Read Zeme Naga PERIAK 27 Bible Online

PERIAK 27 - Zeme Naga bible

PERIAK 27

¹Chidadege Josepbe na Manassebe kiria gene Manassebe na Makirbe na Gileadbe na Hepherbe na Zelophehadbe na heleume ramme zuawang’nna gai de lei. Pe na ’mpuimi ji ramme ze â: Mahlale, Noahle, Hoglale, Milkale zai Tirzale lei.

²Dadege penui kakellumbe-paîki kemui ge Mosabe suage, zai tingkupeu Eleazarbe benai pebaume suage, besuitewme benai baudime ’nteumena suage sap lu sa ze,

³“Hênamchangberam ge anui peu â chai gai di de lei; pa â Korabe kiangna Tingwang je ’nggi ra wangka’nduime bau ruage bam mak lei, kane pe gu hemui ziegene chai di lei; zai pe na ’mpeumi ga lei.

⁴’Ndaitew ze pa ne pe na gabeibe ziegene penui peu ji pe kiduîme ruagene lutua ra lau? Anui peu ’mpampatme ruage anui je du heram kat pei lau,” ze kacheu de lei.

⁵Mosabe ne penui tûdeu ze Tingwang suage teiwang gai de lei.

⁶Dadege Tingwang ne Mosabe je rang ze,

⁷“Zelophehadbe na ’mpuimi ramme â ’nzei de lei; penui je pe heurâ ze penui peu ’mpampatme ruage penui je nang heram timchak kai sing ra lei, zai penui peu gu kedei ze penui hangge du ’nzipat kai ra tew gai ra lei.

⁸Zai nang Israelme ruage salia ra lei, ‘Mige pe na ’mpeumi ga ze chai dizai â pe na ’mpuimi je pe gu heram ze ningnui pei ra lei.

⁹Zai pa ne pe na ’mpuimi ga dizai â pe gu heram ze pa ’mpampatme ’mpeumi ramme je pei gai ra lei.

¹⁰Zai pa ne pa ’mpampatme ’mpeumi ga dizai â pe gu heram ze pe peu ’mpampatme ’mpeumi ramme je ningnui pei gai ra lei.

¹¹Zai pe peu ne ’mpeumi pa ’mpampatme ga dizai â pe kiria kahechutme je pe gu heram ze ningnui pei gai ra lei, zai pa ne chize nguaheu ra lei. Zai aize Israelme bau hangge hingde tewgaibe benai rawdiakkaibe hingde chang ra lei, Tingwang ne Mosabe dage samdiegaibe luigum zeu,’ acheu zeu,” ze kacheu de lei.

¹²Tingwang ne Mosabe je rang ze, “Ai Abarim loa ’mbe hang zu lau, zai Israelme hangge heram I ne peigaibe ze ngau le lau.

¹³Zai chize nang ngau lu dezai, nang du ning baume dage zuapat tu de lei; ning sipeu Aaronbe zuatattibe gum zeu,

¹⁴Zin ge hênamchangbe heram ge baudime ne geikum ze bambe ting ge penui masuage hedui bambe ge achu ka’nchibe hang ’nning’ndi gai ra ningnai ne a sam peireige ’nggibeibe ziegeneu,” ze kacheu de lei. (Aipau dui ramme ze â Zin ge hênamchangbe heram ge Kades gu Meriba gu hedui ramme de lei).

¹⁵Mosabe ne Tingwang je,

¹⁶“Peize keringme leine Rapeu, Tingwang ne baudime peireige hangkat je sum gai lau,

¹⁷penui suage gut zai penui suage pat ze bamrabepeu, penui je nguagut nguapat ze bamrapeu hangge zeu; chidezai Tingwang gu baudime ze meli ramme penui gu melireîpeu gabe gum ze bammakrabe hangge zeu,” ze kacheu de lei.

¹⁸Dadege Tingwang ne Mosabe je, “Nunbe na Joshuabe, herui pe dage bambepeu je ngua lu ze pe peireige ning ba die gai lau;

¹⁹tingkupeu Eleazarbe benai baudime ’nteumena suage pechu tei’nsap kai lau, zai penui mikngau gene pechu tâtew ra nang rezie peipat kai ra lei.

²⁰Ning gu rezie gêsa â pechu nang pei gai ra lei, dezai Israelme baudime leine ne pe kuâ pheu ra hangge zeu.

²¹Zai tingkupeu Eleazarbe Urim gu samrambe ne Tingwang suage pechu mâ ’mmêtrapeu suage pa sap kai ra lei; pe sam gene penui pat ze gut ra lei, pa benai Israelme bau, baudime ’nteumena zeu,” ze kacheu de lei.

²²Dadege Tingwang ne pechu ranggaibe luigum ze Mosabe tew gai de lei; pa ne Joshuabe je ngua lu tingkupeu Eleazarbe benai baudime ’nteumena suage tei’nsap kai de lei,

²³zai pe ba kena pe peireige die gai ze, Tingwang ne Mosabe dagene ranggaibe luigum ze pechu tâtew ra rezie pei gai de lei.