Read Zeme Naga PERIAK 25 Bible Online

PERIAK 25 - Zeme Naga bible

PERIAK 25

¹Israelme Shittim ge bambe ting ge ziemmena ramme ne Moabme ’mpuimi ramme peireige hangleutew chu di de lei.

²Aime zene penui gu hera ramme dage herâtewbe ramme ge baudime je wang ra kakelau de lei, zai baudime wang teu de lei, zai penui râ ramme dage keikeu gai de lei.

³Chigum ze Israelme penui runne Peor gu Baal-râ je kellum ra chui gai ze bam de lei. Zai Tingwang ne Israelme peireige pe râta-desang di de lei;

⁴zai Tingwang ne Mosabe je, “Israelme ruage besuitewme leine je nîm lu penui je Tingwang masuage naichiê gene kakchat kam ne lau, chidezai Tingwang lumpum kedibe Israelme dagene ’mbiatat te ra hangge zeu,” ze kacheu de lei.

⁵Dadege Mosabe benai Israelme ne samramme dage sa ze, “Peor gu Baal je kellum ra penui run-runne penui je chui gai ze bamme je ningnui ’nteumena ne mi gu-gu ziemmena je bichat ne lau,” ze kacheu de lei.

⁶Zai pie le lau, kakellumbe-paîki kemui hiage penui hapriau bambe luage Israelme ruage hangkat wang lu Israelme baudime ’nteumena benai Mosabe kengaube gene Midian’mpui je pe ki lam nguawang gai de lei.

⁷Eleazerbe na Phineha be tingkupeu Aaronbe chapeu ne chize ngau lu dege, pa zuachu lu baudime je sâu gai nan ze, pe gu hengeu ’nzap lu ze,

⁸helungbe sîam ’mbe Israel’mpeu chai suigut ze penai hangna je huî gai bei de lei, Israel’mpeu benai chi ’mpuimi je penai pum huî’nzutpela gai bei de lei. Aigene Israelme je tew’nsia ra herarît wangrabe ze sau gai dai di de lei.

⁹Acheuleusede chi ziemmena herarît gene chaidime chang ’ngkai ze medai lei.

¹⁰Dadege Tingwang ne Mosabe je,

¹¹“Eleazerbe na Phineha be, tingkupeu Aaronbe chapeu ne a lumpum Israelme dagene tei’mbia dai ’nde lei, chigene penui ruage I ne ’nningtegei ze ngausiabe ge pa du ’nningtegei ze ngausia’mpam gai de lei, chidezai I ’nningtegei ze ngausiabe gene Israelme baudime je tew’ngga kam gai mak ta ra hangge zeu.

¹²Chidadege ‘Pie le lau, I pechu a gu desieyibe gu samhatkaibe pei gai lei;

¹³zai chize pe hang zai pe chaige reheipiakeume hang chang gu lei, tingku tâ puabamrabe gu samhatkaibe zeu, pe Rapeu deu hanggene pa ne ’nningtegei ze ngausiagaibeibe benai Israelme baudime hangge kelunbe-râtewgaibeibe ziegeneu’ ze kacheube sam ze salia lau,” ze kacheu de lei.

¹⁴Israel’mpeu Midian’mpui dage tewchat’mpamgaipeu ji â Simeonbe kiduîme ruage besuitewpeu Salube na Zimribe de lei.

¹⁵Zai Midian’mpui ji â Zurbe na Kozbile lei, pe peu â Midian kiria ge gechîngme ruage besuitewpeu lei.

¹⁶Dadege Tingwang ne Mosabe je,

¹⁷“Midianme je tewhereu gai be lau, zai penui je tewchat kam ne lau;

¹⁸Peor tûdeu benai penui kiduî’mpui, Midian gu heguang na heleu’mpui Kozbile, herarît wangbe mai ge Peor ge kakeleube patbe gene tewchatkai’ndipui tûdeu gene ningnui je tew’nsiarabe tak hang tew ze penui lungriaksiabe gene penui ne ningnui je tewhereu gai bei daseu,” ze kacheu de lei.