Read Zeme Naga PERIAK 31 Bible Online

PERIAK 31 - Zeme Naga bible

PERIAK 31

²“Israelme kûm ze Midianme peireige ruî gai zu lau; chipau châng dezai ning zatme dage nang wang ze chai gai ra de lei,” ze kacheu lei.

³Zai Mosabe ne baudime je rang ze, “Ningnui ruagene herei’nggi ra hangge ziemmena kedâ zu lau, chidezai Midianme je ’nggi ra penui zuapat ze, Midianme peireige Tingwang kûm lu le ra hangge zeu.

⁴Israelme zat leine gene ziemmena chang kat-kat ze herei ge ningnui lang gai ra lei,” ze kacheu de lei.

⁵Dadege Israelme changme ruagene, chang kat-kat ze pezat leine gene kelângpat kai ze, chang kereu ze kena herei hangge kedâ gai de lei.

⁶Zai Mosabe ne penui je herei ge lang gai de lei, Israelme zat leine gene chang kat-kat ze, tingkupeu Eleazarbe na Phineha be ne nguatat ra pe ba ge ’nchet ra teiliarabe hangge ka’nchibeki gu kerua ramme benai hegeîluîkie ramme pe dage tei lu tat ra lang gai de lei.

⁷Mosabe dage Tingwang ne samdiegaibe luigum ze Midianme je penui kaherei de lei, zai ’mpeumi leine je gîhiam ’ndi de lei.

⁸Zai penui kêdame je gî’ndime ruage ze Midianme gu heguangme hangmengeu, Ebibe, Rekembe, Zurbe, Hurbe zai Rebabe na Balaambe je gîchat’mpam gai bei de lei; zai penui ne Beorbe na Balaambe je hiazutkie ne bichat ’ndi de lei.

⁹Zai Israelme bau ne Midianme ’mpuimi ramme benai penui name ramme je kebang hang nîm kam ’ndi de lei; zai penui gu getumdung ramme, melidung ramme, zai penui gu merua leine hereichâ hang penui ne lu kam ’ndi de lei.

¹⁰Penui bamgaibe bâm ge penui gu namdi leine, zai penui gu sieki bâm ramme leine, penui ne hemi kai bei ze rû kam ’ndi de lei,

¹¹zai ziemmena benai hekaubena penui ne sutlube benai hereichâ leine lu kam ’ndi de lei.

¹²Dadege Moab kâm Jordan geukung Jeriko ge sieki bambe ge sutlube hereichâ benai kebang nîmlume je Mosabe benai tingkupeu Eleazarbe zai Israelme baudime dage penui ne teiwang gai bei de lei.

¹³Mosabe benai tingkupeu Eleazarbe, zai baudime ruage besuitewme leine sieki gene hela ’mbe penui je hedau ra zuapat ti de lei.

¹⁴Zai hereikangme gu saibe ramme, changme muiteime zai haime muiteime, herei ge tâka’ngguabe gene wangkadaime peireige Mosabe pe lungsia di de lei.

¹⁵Mosabe ne penui je, “’Mpuimi leine je â ring ra ningnui pei gai ’ndi mei?

¹⁶Pie le lau, Balaambe mâ-geteiliabe siabe gene Peor tûdeu ge Israelme bau ne Tingwang peireige penui duaî-siabe tâ tew gai ra airamme zene tew gai bei de lei, zai chigum ze herarît kesiabe Tingwang gu baudime dage wang gai de lei.

¹⁷Chidaze chunage hename ruage ’mpeumi napoine leine zai ’mpuimi ze ’mpeumi je ’nnagai’ndibe gene ’mpeumi je chîdibe kau leine je tewchat kam ne zu lau.

¹⁸Kane heleume ramme ’mpeumi je ’nnagai mak, zai ’mpeumi je chigaimakme leine je â ningnui hangge ’nzuak kai le lau.

¹⁹Hezie sena sieki gene hela ’mbe rêu lau; mi-mige ne ziemmena je tewchatkai’ndibe kau, zai mige tewchatkaibeibe pum je deîtaugai’ndibe kau ze â pakechumbe mai benai pasenabe mai ge ningnui benai ningnui gu kebangme ningnui runne ningnui je tew’nchi ra lei.

²⁰Paîni leine, hemeigei merua leine, kemei gêu ne tewbe kerua ramme leine, zai heching ne tewbe kerua leine ningnui tew’nchi kam ra lei,” ze kacheu de lei.

²¹Zai tingkupeu Eleazarbe ne herei ge tatme hereikangme dage sa ze: “Aize â Tingwang ne Mosabe dage diegaibe hingde gu hingde rawgaibe de lei:

²²Gechâk, gepût, kangngâgeî, hegeî, ranggeî, zai gimikchigeî runne,

²³hemi gene rûduibe leine ze, hemi gene ningnui hiapela gai ra lei, dezai chize ’nchi du lei. Acheuleusedu chize ’nchimakbe huirabe ze hedui ne tew’nchi gai ra lei; zai hemi ne rûchilakbe leine â hedui gene ningnui teipela gai ra lei.

²⁴Pasenabe mai ge ningnui paîni ramme geta’nchi ra lei; dezai ningnui ’nchi du lei; zai chipau châng dezai ningnui sieki ge wang dai ra lei,” ze kacheu de lei.

²⁵Tingwang ne Mosabe je,

²⁶“Nang benai tingkupeu Eleazarbe zai baudime gu peuname ruage besuitewme ne merua sutlube ziemmena benai hekaubena ramme je sei zu lau;

²⁷zai hereichâ ze herei ge tatme hereikangme benai baudime leine kakge tûm na hang ’nzi gai be lau.

²⁸Zai melidung gene zai hekunmerângne dung gene zai getumsei dung ramme gene zai ziemmename ruagene haî mengeu ge kat-kat ze herei’nggi ra tatme hereikangme dage Tingwang hangge ’mpuâ peipat ra lei;

²⁹penui gu gene pa’mpi lu lu ze Tingwang dage peipatbe chang ze tingkupeu Eleazarbe je pei be lau.

³⁰Zai ziemmename, getumsei ramme, hekunmerângne dung, melidung, zai getumdung leine Israelme gu pa’mpi gene rengeu ge kat-kat lupat lu ze, chiramme ze Tingwang gu kakellumbe-paîki ge besuitewme Lebime je ningnui pei be lau,” ze kacheu de lei.

³¹Zai Tingwang ne Mosabe ze samdiegaibe luigum ze Mosabe benai tingkupeu Eleazarbe tew de lei.

³²Chunage hereichâ hangge kahereime ne sutlube ’nsakpatbe ramme ze: melidung lâk seruk ze chang riaksena ze mengeu de lei,

³³getumdung, chang riaksena ze kena lei,

³⁴hekunmerângne chang riakseruk ze kat lei,

³⁵zai ’mpuimi ’mpeumi dage ’nna gai mak ze ’mpeumi je chigaimakme chang himreu ze kena lei.

³⁶Zai herei ge tatme dam hangge pa’mpi ze meli lâk chum ze chang himreu ze sena ze haî mengeu lei,

³⁷zai Tingwang hang ’mpuâ peigaibe ze meli haî seruk ze riaksena ze mengeu lei.

³⁸Getumdung chang himreu ze seruk gene Tingwang hang ’mpuâ peigaibe ze, chang riaksena ze kena lei.

³⁹Hekunmerângne chang himreu ze haî mengeu ge Tingwang hang ’mpuâ peigaibe ze riakseruk ze kat lei.

⁴⁰Ziemmena riak chang kereu ze seruk ge ziemmena himreu ze kena â Tingwang hang ’mpuâ pei gai lei.

⁴¹Zai Tingwang ne Mosabe dage samdiegaibe luigum ze, chi Tingwang hangge peirabe ’mpuâ ze â Mosabe ne tingkupeu Eleazarbe dage pei gai de lei.

⁴²Herei ge tatme gu gene Mosabe ne lupatchâmgaibe Israelme gu pa’mpi gene—

⁴³chunage baudime gu pa’mpi ze, melidung lâk chum ze chang himreu sena ze haî mengeu,

⁴⁴getumdung chang himreu seruk,

⁴⁵zai hekunmerângne dung chang himreu ze haî mengeu,

⁴⁶zai ziemmena chang kereu ze seruk lei—

⁴⁷Israelme gu hedam pa’mpi geze Mosabe ne rengeu ge kat-kat â ziemmena benai hekaubena ramme je lu lu Tingwang gu kakellumbe paîki ge rezieteime Lebime dage pei gai bei de lei; Tingwang ne Mosabe dage samdiegaibe luigum zeu.

⁴⁸Dadege hereikangme changsenângme bamme peireige bamme saibe ramme, changsenângme bamme gu sipai ge kanguame zai haîme muiteime ne Mosabe dage wanghechut kai lu,

⁴⁹zai Mosabe je acheu ze, “Ning guâ ka’ngguame anui ba kangge bamme ne kahereime riak ze sei kam lu de lei, zai anui ruage ziemmena hangkatte ’nsangmakbe tew me lei.

⁵⁰Zai Tingwang gu kela mi hangkat-kat ne ngaulube gechâk merua ramme, heta ramme, dêseita ramme, baroine ramme, kunchei ramme, heteu ramme ze anui ne teiwang de lei, Tingwang masuage anui hangge peize kelunbe-râtew ra hangge zeu,” ze kacheu de lei.

⁵¹Zai Mosabe benai tingkupeu Eleazarbe ne chi gechâk ramme benai chiamlube merua ramme leine penui dagene ngau de lei.

⁵²Zai kela peipatbe gu gechâk pelane hereikang changsenângme muiteime zai hereikang haîme muiteime dagene penui Tingwang dage peipatkaibe ze pelane shekel chang kereu ze seruk ze haî sena ze rengeu lei.

⁵³(Hereikangme ne sutlube merua ze pe hang-hangge lu kam de lei).

⁵⁴Zai Mosabe benai tingkupeu Eleazarbe ne hereikang changme muiteime benai hereikang haîme muiteime dagene gechâk lu lu ze, chiramme ze Israelme baudime hangge chang ze Tingwang suage ka’nduibe-paîki ge teiwang gai de lei.