Read Zeme Naga PERIAK 3 Bible Online

PERIAK 3 - Zeme Naga bible

PERIAK 3

¹Airamme ze Tingwang ne Mosabe je Sinai Loa gene ka’mpaube ting ge Aaronbe benai Mosabe dagene rehei piakeube tak ramme de lei:

²Airamme ze Aaronbe na ’mpeumi ji ramme de lei: Meraipeu Nadabbe, zai Abihube, Eleazarbe zai Ithamarbe lei;

³tingku tâ’ngguarabe hang pa ne tew’ntipkaime, Aaronbe na ’mpeumi ji ramme ze airamme de lei.

⁴Kane Nadabbe benai Abihube â Sinai ge hênamchangbe heram ge ’nchimakbe hemi Tingwang suage kela gum peipatkaibe luage chai di de lei; zai penai na ga lei. Chipauziegene Eleazarbe benai Ithamarbe ne penai peu Aaronbe ringbe ting ge tingku chang ze tâ’nggua ze bam de lei.

⁵Zai Tingwang ne Mosabe je rang gai ze,

⁶“Lebi kiria je nguawang’nna gai lu ze tingkupeu Aaronbe suage penui je kai be lau, chidezai pechu penui ne ’ngguagaihâchi le ra hangge zeu.

⁷Kakellumbe paîki ge penui ka’ngguabe luage pe hangge benai baudime ’nteumena hangge ka’nduibe-paîki suage hependiegaibe tâ ramme penui ne tew gu lei;

⁸kakellumbe-paîki ge penui ka’ngguabe luage, ka’nduibe hetiampaîki ge merua ramme penui ne tinggeu ra zai Israelme kibau hangge hependiegaibe tâ ramme ’nggua gu lei.

⁹Zai Aaronbe benai pe name dage nang ne Lebime je pei gai ra lei; Israelme ruagene penui je â pe dage peihiam gai ’ndi de lei.

¹⁰Zai Aaronbe benai pe name bau je tâtew ra nang sum gai ra lei, zai penui ne penui gu tingku tâ’nggua ra lei; kane mi-mige chige wangka’nname je â tewchat ne ra lei,” ze kacheu de lei.

¹¹Zai Tingwang ne Mosabe dage rang gai ze,

¹²“Pie le lau, Israelme ruage hena lungkeube meraibe leine kelei ge Lebime je â Israelme ruagene I ne lu ’nde lei. Lebime â a gume chang ra de lei,

¹³meraibe lungkeube leine â a gu chang di daseu; meraibe lungkeube leine je Ijipram gene I ne tewchatbe mai ge, Israel ge ziemmena benai hekaubena meraibe lungkeube leine je a hangge I ne tew’nchi gai ’ndi de lei; penui ze a gu chang du de lei; I â Tingwang lei,” ze kacheu lei.

¹⁴Zai Sinai ge hênamchangbe heram gene Tingwang ne Mosabe je,

¹⁵“Lebibe name je sei lau, penui peume kibau ramme gene benai penui kibau ramme geneu; ’mpeumi leine kêu kat gene pa’nrei kau leine jeu,” ze kacheu de lei.

¹⁶Chigum Tingwang gu sam luigum ze penui je Mosabe sei de lei, pechu samdiegaibeibe luigum zeu.

¹⁷Zai airamme ze Lebibe name bau ji de lei: Gershonbe benai Kohathbe zai Meraribe zeu.

¹⁸Zai penui kibau-bau chai sui ze, Gershonbe name ji ze airamme de lei: Libnibe benai Shime-ibe;

¹⁹zai Kohathbe name bau ji ze airamme de lei: Amrambe, Izharbe, Hebronbe zai Uzzielbe zeu.

²⁰Zai Meraribe na hangna ji ze aize de lei: Mahlibe benai Mushibe zeu. Penui peume wangkeube tak luigum ze airamme ze Lebibe kiduîme ramme de lei.

²¹Gershonbe dagene Libnime kibau ramme benai Shimeime kibau ramme pat lei; airamme ze Gershon zat kibau ramme de lei.

²²Penui riak seigaibe luigum ze ’mpeumi ramme kêu kat gene pa’nrei kau leine chang sena ze haî mengeu lei.

²³Gershonme kiduîme ne tingrun ’mbia kakellumbe-paîki hiage sieki tew ra lei,

²⁴Laelbe na Eliasapbe ne Gershonbe zat ge besuitew zeu.

²⁵Zai Gershonbe name ne tew ra rezie peigaibe ze wangka’nduibe hetiampaîki, kakellumbe-paîki, chi lîmnambe kemuiki paî,

²⁶herâtewbe-kaira benai ka’nduibeki bamguabe heguangki merie, zai hetiampaîria ramme peireige tinggeu ze bamrabe ze de lei, aipau tâ ramme ’nggua ra pei gai de lei.

²⁷Kohathbe dagene Amramme kibau, zai Izharme kibau, zai Hebronme kibau, zai Uzzielme kibau ze pat te lei, airamme ze Kohathme kibau ramme de lei.

²⁸Pebâm ka’nchibe ge tâ ramme ’nggua ra ’mpeumi leine riak seigaibe luigum ze, kêu kat gene pa’nrei kau leine chang desat ze haî seruk lei.

²⁹Kohathbe name kiduîme ne hetiampaîki gene tingpî ’mbia sieki tew ra lei,

³⁰Uzzielbe na Eli-zaphanbe ne Kohathme kibau gu penui peume kibau ge besuitewbe chang lei.

³¹Zai penui tâ rezie â hingdebung ge, leisi-kaira ge, hemibung-kaira ge, herâtewbe bâm ramme ge, pebâm ka’nchibe bâm ge, tingkume ka’ngguabe ge teibe heli ramme ge, zai paîlîmsungbe; aipau tâ ramme leine ze de lei.

³²Zai tingkupeu Aaronbe na Eleazarbe ne Lebime zat ge kanguame ramme peireige dilangbe chang ze, zai pebâm ka’nchibe bâm gu rezieteime gu tâ reheikahekabe chang lei.

³³Meraribe dagene, Mahlime kibau benai Mushime kibau pat lei. Airamme ze Meraribe kibaume de lei.

³⁴’Mpeumi ramme leine je seigaibe luigum ze kêu kat gene pa’nrei kau leine penui riak chang seruk ze haî na lei.

³⁵Zai Abihailbe Zurielbe na ne Meraribe kibaume ramme ge penui peume kibau gu besuitewpeu chang lei, hetiamki gene tingpeî ’mbia penui ne sieki tew ra lei.

³⁶Zai tinggeurabe hang sumgai’ndime Meraribe na ramme ne hetiamki-hingra ramme zai bechâp ramme, zai kechia ramme, zai pekang ramme, zai chize tûnggimbe ramme leine, zai heli kerua leine, teitâtewbe leine,

³⁷teririe rieguabe chia ramme benai pekang ramme, zai pa’ntung ramme, zai heria ramme du reî ra lei.

³⁸Zai chiramme hetiamki ziêsua ge tingbia ’mbia sieki tewgaibe, wangka’nduibe-paîki suage naimikpat ’mbia Mosabe benai Aaronbe zai pe name ramme ne pebâm ka’nchibe bâm ge kahengîbe ramme gu tâ rezietei ze, Israel kibaume hangge ’ndaikau tâ tew gai mei be ge, zai mi-mige chige wangka’nname je â tewchat ne ra lei.

³⁹Lebime zat seigai’ndibe ramme leine Tingwang gu samdiegaibe gene Mosabe benai Aaronbe ne seigai’ndibe kibau ramme gene, ’mpeumi ramme leine kêu kat gene pa’nrei kau chang ’ngkai ze kena lei.

⁴⁰Zai Tingwang ne Mosabe je, “Israelme gu hena meraibe na ’mpeumi ramme leine je sei lau, kêu kat gene pa’nrei kau ji ramme riak zeu.

⁴¹Zai Lebime zat je a hang nang tei ra lei—I â Tingwang lei—Israelme ruage meraibe lungkeube leine kelei ge, zai Israelme gu kaurui lungkeuraîlangbe leine kelei ge Lebime gu kaurui zeu,” ze kacheu de lei.

⁴²Chigum ze Israel ruage meraibe lungkeube leine Mosabe sei de lei, Tingwang ne pechu samdiegaibeibe luigum zeu.

⁴³Zai meraibe lungkeube ramme ’mpeumi leine, heji ramme seigaibe luigum ze, kêu kat gene pa’nrei kau leine chang ’ngkai ze kena ze haî na ze riaksena ze kechum lei.

⁴⁴Zai Tingwang ne Mosabe je,

⁴⁵“Israel ruage meraibe lungkeube leine kelei ge Lebime zat je tei le lau, zai penui gu kaurui kelei ge Lebime zat gu kaurui zeu; zai Lebi zat ze a hang chang ra lei: I â Tingwang lei.

⁴⁶Zai Lebime zat ge ’mpeumi riak seigai’ndibe peireige, Israelme gu meraime lungkeube leine haî na ze riaksena ze kechum ’ngkeudibe ze ’nripatkairabe hangge,

⁴⁷mi hangkat hangge shekel mengeu hang nang tei ra lei; pebâm ka’nchibe bâm gu gene shekel lupat’ndui ra lei, shekel ze gerah ’ngkai riâ (chiramme nang tei) ra lei,

⁴⁸zai penui riak seigaibe ge ’ngkeupattime je ’nripatrabe gu rangkâng ze Aaronbe benai pe name je pei ra lei,” ze kacheu de lei.

⁴⁹Chigum ze Lebime zat gene bepeirei ’ngkeudime dagene ’nripatrabe rangkâng Mosabe lu de lei;

⁵⁰Israel kibau ge meraibe lungkeume dagene rangkâng pa lube, shekel chang kat ze haî chum ze riakseruk ze mengeu pebâm ka’nchibe bâm gu gene shekel lupat ’ndui gai de lei;

⁵¹zai ’nripatrabe rangkâng Aaronbe benai pe name je Mosabe pei gai de lei, Tingwang ne Mosabe je samdiegaibe luigumbe gene Tingwang gu sam luigum zeu.