Read Zeme Naga PERIAK 24 Bible Online

PERIAK 24 - Zeme Naga bible

PERIAK 24

¹Israelme je ’nnam gai ra Tingwang ne pa neibe Balaambe ngau lu dege, tingtie ge gum ze hedachak ra pa tat mak tai de lei, kane hênamchangbe heram ’mbe pe ju ’nrik kai di lei.

²Zai Balaambe pe ma ’ngngangchu dege, Israelme ze penui kibau-bautew ze sieki tew lu bambe ngau de lei. Zai Hera gu Herui pe peireige wang gai de lei,

³dadege pa sachu ze, “Beorbe na Balaambe gu keliâbe sam, pe mik latkaibeipeu gu keliâbe sam,

⁴Hera dilangpeu gu keliâbe wangkeube ngaupeu, Hera gu sam ramme seupeu, kâukeu-tuaktit kai lu kane pe mik raklube luî gene acheu sa ze:

⁵Hei, Jakobbe gau, ning gu hetiamki ramme ngauyi-desang de lei, Hei Israel gau, ning gu sieki tew lu bambe ramme ngauyi-desang de lei!

⁶Peningkâm hiamtat’ntiedibe helî gum, ’nggeuki hiage kerie ramme bambe helî gum, Tingwang ne taugaibe hingbangbuâ yibe ramme helî gum, hedui bâm ramme hiage kedarbang ramme bambe helî gum de lei.

⁷Pe gu heduibung ramme gene hedui luapat ku lei, zai pe gu mâ-himlei ramme hedui misonggabe bâm ge bam gu lei. Pe gu heguang ze Agagbe gu suadu hu’nteu gu lei, zai pe gu heguangram je teichu’ngngu gai bu lei.

⁸Hera ne pechu Ijip gene nguapat kai lei; hênam tumsei kie ramme gumbe pe dage bam lei, pa ne pechu ka’nggibe heramzat ramme je teu kam ’ndu lei, zai penui ra ramme tewbetpriu gai bu lei, zai pe gu bai’mpitu ramme zene penui je kappela gai gu lei.

⁹Pa â duilui gum ze jei bam lei, zai duiluipui gum zeu; châu ne pechu tew’ngkiachu ra lau? Ningchu ’nnamgaibe kau leine yi de lei, zai ningchu desetkaibe kau leine je peize deset kai be lau,” ze kacheu de lei.

¹⁰Dadege Balakbe ze Balaambe peireige pe râta-desang di de lei, zai pe ba kena kagepei de lei; zai Balakbe ne Balaambe je, “I ne ningchu a teureime je deset kai ra kû da zai pie le lau, nang ne aize luachum penui je ’nnam gai bei zeu.

¹¹Chidaze ning bâm ’mbe tatkelua zu lau; ‘I ne ningchu ning ngeutew gai sing gu lei’ ze I acheu gai da, kane ning ngeutewgairabe gene Tingwang ne ning hangge tewnam gai ’ndi de lei,” ze kacheu de lei.

¹²Dadege Balaambe ne Balakbe je kak ze, “A dage nang ne langgaime ning gu hepâupaume je I ranglia mak ti lau,

¹³‘Balakbe ne achu, pe ki gepût benai gechâk puigit ze pei bei lêuzai du yi zai sia zai a suî’nning tew ra hangge Tingwang gu sam I ’ntuâchi lak lei; Tingwang ne sa-sabe ze I sa gu lei’ ze kacheube zeu?” ze kacheu de lei.

¹⁴“Zai chunage pie le lau, a bâume dage I tat ku de lei; kei lei, bechâng dezai ai baudime ne ning gu baudime je ’ndaikau tak tew gai gu mei be ze I ne ningchu chî ra pei gu lei,” ze kacheu de lei.

¹⁵Dadege pe samrabe sachu ze, “Beorbe na Balaambe gu keliâbe sam, pe mik latkaibeipeu gu keliâbe sam,

¹⁶Hera gu sam ramme seupeu, zai Hera Hulangpeu gu mâ-gechîbe chîbepeu, Hera Dilangpeu gu mâ-keliâbe ngaupeu, kane pe mik rak lu ze:

¹⁷I pechu ngau lei, kane chuna â mak lei; I pechu pie lei, kane kenahia gene mak lei: Jakob gene hegi kat zuapat ku lei, zai Israel gene heguang samrambe langsiutui zuachu gu lei; chize ne Moabme telie tewhitruai gai gu, zai Sethbe na ’mpeumi ramme leine je tew’nsia kam gai gu lei.

¹⁸Edom je duî ’ndu, pe teureime Seir je du duî ’ndu lei, Israelme duîtat ze bambe luage zeu.

¹⁹Jakobbe dage kaheguangbe samrambe tâ tewtat ze bam gu lei, zai namdi ramme ge chai’nsakpatme je, tew’ngga kam ’ndu lei!” ze kacheu de lei.

²⁰Dadege pa Amalek je pie gai de lei, zai pe samrabe ze sachu ze, “Amalek zene heramzatme ruage raîlangbe de lei, kane nâlangbe ge â pa â sia kam gai gu lei,” ze kacheu de lei.

²¹Zai pa Ken’mpeu je pie gai de lei, zai pe samrabe sachu ze, “Besingsiakbe bâm ze nang kelungbe bâm de lei, zai ning chip â tingchutum ge pua gai la de lei;

²²acheusede Kain je â tew’ngga ’ndu lei. Asshur ne ’ndaitie riâ ningchu kebang hang nîmtat ra lau?” ze kacheu de lei.

²³Dadege pa pe samrabe sachu ze, “Hei, Hera ne aize tew gai dezai châu ring ra lau?

²⁴Kane dui’nneikuak ramme Kittim ’mbene wang ze, Asshur benai Eber je tewhereu gu lei; zai pa du sia kam gai gu lei,” ze kacheu de lei.

²⁵Dadege Balaambe zuachu lu, pe bâm ’mbe tat dai di de lei; zai Balakbe du pe gu ’mpuî ra ’mbe tat ti de lei.