Read Zeme Naga PERIAK 30 Bible Online

PERIAK 30 - Zeme Naga bible

PERIAK 30

¹Israelme bau ruage besuitewme je Mosabe ne rang ze, “Aize Tingwang ne diegaibe lei.

²Tingwang dage ’mpeumi hangkat ne samhatkaibe ge mei nune, samria ne pe runne pechu pi ra hangge deseu dezai, pe sam ze pa tew’nsia mak ra lei; pe mui gene zuapatbe leine luigum ze pa tew ra lei.

³Makchai du ’mpuimi hangkat ne Tingwang dage samhat kai dezai, zai pa heleu’ngka ge pe peu ki ge bambe luage samria ne pe runne pechu pi dezai,

⁴zai pe peu ne pa samhatkaibe benai pe gu samriagaibe gene pe runne pechu peipatkai’ndibe ze seu lu ze pechu mâ de rang mak tizai â pa samhatkaibe ze bam bam gu, zai samhatkaibe ramme pa pe runne pechu peipatkai’ndibe ze bam bam gu lei.

⁵Kane chize pa seube mai ge pe peu ne hezuâmakbe sam salia dizai â pe gu samhatkaibe zai pe runne pechu peipat kai ra samriagaibe ze bam bam ra mak lei; zai Tingwang ne pechu lun gai gu lei, pe peu ne pechu tewnambe ziegeneu.

⁶Zai pa ze pe napeu bamdibe kau pe gu samhatkaibe lungge bambe lua mei nune, pe runne pechu peipatkai’ndibe lung gene pe mui gene mâ-peruânggabe sapat kai bei ze,

⁷pe na peu ne chize seu lu, chize pa seube mai ge mâ de pechu rang mak tizai â pe gu samhatkaibe ramme ze bam bam gu, zai pa samriagaibe ne pe runne pechu peipatkai’ndibe ze bam bam gu lei.

⁸Kane pe napeu ne chize ’ngking ra wangbe mai ge pa ne hezuâmakbe sam sa dizai â pe peireige pe gu samhatkaibe bambe ze, zai pe mui gene peruânggabe sapatbe, chi pe runne pechu peipatkai’ndibe ze perua chang du lei; zai Tingwang ne pechu lun gai gu lei.

⁹Kane kemîpui ne mei nune, tapatkaibeipui ne mei samhatkaibe mâ-mâ ne pe runne pechu tewnambe ze pe peireige bam bam lei.

¹⁰Zai pa ne pe napeu ki gene samhat kai mei nu, deseu ze samriagaibe ne mei pe runne pechu peipat kai ’ndizai â

¹¹zai pe napeu ne chize seu lu, mâ de pechu rang mak, zai pechu nam mak tizai â; pe gu samhatkaibe leine bam bam gu, zai samriagaibe leine pa pe runne pechu peipatkaibe ze bam bam gu lei.

¹²Kane chipau sam ramme ze pe napeu ne seulube mai ge mâ-hangge du chak kai mak tizai â pa tapatkaibeipui ne pa sam deseugaibe deu ge mei nune pe runne pechu kadeseube deu ge pe mui gene zuapatbe sam ramme ring bam ra mak lei; pe napeu ne chipau sam ramme mâ-hangge du chak kai makchai â Tingwang ne chipaupui je lun gai gu lei.

¹³Chipaupui zene pe runne pechu tewhereu ra mâ-mâ sam kadeseube ge pe napeu ne mâ-hangge du chak kai mak le duî, makchai gesang hangge du chak kai le duî lei.

¹⁴Kane pe napeu ne patingnai’nsangne ge chipaupui peireige mâ de sa mak tizai â, chi ’mpuimi ne pe gu samhatkaibe benai sam deseugaibe pe dage bambe leine ze gesang hangge pa lugaibe chang lei; chipau sam ramme pe napeu ne seube mai gene pa ne chi ’mpuimi peireige mâ de sagaimakbe ziegene gesang hangge lugaibe chang lei.

¹⁵Kane chipau sam ramme pa seulube chângge pa ne mâ-hangge du chak kai mak tizai â pa ne chipaupui gu hemui-helut ze pung ra lei,” ze kacheu de lei.

¹⁶’Mpuimi benai pe napeu kakge, pe peu benai pe na ’mpuimi kakge zai heleu’mpui pe peu ki ge kaheleube ting ge bamrabe sie ramme Tingwang ne Mosabe dage samdiegaibe ze airamme de lei.