Read Zeme Naga PERIAK 32 Bible Online

PERIAK 32 - Zeme Naga bible

PERIAK 32

¹Chunage Reubenbe name benai Gadbe name gu kauruidung misongga ze bam de lei; zai penui ne Jazerram benai Gileadram ze ngau lu de lei, pie le lau, chipau bâm â kaurui bamrabe bâm de lei.

²Dadege Gadbe name benai Reubenbe name wang lu Mosabe benai tingkupeu Eleazarbe zai pebau ruage besuitewme dage sa ze,

³“Ataroth, Dibon, Jazer, Nimra Heshbon, Elealeh, Sebam, Nebo zai Beon,

⁴Tingwang ne Israelme baudime suagene duîgaibe heram ze â kaurui bam ra yibe ram de lei; ning guâ ka’ngguame gu kaurui ramme lamui lei,” ze kacheu de lei.

⁵Zai penui ne sa ze, “Anui je ning mikngau ge ’nggia dizai â ning guâ ka’ngguame ramme hangge pei be lau; anui je Jordan geuki teika gai se lau,” ze kacheu de lei.

⁶Kane Mosabe ne Gadbe name benai Reubenbe name dage sa ze, “Ningnui â aige bam di ze, ningnui sikina ramme ne herei ’mbe tat ra semei?

⁷Tingwang ne penui hangge heram peigaibe ge tat ra ’ndaitew ze ningnui ne Israelme baudime lung ze tew’nchi gai ra lau?

⁸Ningnui peume ramme ne aigumbe tew de lei, I ne penui je Kades-barnea gene heram pie ra langgaibeibe ting gezeu.

⁹Penui Eshkol Kâm ’mbe hangbe luage heram ngau lu dege, penui ne Israelme baudime lung tew’nchei gai bei de lei, Tingwang ne penui hangge heram peigaibe ge tatrabe geneu.

¹⁰Dadege Tingwang ne chipau mai ge pe lumpum di ze, samhat kai ze,

¹¹‘Pelingsing ze, ziemmena Ijip gene zuapatme kum ’ngkai gene pa’nrei leine, Abrahambe, Isaakbe zai Jakobbe dage I ne hatkaibe heram ze ngau ra mak lei, penui ne penui lung sing ne a chai suimakbe ziegeneu;

¹²mî du ngau ra mak lei, Keniz’mpeu Jephunnebe na Kalebbe benai Nunbe na Joshuabe runne ngau gu lei, penai â penai lung gesang ne Tingwang je sui daseu,’ ze kacheu de lei.

¹³Dadege Tingwang ne Israelme peireige pe lumpum-desang di de lei, zai pa ne hênamkang ge kum hedai kezit ze bam ra tew gai bei de lei, Tingwang mikngau ge kesiabe tewbe rehei leine ga kam mak tâneu.

¹⁴Zai pie le lau, ningnui ne ningnui paume bâm ge hemui rehei teichu gai de lei, Israelme peireige Tingwang pe lumpum bi-bi ra tew gai sua ra hangge zeu!

¹⁵Ningnui ne pe chai sui mak tizai â pa ne penui je hênamkang ge put kai dai gu lei; zai ningnui ne aime bau ’nteumena je tew’ngga kam gu lei,” ze kacheu de lei.

¹⁶Dadege penui pe tailam wang lu sa ze, “Anui gu melidung hangge benai anui name ramme bamrabe bâm hang namdi ramme aige anui ne tew gai ra de lei,

¹⁷kane anui ne hereimerua ramme tei lu anui gu ramme je penui bâm ge teiwangchang gai mak tâne Israelme bau sua-sua raîtat ra tew gu lei; penui heram ge lungme ramme bambe ziegene kerie rie’mmilube namdi lungge anui name ramme je â peize bam gu lei.

¹⁸Anui ki lam’mbe anui â helatwang dai ra mak lei, Israelme bau ne penui gu heram hangge ngau lu lung demak tâneu.

¹⁹Anui â Jordan ’mbia mâ-mâ ge kêdadabe ge Israelme je ngualungherua ze bam ra mak lei; tingbia ’mbia ailia Jordan ’mbia ge anui hang â heram dau bei la daseu,” ze kacheu de lei.

²⁰Dadege Mosabe ne penui dage sa ze, “Ningnui ne aize tew ra dizai â, ningnui ne hereimerua tei lu Tingwang suagene herei’nggi ra tat ra dizai â

²¹zai Tingwang ne pe teureime je pe masua gene kumtua kam mak tâne ningnui hereimerua tei ze Jordan peirei tat bei dizai â,

²²chi heram ze Tingwang masua gene lu lu dezai, Tingwang dagene benai Israel dagene ningnui hereu dai ra ga du de lei; dezai Tingwang masua gene aipau heram ze ningnui gu chang du de lei.

²³Kane ningnui ne chigum tew mak tizai â pie le lau, ningnui Tingwang peireige hemui gai ’ndi de lei; zai ningnui gu hemui ziegene ningnui je tewsâ gu lei be chî’mmi le lau.

²⁴Ningnui name hangge namdi ramme, zai ningnui gu kaurui hangge perie riegua le lau; zai ningnui ne samhatlube ze tew ra lei,” kacheu lei.

²⁵Dadege Gadbe name benai Reubenbe name ne Mosabe je, “Ning guâ ka’ngguame ne a pau ne ranggaibe luî tew gu lei.

²⁶Anui na ramme, anui nâu ramme, anui gu melidung ramme, zai anui gu kebuidung ramme leine Gilead namdi ge bam bam gu lei;

²⁷kane ning guâ ka’ngguame ramme â ’nteumena hereipuâkailume ne Tingwang suagene herei’nggi ra Jordan tat ku lei, a pau ne diegaibe luigum zeu,” kacheu de lei.

²⁸Dadege Mosabe ne penui deu ge tingkupeu Eleazarbe, Nunbe na Joshuabe zai Israelme bau ruage besuitewme dage samde pei gai bei de lei.

²⁹Zai Mosabe ne penui je, “Gadbe name benai Reubenbe name, Tingwang masuage herei’nggi ra kedâlume leine ningnui je ngua lu Jordan kapat lu ningnui masua gene heram ze dui dizai â ningnui ne penui je Gileadram ze ’nram ra pei ra lei;

³⁰kane penui ne Jordan kapat mak ze ningnui ruage nguahereigaihâ dizai â Kanaanram ge ningnui ruage penui dam hang ngau ra lei,” ze kacheu de lei.

³¹Zai Gadbe name benai Reubenbe name ne kak ze, “Tingwang ne ning guâ ka’ngguame dage rangbe luigum ze anui tew gu lei.

³²Tingwang suage anui Kanaan ’mbe hereimerua tei lu kapat ku lei, kane anui nguaheurabe heram ze â Jordan geu katlam ’mbia anui gu chang ze bam bam gu lei,” ze kacheu de lei.

³³Zai Mosabe ne Gadbe name benai Reubenbe name zai Josepbe na Manassebe zat pa’mpime je Amorme gu heguang Sihonbe gu heguangram benai Bashan gu heguang Ogbe gu heguangram, heram kedei benai heram ramme gu namdi ramme, heram pelane gu namdi ramme penui je pei bei de lei.

³⁴Dadege Gadbe name ne Dibon, Ataroth, Aroer,

³⁵Atroth-shophan, Jazer, Jogbeha,

³⁶Beth-nimra zai Beth-haran, namdi peranchibe ramme, zai meli hangge perie rieguabe ramme tew’nsap kai de lei.

³⁷Zai Reubenbe name bau ne Heshbon, Elealeh, Kiriathaim,

³⁸Nebo zai Baal-meon, (aipau ji kena ze â helei ’ndi de lei), zai Sibma tew’nsap kai de lei; zai penui ne tew’nsapkaibe namdi ramme ze â kêdabe ji ne ’ntak kai bei de lei.

³⁹Manassebe chapeu Makirbe name ne Gilead ’mbe tat ze chize lu lu de lei, zai Amorme chige bamme je kelitua kam ’ndi de lei.

⁴⁰Dadege Mosabe ne Manassebe na Makirbe je Gileadram ze pei gai bei ze chige pa lung di de lei.

⁴¹Zai Manassebe na Jairbe ne tat ze penui keloa ramme sut ’ndi de lei, zai chiramme je Habboth-jair ze ku de lei.

⁴²Zai Nobabe ne tat ze Kenath benai chige keloa ramme sut ’ndi de lei, zai chipau ze pe ji gum ze Noba ze ku de lei.