Read Zeme Naga PERIAK 4 Bible Online

PERIAK 4 - Zeme Naga bible

PERIAK 4

¹Tingwang ne Mosabe benai Aaronbe je rang gai ze,

²“Lebibe name bau ruagene Kohathbe name riak hepiau raw lau, penui kibau ramme benai penui peume kibau ramme,

³kum himreu gene kum rengeu riâ kau, tâ’nggua ra zuagutchiduime leine, ka’nduibe-paîki ge tâtew ra hangge zeu.

⁴Ka’nduibe-paîki ge ’nchilangbe merua ramme teitâtewbe ze â Kohathbe name bau ne ra lei.

⁵Sieki puikeli ra dezai, Aaronbe benai pe name bau ne pelung ge gut lu ze lîmnambe paî rakeu ra lei, zai chize ne hingdebung ze tapchim gai ra lei,

⁶chidezai bepeirei ge kemeigei ne penui tapchim gai ra lei, zai paî ka’nzaibe ne chipau peireige tap kai ra zai puabe kang ramme ge kai ra lei.

⁷Zai pualiabe tingku kaibe peireige paî ka’nzaibe penui tap kai ra lei, zai chipau peireige hepiak ramme, hekuak ramme mâ-perîmyibe rû ra ’ngking gai ra, ’mpuang ramme, zai sakbe-râtewbe peipat ra hang heduibung ramme kai ra lei; zai chipau peireige tingku du bam bam ra lei;

⁸dezai paî giebe pengêudibe chipau ramme peireige penui tapchim gai ra lei, zai chipau luigum ze kemeigei ne tapchim gai ra lei, zai tûnggimbe-kang ramme ge kai ra lei.

⁹Zai paî ka’nzaibe penui tei ra lei, zai kebabe hangge hemibung ka’ntaube-kaira hemibung ramme, desip ramme hepiak puabe ra ramme, zai mâ-châdui kaibe heli ramme leine tapchim ra lei:

¹⁰zai hekilung gu merua leine ge kemeigei ne tapchim lu ze mâ-puabe-kaira peireige penui kai gai ra lei.

¹¹Zai gechâk ne tewbe herâtewbe-kaira peireige paî ka’nzaibe ne penui tap kai ra lei, zai chize â kemeigei ne tapchim gai ra lei, zai puabe-kang ramme ge kai ra lei,

¹²zai pebâm ka’nchibe bâm lungge ka’ngguabe ge teibe kerua ramme leine penui tei ra lei, zai paî ka’nzaibe lungge chiramme penui kai ra lei, zai chige kemeigei ne tapchim gai ra lei, zai mâ-puabe kaira peireige chiramme kai ra lei.

¹³Zai timbun ramme herâtewbe-kaira gene penui lutua ra zai paî ka’ndiakbe ne bepeirei ge penui tap kai ra lei;

¹⁴zai herâtewbe-kaira gu hekilûng kerua leine chipau peireige penui kai ra lei, chiramme chige tâ’nggua ra hang teibe, hemikuak ramme, perong-terui ramme, ’ngkualipi ramme, zai hegeî’ntui ramme, herâtewbe-kaira gu hekilûng kerua ramme leine ze bepeirei ge penui kemeigei ne tapchim gai ra lei, zai puabe kang ramme ge kai ra lei.

¹⁵Zai pebâm ka’nchibe benai kerua ramme leine Aaronbe benai pe name ne tapchim kam lu sieki puikeli ra dezai Kohathbe name bau ne wang ze airamme pua ne ra lei, kane ka’nchibe kerua ramme penui deîtau mak ra lei, makchai â penui chai gu lei. Airamme Hera bambe paîki gu kerua ramme Kohathbe name ne pua ra be lei.

¹⁶“Zai taubarabe hang taudui ge mâ-perîmyibe rube, mâ-himlei peipat bambe ge, zai taudui ka’nnukbe ge rezie tei ra lei, hetiamki leine benai pelung ge bambe leine pebâm ka’nchibe bâm zai heli ramme tinggeu ra lei,” ze kacheu de lei.

¹⁷Tingwang ne Mosabe benai Aaronbe je rang gai ze,

¹⁸“Lebime zat ruagene Kohathme kibau ramme je tew’ngga se lau;

¹⁹kane ’nchilangbe merua ramme taige penui wang’nna dezai chai makse ring le ra hangge penui dage aigum ze tew gai lau; Aaronbe benai pe name ne tatgut ze penui hangkat-kat je pe ngeu-ngeu hangge heputtua gai ra lei,

²⁰kane ka’nchibe merua ramme piezat du gai mak ra lei, penui chai mak ra hangge zeu,” ze kacheu de lei.

²¹Tingwang ne Mosabe je rang gai ze,

²²“Gershonbe name dage du hepiau raw lau, penui kibaume ramme gene benai penui peume kibaume ramme geneu;

²³kum himreu gene kum rengeu riâ kau je nang penui je sei ra lei, tâ’nggua ra zuagutchiduime leine, Hera bambe paîki ge tâtew ra hangge zeu.

²⁴Gershonme zat kibaume ne aipau tâ’ngguarabe, tâ’ngguarabe benai heput ramme pungrabe ze:

²⁵hetiamki gu paîlîmsungbe ramme penui ne pua ra lei, zai Hera bambe paîki ge tapchimbe, zai chi ’nreilangbe ge kemeigei ne tapchimbe, zai Hera bambe paîki gu kemuiki kedibe ge lîmsungbe paî,

²⁶zai teririe riebe, zai teririe ge gutbe kemuiki gu lîmsungbe paî, chize â hetiamki benai herâtewbe-kaira rieguabe, zai chiramme pibe-ria ramme, zai penui tâka’ngguabe gu betâu-perâ leine zeu; zai tew ra ka’nnangbe leine penui je langgaibe penui tew ra lei.

²⁷Gershonbe zat name ne tâ’ngguarabe leine Aaronbe benai pe name ne samdiegaibe gene ra lei, chiramme leine penui pung ra zai chiramme leine penui tew ra lei; zai penui tewrabe rezie leine ze penui pung ra nang penui je lang gai ra lei.

²⁸Aize Gershonme zat name ramme ne Hera bambe paîki gu tâ’ngguarabe de lei, zai penui tâtewbe ze â tingkupeu Aaronbe na Ithamarbe ne kereîbe kang gene ra lei.

²⁹“Meraribe name ramme je du, penui kibaume ramme, zai penui peume kibaume ramme riak nang sei ra lei;

³⁰kum himreu gene pa’nrei, kum rengeu riâ kau je penui riak nang sei ra lei, tâ’nggua ra zuagutchiduime leine, Hera bambe paîki ge tâtew ra hangge zeu.

³¹Zai aize penui ne tew ra peirabe ze â Hera bambe paîki lungge penui tâka’nggua gum ze: hetiamki gu pa’ngra ramme, bechâp ramme, kechia ramme, pekang ramme,

³²teririe rieguabe kechia ramme, pekang ramme ’mpam ze pa’ntung ramme, zai heria ramme, betâu-perâ leine benai penui je tûnggimbe ramme leine; zai penui ne tew ra ka’nnangbe ramme ge merua ramme ji rang ze nang lang gai ra lei.

³³Aize Meraribe name kibau ramme ne tâ’ngguarabe de lei, Hera bambe paîki lungge penui tâka’ngguabe leine ze, tingkupeu Aaronbe na Ithamarbe suî gene ra lei,” ze kacheu de lei.

³⁴Zai Mosabe benai Aaronbe zai pebau ge kanguame ramme ne Kohathme zat name riak sei de lei, penui kibaume ramme, zai penui peume kibaume ramme,

³⁵kum himreu gene kum rengeu kau, tâ’ngguachidime leine, Hera bambe paîki lungge tâtew ra hangge zeu;

³⁶zai pe kibau ramme ge penui riak chang na ze haî sena ze rengeu lei.

³⁷Aize Kohathme zat kibaume ramme riak Hera bambe paîki lungge tâka’ngguame leine Tingwang ne Mosabe dage samdiegaibe luigum ze Mosabe benai Aaronbe ne seigaibe riak te lei.

³⁸Gershonbe name ramme riak, penui kibau ramme gene benai penui peume kibau ramme gene,

³⁹kum himreu gene kum rengeu kau, Hera bambe paîki ge tâ’nggua ra zuagutchiduime leine:

⁴⁰penui kibau ramme gene benai penui peume kibau ramme gene penui riak chang na ze haî seruk ze himreu lei.

⁴¹Aize Gershonbe name kibau riak, Hera bambe paîki lungge tâka’ngguame leine, Tingwang ne Mosabe dage samdiegaibe luigum ze Mosabe benai Aaronbe ne seigaibe riak te lei.

⁴²Meraribe name ramme kibau riak, penui kibau ramme gene benai penui peume kibau ramme gene,

⁴³kum himreu gene kum rengeu kau, Hera bambe paîki ge tâ’nggua ra zuagutchiduime leine;

⁴⁴pe kibau ramme gene penui riak chang chum ze haî na lei.

⁴⁵Airamme Meraribe name kibau ramme riak seigaibe, Tingwang ne Mosabe dage samdiegaibe luigum ze Mosabe benai Aaronbe ne seigaibe riak te lei.

⁴⁶Lebime zat ramme leine riak seigai’ndibe, Mosabe benai Aaronbe zai Israelme je kanguame ramme ne seigaibe riak, penui kibau ramme gene benai penui peume kibau ramme gene,

⁴⁷kum himreu gene kum rengeu riâ kau, Hera bambe paîki ge tâtew ze tâ’nggua ze, zai tâput ramme pung ra zuagutchiduime leine,

⁴⁸chime penui je seigai’ndibe riak chang desat ze haî mengeu ze riakdesat lei.

⁴⁹Mosabe dage Tingwang ne samdiegaibe luigum ze penui je sum gai ze, hangkat-kat dage pa tâ ’ngguarabe mei nune pungrabe mei ge sum gai de lei, chigum ze pa ne penui je sei gai de lei, Tingwang ne Mosabe dage samdiegaibe gum zeu.