Read Zeme Naga PERIAK 23 Bible Online

PERIAK 23 - Zeme Naga bible

PERIAK 23

¹Dadege Balaambe ne Balakbe je, “Aige herâtewbe-kaira sena a hangge teleu gai lau, zai getumsei sena zai kemei’nsei sena a hang pei lau,” kacheu de lei.

²Balaambe ne rangbe luigum ze Balakbe tew de lei; zai Balakbe benai Balaambe herâtewbe-kaira ’nsangne ge getumsei benai kemei’nsei peipat kai de lei.

³Dadege Balaambe ne Balakbe je, “Ning gu rûka’nggabe-râtewbe taige sapbam lau, I tat tu lei; Hera achu hedau ra wang leu gu mei zeu, zai pa ne achu teilia-liabe I ningchu rang gu lei,” kacheu de lei. Dadege peloa ’mbe pa hang di de lei.

⁴Zai chige Balaambe je Hera kahedau de lei; zai Balaambe ne pechu, “I herâtewbe-kaira sena teleu gai lu de lei, zai chi herâtewbe-kaira ’nsangne ge getumsei zai kemei’nsei peipat kai ’nde lei,” kacheu de lei.

⁵Dadege Tingwang ne Balaambe mui ge sam kai ze, acheu sa ze, “Balakbe dage helattat ze aigum ze ranglia ra lei,” ze kacheu de lei.

⁶Zai pa helattat dai di de lei, zai ni, pa benai Moabme gu besuitewme bau pe gu rûkambe-râtewbe bâm hiage sapkua laleu de lei.

⁷Dadege Balaambe, pe samrabe sachu ze, “Aram gene, tingbia ’mbia kedeiloa ramme bambe gene, zai Moabme gu heguang Balakbe ne achu nguawang de lei: ‘Wang lau, Jakobbe je a hangge deset kai lau, zai wang lau, Israel je sa’nsia gai lau!’

⁸’Ndaigum ze Hera ne desetkaimakme je I ne desetkaichi ra lau? ’Ndaigum ze Tingwang ne sa’nsiagaimakme je I ne sa’nsiagaichi le ra lau?

⁹Kedeiloa kehube ’ntûm ramme gene pechu I ngau de lei, peloa ramme gene pechu I pie de lei; ni, baudime penui runne bam lei, zai heramzatme ramme ruage penui runne penui je riam gai mak lei!

¹⁰Jakobbe gu kedeimoîne ze châu seichi dui lau, nune Israel gu dau kat ze châu seichi dui lau? Ziemmena kapelingme chit ne peize I chai lau. Zai a ting nâlangbe ze pe ting gum ze peize chang de lau!” ze kacheu de lei.

¹¹Dadege Balakbe ne Balaambe je, “Nang ne a hangge ’ndaikau tew gai rei lau? A teureime je deset kai ra ningchu I kangua da, teiwang da zai pie le lau, nang mâ de tew gai mak, kane penui je ’nnam gai lei,” ze kacheu de lei.

¹²Dadege pa ne kak ze, “Tingwang ne a mui ge kaibe ze sa ra I ’ntîng mak ta ra semei?” kacheu de lei.

¹³Dadege Balaambe ne pechu, “Nang penui je ngauduibe bâm kêdabe bâm ’mbe anai tat dai kei lei; penui ruage bam’nnalangme je runne nang ngau gu lei, zai penui ’nteumena je â nang ngau ra mak lei; chidaze penui je chigene a hang deset kai be lau,” kacheu de lei.

¹⁴Dadege Pisga loa’ntûm ge Zophim gu peningkâm ’mbe pa ne pechu ngua gai de lei, zai herâtewbe-kaira sena teleu gai de lei, zai chi herâtewbe-kaira kat-kat ge getumsei kat zai kemei’nsei kat peipat kai de lei.

¹⁵Balaambe ne Balakbe je, “Aige ning gu rûkambe-râtewbe bâm hiage sapkua lau, wîge Hera je I kahedaube luage zeu,” kacheu de lei.

¹⁶Dadege Balaambe je Tingwang hedau lu, zai pe mui ge sam kai lu acheu sa ze, “Balakbe tailam helattat dai lau, zai nang acheu ze sa ra lei,” ze kacheu de lei.

¹⁷Dadege pa pe dage wang de lei, zai, ni, pa â pe gu rûkambe-râtewbe taige sapkua bam de lei, zai Moab gu besuitewme ramme pe dage bam lei. Dadege Balakbe ne pechu, “Tingwang ne ’ndaikau sa gai lau?” kacheu de lei.

¹⁸Balaambe ne pe sam sachu ze, “Balakbai, chu lau, zai ’ngking le lau; a kuâ ’ngking le lau, Hei Zipporbe na gau:

¹⁹Hera â ziemmena mak lei, pa ne karasa sa ra hangge zeu, zai pa â ziemmena na mak lei, pe lung heli ra hangge zeu. Pa ne sa gai ’ndizai â chize pa tew mak ta ra semei? Zai pa riagailube tewpui mak semei?

²⁰Pie le lau, ’nnam gai ra samde kat peibe I ngau de lei: pa ne ’nnam gai bei de lei, zai I ne chize teikelichi lak lei.

²¹Jakob ge pausiabe pa ne pie gai mak lei; zai Israel ge du kahereube pa ne ngau gai mak lei. Tingwang penui Rapeu â penui dage bam lei, zai heguang ka’nrungbe ze â penui ruage bam lei;

²²Hera ne penui je Ijipram gene nguapat kai lei; penui dage hênam tumsei kie ramme gumbe bam lei.

²³Chige Jakob peireige kahekabe tewbe ga lei, Israel peireige heduaîtewbe ga lei; chunage Jakob benai Israel je damchu gai gu de lei, ‘Hera ne ’ndaikau tew gai bei se lau!’ ze acheu zeu.

²⁴Pie le lau ni, baudime! Chi duiluipui gum ze zuachu la de lei, zai duilui gum ze zualepchu la de lei; pe gu hetak keduaiteu kam gai mak tâne zai tewchatkailube gu hejai sak kam mak tâne pa â jeikau mak bam lei,” kacheu de lei.

²⁵Dadege Balakbe ne Balaambe je, “Penui je deset kai se lau, zai ’nnam de ’nnam gai se lau,” kacheu de lei.

²⁶Kane Balaambe ne Balakbe je kak ze, “I ning suage rang mak semei, ‘Tingwang ne achu rangbe leine I tew sing gu lei be zeu?’ ze kacheube zeu,” ze kacheu de lei.

²⁷Zai Balakbe ne Balaambe je, “Chunage wang lau, I ne ningchu kêdabe bâm ’mbe nguatat kai dai gu lei; chigene nang ne penui je a hangge desetkairabe ze Hera suitewka’mmibe chang leu gu lei,” ze kacheu de lei.

²⁸Chigum ze Balakbe ne Balaambe je ngua lu tingkangram senpieyibe bâm, Peor loa’ntûm ’mbe nguahang gai de lei.

²⁹Dadege Balaambe ne Balakbe je, “A hangge aige Herâtewbe-kaira sena teleu gai lau, zai a hangge aige getumsei sena zai meli’nsei sena peipat kai lau,” ze kacheu de lei.

³⁰Dadege Balaambe ne rangbe luigum ze Balakbe tew gai de lei, zai getumsei kat zai meli’nsei kat ze herâtewbe-kaira ’nsangne ge peipat kai de lei.