Read Zeme Naga PERIAK 35 Bible Online

PERIAK 35 - Zeme Naga bible

PERIAK 35

¹Jeriko gene tatka ze Jordan taige Moab kâm gene Tingwang ne Mosabe je,

²“Israelme heram ka’nrambe gene Lebime lung ra Israelme ne namdi ramme pei gai ra lei; zai ningnui ne namdi hia-hiage melitaning Lebime je pei gai ra lei be Israelme bau je samdie gai lau.

³Namdi ramme ze penui lungrabe bâm hang chang ra lei, zai penui gu hereubuâ yibe bâm ramme ze penui gu getumdung, kaurui ramme zai penui gu hekaubena ramme hang chang ra lei.

⁴Namdi ramme gu melitaning ramme, ningnui Lebime je peirabe ze namdi kerie gene mik medai desâu chang kat kat riâ ’ndeuguâlingpat kai ra lei.

⁵Zai namdi gene hela ’mbe aigum ze ningnui ’ndeu ra lei, tingnaimikpat ’mbia desâu chang na zai tingpî ’mbia desâu chang na zai tingrun ’mbia desâu chang na zai tingpeî ’mbia desâu chang na ra lei, namdi ne sûngngangkelî ge bam ra lei; aize penui gu namdi ramme gu melitaning hangge chang ra lei.

⁶Namdi ramme ningnui Lebime je peibe ze ’nseugairabe namdi seruk hangge chang ra lei, chige kegîbe tâ tewme pakwang gai ra nang pheu gai ra lei, zai chipau peireige du penui je namdi hedai ze kena ningnui pei ra lei.

⁷Namdi ramme ningnui Lebime je peigaibe ze pelane hedai ze desat ra lei, melitaning pei’mpam zeu.

⁸Zai Israelme bau gu heram gene ningnui peirabe namdi ramme hangge ze pezat dibime dagene ningnui lu’ngkie ra lei, zat pezat cheibime dagene ningnui lu’nchambi ze lu ra lei; penui gu-gu heram bambe luî gene peize Lebime hangge penui gu namdi ramme timchâkpat kai ra lei,” ze kacheu de lei.

⁹Zai Tingwang ne Mosabe dage rang gai ze,

¹⁰“Israelme je salia gai lau, ningnui Kanaan ’mbe Jordan kapat dezai,

¹¹ziemmena mâ-tewmaube gene miramme je tewchatkai’ndime pakwang ’nseugairabe namdi ramme hang ningnui hangge kelâng ra lei.

¹²Chi ziemmena je bichatpeu pa samrambe hangge baudime wangka’nduime masuage sap kai mak tâne chai mak bamkuârabe hang hekûmlupeu je pak’mbairabe bâm hang chi namdi ramme ze ningnui hangge chang ra lei.

¹³Zai chi namdi ramme ningnui peibe ze ningnui gu ’nseugairabe namdi seruk hangge chang ra lei.

¹⁴Jordan gene hela ’mbe namdi kechum ningnui pei ra lei, zai Kanaanram lungge namdi kechum pei ra lei, ’nseugairabe namdi ramme hangge zeu.

¹⁵Ai namdi ramme seruk ze Israelme bau benai penui ruage hesangme heluîchâmme benai hesang-rêugaileume hangge ’nseugairabe bâm hang chang ra lei, mige tewmaube gene miramme je tewchatkailume chige pak kai ra hangge zeu.

¹⁶“Kane pa ne pechu hegeî merua ne lakkau gai bei ze, pa chai dizai â pa â kegîpeu chang de lei; kegîbe tâ tewme je â tewchat ne ra lei.

¹⁷Zai pa ne pe ba gene ziemmena je tewchatduibe riâ kau tingchu ne kedeîkau gai bei ze pa chai dizai â pa ze kegîbe tâ tewbe kau de lei; kegîbe tâ tewbe kau je â tewchat ne ra lei.

¹⁸Makchai pa ne pe ba gene ziemmena je tewchatduibe riâ kau heching dâng ne pechu lakkau gai bei ze pa chai dizai â pa ze kegîbe tâ tewbe kau de lei, kegîbe tâ tewbe kau je â tewchat ne ra lei.

¹⁹Hejai kûmtewpeu ne kegîpeu je tewchat ne ra lei; pa ne pechu hedau dezai pa ne pechu tewchat ra lei.

²⁰Zai pa ne ngaugailakbe gene lîmkua lu huîtau bei mei zai paitau bei mei be gene pa chai dizai â

²¹makchai ’nggî-kahegeibe gene pe ba ne zûmkau gai bei pa chai dizai â pechu tewkaupeu je tewchat ne ra lei; pa ze kegîbe tâ tewbe kau de lei; hejai kûmtewpeu ne kegîbe tâ tewpeu je ngaudau dezai pechu tewchat ne ra lei.

²²“Kane mige ne dûppat ze pechu ’nggî-kahegeibe ga ze huî bei mei makchai lîmkua mak ze ’ndaikau mei ne pechu pai mei,

²³makchai pa ze pe teureipeu chang mak, zai pechu tew’nsia ra peu mak sedu ziemmena je tewchatduibe chukâng ne ngau mak ze pechu tua bei pa chai dizai â;

²⁴ziemmena je tewchatpeu benai hejai kûmtewpeu kakge baudime ne samram ra lei, ai hingde rawgaibe ramme luigum zeu;

²⁵zai hejai kûm tewpeu ba gene ziemmena je tewchatpeu je baudime ne meupat kai ra lei, zai pechu ze baudime ne pe gu ’nseugaibe namdi, pa pakkaibe bâm ge kai ra lei, zai ka’nchibe taudui ne ’nnukkai’ndipeu tingkudilangpeu chai mak tâne chige pa lung ze bam ra lei.

²⁶Kane kegîpeu ze pa pakkaibe pe gu ’nseugaibe namdi ’nrai gene tat’nzûpat tizai â

²⁷pe gu ’nseugaibe namdi gu herai gene hela ge hejai kûmtewpeu ne pechu ngaudau lu, ziemmena je kegîpeu je hejaikûmtewpeu ne tewchat ’ndizai â pa â hejai mâu bam ra mak lei.

²⁸Chipaupeu ze â tingkudilangpeu chai mak tâne pe gu ’nseugaibe namdi ge bamhimchangrabe kau daseu; kane tingkudilangpeu chaidibe chângge â kegîpeu ze pe ram dei ’mbe pa helatwang dai dui lei.

²⁹“Zai airamme ze ningnui gu rehei leine, ningnui bambe bâm leine ge ningnui hangge rawgaibe hingde benai hingde tewgaibe chang ra lei.

³⁰Mige ne ziemmena hangkat je tewchat dizai â sakki teilia ra bambe luî gene kegîpeu je tewchat ra lei; kane sakki hangkat ne saliabe runne gene mî je du tewchat mak ra lei.

³¹Chipau peireige du kegîpeu kechaipâu pungpeu gu keringbe hangge pumlei ningnui lu mak ra lei; kane pechu ze tewchat ne ra lei.

³²Zai tingkudilangpeu chai makge heram ge pa lungwangdairabe hanggene pe gu ’nseugaibe namdi ge pakkaipeu gu pumlei ningnui lu mak ra lei.

³³Aigum ze ningnui lungbe heram ze ningnui tewhebâ mak ra lei; hejai ne heram ze tewkahebâ daseu, zai hejai tewpatkaipeu gu hejai gene mak tizai â chige hejai tewpatkai’ndibe hangge, heram hangge peiruîrabe tâ tewchi lak lei.

³⁴Pezuilung ge I bambe, ningnui lungbe heram ze ningnui tewhebâ mak ra lei; Israelme zat zuilung ge I Tingwang bam daseu,” kacheu de lei.