Read Zeme Naga PERIAK 28 Bible Online

PERIAK 28 - Zeme Naga bible

PERIAK 28

¹Tingwang ne Mosabe je,

²“Israelme bau je samdie gai ze, acheu rang gai lau, ‘A gu kela peipatbe ramme, a gu hetak hemi gene peirabe ramme, perîmyibe, ningnui ne beting-pehi-hî ge achu peirabe ze ningnui ’nning’mmi ra lei,’ acheu zeu.

³Zai penui je nang salia ra lei, aize Tingwang dage ningnui hemi gene peipatbe kela lei: meli’nseipoine heziâkgabe kena kum kat kau, nai’nsangne sau mak ze peipat kai bam ra lei.

⁴Hechua ge meli’nseipoine kat, zai hegî ge meli’nseipoine kat nang peipat ra lei;

⁵zai dekuî yibe ephah kereu ge kat mâ-himlei-râtewbe hang peipat kai ra lei, taudui niakpatlube hin kat gu dau kat kebutlube zeu.

⁶Aize sau mak tewbambe zat rûkambe-râtewbe Sinai Loa gene tew’ntipkaibe mâ-perîmyibe Tingwang dage hemi gene peigaibe ze de lei.

⁷Chipau gu sakbe-râtewbe ze meli’nseipoine kat-kat ge hin kat gu dau kat ra lei; pebâm ka’nchibe ge kesakbe-râtewbe peranchibe ze Tingwang hangge nang ruî gai ra lei.

⁸Zai melipoine kêdabe kat ze hegî ge nang peipat ra lei; hechua ge mâ-himlei-râtewbe peipatbe luigum, zai sakbe-râtewbe luigum ze hemi gene chize nang peipat ra lei, Tingwang dage mâ-perîmyibe zeu.

⁹“’Ntakbambe mai ge melipoine heziâkgabe kena kum kat kau zai dekuî yibe taudui kebutlube mâ-himlei-râtewbe hangge ephah kat ge kereu ze kena sakbe-râtewbe ze peipat kai ra lei:

¹⁰aize ’Ntakbambe mai ’nsangne ge rûkambe-râtewbe de lei, sau mak ze rûkambe-râtewbe ze tewbambe benai chipau gu sakbe-râtewbe je rang mak zeu.

¹¹“Ningnui gu hekêu pîbang ramme ge Tingwang hangge rûkambe-râtewbe ningnui peipatrabe ze: getumseipoine kena kemei’nsei kat, melipoine heziâkgabe kum kat kau sena ra lei;

¹²zai mâ-himlei-râtewbe hang getumsei kat-kat ge dekuî yibe, taudui kebutlube ephah kat gu kereu ge kechum; zai Mâ-himlei-râtewbe hang kemei’nsei kat hangge dekuî yibe taudui kebutlube ephah kat gu kereu ge kena,

¹³mâ-himlei-râtewbe hangge melipoine peipatbe ge dekuî yibe taudui kebutlube ephah kat; mâ-perîmyibe gu rûkambe-râtewbe, Tingwang dage hemi gene kela peipatbe ramme ze lei.

¹⁴Penui gu sakbe-râtewbe ze getumsei kat ge wain hin kat gu pa’mpi ra kemei’nsei kat ge hin kat gu kechum ge kena ra zai melipoine kat ge hin kat gu medai ge kat ra lei; aize patingkum tâluî ge bekêu ’nsangne gu rûkambe-râtewbe de lei.

¹⁵Zai Tingwang dage hemui-râtewbe hangge kemei’nsei kat; sau mak ze rûkambe-râtewbe ze tewbambe benai chipau gu sakbe-râtewbe je rang mak ze aize peipat ra lei.

¹⁶“Raîlangbe kêu gu hezie kereu ze medai mai ze Tingwang gu tat’ntua hengi de lei.

¹⁷Zai aipau kêu gu hezie kereu ze mengeu mai ze kahengîbe mai de lei; hezie senane â ’nduihîkaimakbe tingku teu ze bam ra lei.

¹⁸Raîlangbe mai ge ka’nchibe ’ndui bam ra lei; zai ningnui tâ keritbe tew mak ra lei,

¹⁹kane rûkambe-râtewbe, kela peipatbe Tingwang dage hemi gene peipat ra lei: getumseipoine ramme kena meli’nsei kat, zai meli’nsei ramme kum kat kau sena; chiramme ze heziâkgabe pei ra lei;

²⁰zai penui gu dekuî yibe taudui kebutlube gu mâ-himlei-râtewbe getumsei kat gu ephah kat gu kereu ze kechum ningnui pei ra lei, zai meli’nsei kat ge ephah kat gu kereu ge kena;

²¹melipoine sena kat-kat ge ephah kat gu kereu ge kat ningnui pei ra lei;

²²zai ningnui hang kelunbe-râtewrabe hangge hemui-râtewbe peipatbe hang kemei’nsei kat pei ra lei.

²³Sau mak ze rûkambe-râtewtatbambe, chi hechua ge rûkambe-râtewbe je rang mak ze airamme ningnui peipat ra lei.

²⁴Chipau luî gene hezie sena Tingwang hangge perîmyibe hemi gene peipatbe hetak nai’nsangne pei ra lei; zai chize sau mak rûkambe-râtewbe tewbambe benai chipau gu sakbe-râtewbe peipatbambe je rang mak ze aize peipat kai ra lei.

²⁵Zai pasenabe mai ge ningnui ka’nchibe ’ndui bam ra lei; tâ keritbe ningnui tew mak ra lei.

²⁶“Perachî lu raîlangbe mai, ningnui gu ’ntakkak hengi ge Tingwang dage ningnui chêu karchibe gu mâ-himlei-râtewbe peipat kai dezai ka’nchibe ’ndui ningnui ’ndui ra lei; ningnui tâ keritbe tew mak ra lei,

²⁷kane rûkambe-râtewbe Tingwang dage perîmyibe peipat kai ra lei: getumseipoine kena kemei’nsei kat, zai meli’nsei ramme kum kat kau sena;

²⁸zai penui gu dekuîmoîne yibe taudui kebutlube gu mâ-himlei-râtewbe, getumsei kat-kat hangge ephah gu kereu ge kechum, kemei’nsei hangge kereu ge kena

²⁹zai meli’nsei ramme sena kat-kat hangge kereu ge kat;

³⁰ningnui hangge kelunbe-râtew ra hangge kemei’nsei kat zeu.

³¹Sau mak ze rûkambe-râtewbe ze tewbambe benai chipau gu mâ-himlei-râtewbe je rang mak ze chiramme ningnui peipat kai bam ra lei.