Read Zeme Naga PERIAK 36 Bible Online

PERIAK 36 - Zeme Naga bible

PERIAK 36

¹Zai Josepbe name kibau ruage Manassebe na Makirbe na Gileadbe chaname kibau ge besuitewme ruage bamme ne Mosabe benai besuitewme Israel chana ge besuitewme suage wang ze ka’mpau de lei.

²Penui ne sa ze, “Hedachak ze Israelme hangge heram ’nram ra pei ra Tingwang ne aipau ze samdie gai lei; zai anui kinapeu Zelophehadbe gu heram ze pe name ’mpuimi ramme je pei gai ra aipau ze Tingwang ne samdie gai lei.

³Kane Israelme kêdabe zat kau name dage penui ne meiwang gai dizai â anui peume gu heram gene penui gu heram ze lu lu ze penui meiwanggaime gu heram ge kaiherua gai ’ndu de lei; chigum ze anui gu changrabe heram gene chize teitat tu de lei.

⁴Zai Israelme bau gu Jubilee wang dezai â penui heram ze penui zatme gu heram ge kaiherua gai ’ndu lei; zai penui gu heram ze penui peume zat gu heram gene lutat tu de lei,” ze kacheu de lei.

⁵Dadege Mosabe ne Israelme bau je Tingwang gu sam luî ze die gai ze, “Josepbe name zat ne sabe ze ’nzei lei.

⁶Aize Tingwang ne Zelophehadbe na ’mpuimi ramme deu ge ranggaibe de lei, ‘Penui ne ’nning gai ze yi-yime dage pei nguakelaktew zu lau; penui peu zatme kiduîme dage runne penui wang ra lei.

⁷Israelme bau gu heram ze hezat kat gene kêdabe hezat ge teiheleitat mak ra lei; Israelme bau leine â penui peume zat gu heram je tei’ngguigit bam ra chang daseu.

⁸Zai hêpuime mi-mige Israelme bau zat gu heram teilungme ze penui peume zatme kiduîme ruage hangkat nâu chang ra lei, chidezai Israelme bau leine penui peume gu heram ze ’nram’nggamsiak le ra hangge zeu.

⁹Chigum ze heram ze â hezat kat gene kêdabe hezat dage teihelei mak ra lei; Israelme bau zat leine ne pe gu-gu heram ze tei’ntiprip ze tei ra lei,’ acheu zeu,” ze kacheu de lei.

¹⁰Zelophehadbe na ’mpuimi ramme ze Tingwang ne Mosabe dage ranggaibe luî ze tew de lei;

¹¹Mahlale, Tirzale, Hoglale, Milkale, zai Noahle aime Zelophehadbe na ’mpuimi ramme ze penui peu kiduîme na ramme nâu tew de lei.

¹²Penui Josepbe na Manassebe name kiduîme dage meiwang gai de lei, zai penui gu heram ze penui peume kiduîme zatme dage bam bam de lei.

¹³Aipau hingde ramme benai hingde tewgaibe ramme ze Jeriko gene tatka ze Jordan taige Moab kâm gene Tingwang ne Israelme bau hangge Mosabe dagene diegaibe ramme de lei.