Read Zeme Naga PERIAK 34 Bible Online

PERIAK 34 - Zeme Naga bible

PERIAK 34

¹Tingwang ne Mosabe je rang ze;

²“Israelme bau je die gai ze penui je salia lau, ningnui Kanaanram ge gut dezai (aipau heram ze ningnui hang ngaube de lei, Kanaanram luî zeu),

³ningnui gu heramrai tingpî ’mbia ze Zin gu hênamkang gene Edom ’mbia luî-luî lu ra lei, zai ningnui gu tingpî ’mbia gu heramrai ze tingbia ’mbia ’Nchaî Sungkling tudkaibe gene chu ra lei;

⁴zai ningnui gu heramrai ze Akrabbim tatbe tingpî ’mbia luhang gai ze Zin luka ra lei, zai Kades-barnea gene tingpî ’mbia chigene betun gai ra lei; dezai Hazar-addar lutat dai ze, zai Asmon lukatat ra lei;

⁵zai heramrai ze Asmon gene lukelitat dai ze Ijipram ’nggeuterak luchang ra lei, zai sungkling gene luhekap kai ra lei,

⁶“Tingnaimik pat ’mbia gu heramrai hangge ningnui Kedibe Sungkling benai bekâm ramme lu ra lei; aize ningnui gu tingbia ’mbia gu heramrai hang de lei.

⁷“Aize ne ningnui gu tingpeî ’mbia gu heramrai hang de lei: Kedibe Sungkling gene ningnui Hor Loa riâ herai ’nritbang gai ra lei;

⁸Hor Loa gene Hamath gutbe bâm riâ ningnui herai ’nritbang gai ra lei, zai heramrai ze Zedad gene tud kai ra lei;

⁹dezai heramrai ze Ziphron riâ luchang ra lei, zai Hazar-enan gene tud kai ra lei; aize ningnui gu tingpeî ’mbia gu heramrai hang de lei.

¹⁰“Ningnui gu tingnaimik pat ’mbia heramrai ze Hazar-enan gene Shepham riâ herai ’nritbang gai ra lei;

¹¹zai heramrai ze Shepham gene tatkeu ze Ain gene tingnaimik pat ’mbia Ribla riâ luchang ra lei; zai heramrai ze wangkeu ze tingbia ’mbia Kinnereth Sungkling patkahedibe riâ luchang ra lei,

¹²zai heramrai ze Jordan riâ lukeu ra lei, zai ’Nchaî Sungkling gene tud kai ra lei. Aipau ze ningnui gu heramrai hang de lei, heramrai ze ’nram’nggualingbe luî geneu,” ze kacheu de lei.

¹³Mosabe ne Israelme je die gai ze kacheu de lei, “Aize ningnui lungrabe heram hang de lei, hedachakbe gene ngaube zeu, Tingwang ne hezat sekuime benai hezat pa’mpime je pei ra diegai’ndibe zeu;

¹⁴Reubenbe kiria benai Gadbe kiria ze â penui hangge heram ngau lu de lei, zai Manassebe kiria zat pa’mpime du ngau lu de lei;

¹⁵hezat kena benai hezat pa’mpi zene tingnaimik pat ’mbia Jordan ka ze Jeriko gene tingbia ’mbia ge heram ze ngau lu de lei,” ze acheu zeu.

¹⁶Tingwang ne Mosabe je rang ze,

¹⁷“Aime hangna ze ningnui hangge heram timchâkkairabe kena de lei: tingkupeu Eleazarbe benai Nunbe na Joshuabe zeneu.

¹⁸Heram timchâk ra hangge hezat ’nsangne ge besuitewme hangkat-kat je ningnui tei ra lei.

¹⁹Airamme ze penui ji ramme de lei: Juda kiria gene Jephunnebe na Kalebbe lei.

²⁰Simeonbe name kiria gene Ammihudbe na Shemuelbe.

²¹Benjaminbe kiria gene Kislonbe na Elidadbe lei.

²²Besuitewpeu Danbe name kiria gene, Joglibe na Bukkibe lei.

²³Josepbe name kiria gene: besuitewpeu Manassebe name kiria gene, Ephodbe na Hannielbe lei.

²⁴Besuitewpeu Ephraimbe name kiria gene Shiphtanbe na Kemuelbe lei.

²⁵Besuitewpeu Zebulunbe name kiria gene Parnakbe na Eli-zaphanbe lei.

²⁶Besuitewpeu Issakarbe name kiria gene, Aszanbe na Paltielbe lei.

²⁷Besuitewpeu Asherbe name kiria gene, Shelomibe na Ahihudbe lei.

²⁸Besuitewpeu Naphtalibe name kiria gene, Ammihudbe na Pedahelbe lei.

²⁹Aime bau ze Tingwang ne Israelme lung ra Kanaanram ge heram ’nzi ra diegaibeime bau de lei,” ze kacheu de lei.