²²Kane pa tattibe ziegene Hera pe lumpum-desang di de lei; Tingwang gu angel’mpeu ne pechu nam ra hang ’mpuîki ge sapkua de lei. Chunage pa â pe gu hekunmerângne ching ge chua bam de lei, zai pe guâ ka’ngguame hangna pe dage bam de lei.

²³Zai Tingwang gu angel’mpeu pe ba ge hiazutkie tatpatlube tei lu ’mpuîki ge sapkuabe hekunmerângne ne ngau di de lei; dadege hekunmerângne ’mpuîki gene keliktat ze, ’nduloa ’mbe tat kai di de lei; dadege Balaambe ne hekunmerângne je lak te lei, ’mpuîki ’mbe tei’nreiwang gai ra hangge zeu.

²⁴Dadege Tingwang gu angel’mpeu grepchî hiâm kakge ’mpuîki ka’nrumbe ailia-lia dienamtingbe ge sapbam de lei.

²⁵Zai hekunmerângne ze Tingwang gu angel’mpeu je ngau lu dege, ’mpuîmedie ge hengeigetie ze Balaambe pî hengeitemitâu bei de lei; chidadege hekunmerângne je pa ne lak dai bei de lei.

²⁶Dadege Tingwang gu angel’mpeu tatwang ze pega cheibe ’nchui ge sap kai de lei, heku’mbia du hezat’mbia du hebat kai ra gadibe bâm ge sapnam ’ndi de lei.

²⁷Hekunmerângne Tingwang gu angel’mpeu je ngau lu dege jeikau gai di de lei, dadege Balaambe pe lumpum-desang di ze hekunmerângne je pe gu hetui ne lak te lei.

²⁸Dadege Tingwang ne hekunmerângne mui lat kai bei ze hekunmerângne ne Balaambe dage acheu sa de lei, “Ai achu nang ne luachum lakbeibe ze, I ne ningchu ’ndaikau tew bei lau?” kacheu de lei.

²⁹Dadege Balaambe ne hekunmerângne je, “Nang ne achu tâbeibe ziegene lei. A ba ge hiazutkie bam nung laîzai â, I ningchu tewchat ’ndu lei,” ze kacheu de lei.

³⁰Zai hekunmerângne ne Balaambe je, “I ze ning gu hekunmerângne mak semei, pe peireige ning ring ting, zai nemai riâ chang ze chua bambe zeu? Tingtie ge aigum ze ning peireige I tew-tew mei?” ze kacheu de lei. Dadege pa ne kak ze. “Tew me lei,” acheu bei de lei.

³¹Dadege Tingwang ne Balaambe mik lat kai bei ze, Tingwang gu angel’mpeu, pe ba ge hiazutkie tatpatlube tei lu ze ’mpuîki ge sapkua bambe pa ngau di de lei; dadege pe peî kei’ngkumkeu gai lu pe ju kedei ge tuaktit kai di de lei.

³²Dadege Tingwang gu angel’mpeu ne pechu, “’Ndaitew ze nang ne ning gu hekunmerângne je luachum lak kai lau? Pie le lau, ningchu tewnam ra I wang lei, nang tatbe ’mpuî ze â a masuage tâutaluisuidibe ziegeneu;

³³zai hekunmerângne ne achu ngau lu ze a suagene luachum tatkelik ze bam de lei. Hekunmerângne ne a dagene tatkelik mak laîzai â pelingsing ze chuna hî sing ge ningchu â I ne tewchat kai lu ze hekunmerângne je ’nzuak kai bu de lei,” ze kacheu de lei.

³⁴Dadege Balaambe ne Tingwang gu angel’mpeu je, “Nang ne ’mpuîki achu sapnam lei be I ne chimakbe ziegene I ne hemui gai ’ndi de lei. Chidaze chunage aize ning mikngau ge kesiabe chang lei dizai â I helattat dai gu de lei,” ze kacheu de lei.

³⁵Zai Tingwang gu angel’mpeu ne Balaambe je, “Ziemmename ramme dage nguatatchu lau; kane ning suage I ranggaibe sam runne nang sa ra lei,” ze kacheu de lei. Chidadege Balaambe Balakbe gu ziemmena betâudime je ngua lu tat’nduâtat ti de lei.

³⁶Balaambe ne Balakbe wang la de lei be seu lu dege, Armon ne heramrai hang kaibe, heramrai sing ge Moab namdi bambe gene pechu hedautâu ra pa zuapat ti de lei.

³⁷Dadege Balakbe ne Balaambe je, “Ningchu kû ra I lang gai mak semei? ’Ndaitew ze nang a dage wang mak lau? I ningchu hengêu peichi lak ra mei?” ze kacheu de lei.

³⁸Balaambe ne Balakbe je kak ze, “Ni, I ning dage wang la de zeî lau! Chuna I ne sam sa gai ra rezie bam gu mei? Hera ne a mui ge sam kaibe ze I sa gai sing ra de lei,” ze kacheu de lei.

³⁹Chidadege â Balaambe Balakbe benai tat ti de lei, zai Kiriath-huzoth ge penai wang gai de lei.

⁴⁰Dadege Balakbe ne getumsei ramme benai meli ne herâtew gai de lei, zai Balaambe benai pe dage bamme heguangsinme je du pei de lei.

⁴¹Zai chipau mai ge Balakbe ne Balaambe je ngua lu pechu Bamotbaal ’mbe nguahang de lei; zai chigene hechutlangbe ziemmename je pa ngau de lei.