Read Zeme Naga PERIAK 5 Bible Online

PERIAK 5 - Zeme Naga bible

PERIAK 5

¹Tingwang ne Mosabe je,

²“Ka’mpame leine zai katenetbe pungme leine zai kechaime je deîtaube gene hebâdime leine je sieki gene hela lupat ne ra Israelme je samdie gai lau;

³’mpeumi benai ’mpuimi je ningnui lupat ne ra lei, sieki gene hela ’mbe penui je kai ne ra lei, chidezai I bambe sieki zuilung penui ne tewhebâ gai mak ra hangge zeu,” ze kacheu de lei.

⁴Zai Israelme bau ne chigum ze tew de lei, zai penui je sieki gene hela ’mbe lupat ’ndi de lei; Tingwang ne Mosabe je ranggaibe gum ze, chigum ze Israelme tew de lei.

⁵Zai Tingwang ne Mosabe je rang gai ze,

⁶“Israelme je salia lau, ziemmename ne Tingwang je ’nnumtewtadibe gu hemui zat ze ’mpeumi mei nune ’mpuimi mei zene tew ze chi ziemmena ze kemaube changdibe luage,

⁷pa tewgai’ndibe gu hemui ze pa ne ralia ra lei; zai pe gu mâ-tewmaube ze keyibe ne pa ne tewruîpuiting gai dai ra lei, dêt mengeu ge dêt kat pa tâtewmaugaime dage pa peisî gai ra lei.

⁸Kane chi ziemmena ze pe kibaume ruage chi keyibe peiruîgaibe lurabe kau mî du ga dizai â pe hangge kelunbe-râtewgaibe kelunbe-râtewbe meli’nsei benai ’mpam ze kemaube hangge keyibe tewbe ze Tingwang dage tingkupeu hangge tat kai ra lei.

⁹Zai peipatkaibe leine, Israelme gu ka’nchibe merua ramme tingkupeu dage penui teiwanggaibe leine ze pe hang chang ra lei;

¹⁰zai ziemmena leine gu ka’nchibe merua ramme ze pe hang chang ra lei; mi-mige ne ’ndaikau-kau tingkupeu dage pei mei be ze pe hang chang kam ra lei,” ze kacheu de lei.

¹¹Zai Tingwang ne Mosabe je rang gai ze,

¹²“Israelme je acheu salia lau, hêpuime mige pe napeu dagene lietat lu pe napeu peireige timsangmakbe tâ tew ze,

¹³’mpeumi ne pe dage maugaibe pe napeu mikngau gene tei’mbai ze, pe runne pechu tewhebâgaibe chang leusedu pa kemaube nîmpat lak, zai pechu chau’ngkuigairabe kau ga ze, chipau tâ tewbe luage pechu nîmpat le makchai â,

¹⁴zai ’nningkagtegeibe lungtak pe napeu dage pat ze pe nâu pe runne pechu tewhebâgai’ndipui je pa ’nningkategeibe bam dizai â nune pe nâu pe runne pechu tewhebâ mak sedu ’nningkategeibe lungtak pe dage pat ze pe nâu je pa ’nningtegei dizai â,

¹⁵chi ’mpeumi zene pe nâu je tingkupeu dage teiwang gai ze, pe nâu hanggene mâ-peipat ra ka’nnangbe hangge dekuîmeu teseu ephah gu kereu ge kat, teiwang gai ra lei; chipau peireige taudui ruî gai mak ra zai mâ-perîmyibe ’ngking gai mak ra lei, aize â ’nningkategeibe gu mâ-hîmra peipatbe-râtewbe de lei, kemaube chipat ra hangge mâ-himlei peipatbe-râtewbe, mauka’ndibe gu hemui chibam ra tewgaibe zeu.

¹⁶“Zai tingkupeu ne pe nâu je nguawang’nna gai ze, Tingwang masuage pechu kai ra lei;

¹⁷dezai tingkupeu ne hedui ka’nchibe hegamli gene tei lu, zai kakellumbe-paîki gene kedeiniamoîne gêsa getup lu chize hedui ge kai ra lei.

¹⁸Zai tingkupeu ne ’mpuimi je Tingwang masuage kai ra lei, zai ’mpuimi peîtam heipat lu chibamrabe hang mâ-hîmra peipatbe-râtewbe ze chi ’mpuimi ba sing ge kai ra lei, chi ’nningkategeibe gu mâ-hîmra peipatbe-râtewbe zeu. Zai mâ-kesiabe hang chianggaibe dui karîbe ze tingkupeu ne pe ba ge tei ra lei.

¹⁹Dezai tingkupeu ne pechu peize deseu ra hang pei gai ze acheu sa ze, ‘’Mpeumi mige du ning dage kau gai mak, zai ning napeu gu rezie kangge nang bambe luage ’nchimakbe tâ nang tew gai mak tizai â ai kesiabe hang chianggaibe teiwangbe hedui gekabe gene zêune ze bam du lau.

²⁰Kane nang ning napeu gu rezie kangge bam leusedu, nang tatlietat tizai â, zai ning runne ne ningchu tewhebâ gai ’ndizai â, zai ning napeu makme ne ning dage kau gai ’ndizai â’

²¹(chigum ze ’mpuimi ne chianggaibe gu deseu ra tingkupeu ne die gai ze ’mpuimi je peize acheu salia lau) ‘Tingwang ne ning zatme ruage ningchu ngauka’nriebe benai desetkaibe hang tew gai be lau, ning nie ze tew’ngkeîkelak kai ze, ning pum pumpat ra Tingwang ne tew gai dezai neu;

²²peize aipau dui zene ning pum ge desiâng wang ze, zai ning pum pumpat ze peize ning ’ngkoa sia de lau’ ze acheu zeu. Zai ’mpuimi ne, ‘Amen, Amen,’ acheu sa ra lei.

²³“Dezai ai, chianggaibe ramme ze tingkupeu ne leisikuak ge raw gai ra lei, zai chiramme hedui gekabe ne huitua ne ra lei;

²⁴zai chianggaibe teiwangbe hedui gekabe ze ’mpuimi sak ra pa ne tew gai ra lei, zai hereu-kadesangbe tew gai ra chianggaibe teiwanggaibe hedui ze ’mpuimi lung ge gut kai ra lei.

²⁵Zai ’nningkategeibe gu mâ-himlei peipatbe gu kela ze ’mpuimi ba gene tingkupeu ne lu ra lei, zai mâ-hîmra peipatbe kela ze Tingwang suage kezap kai lu chize herâtewbe-kaira ge teiwang gai ra lei;

²⁶zai kela peipatbe mâ-hîmra bakuî puigit ze tingkupeu ne lu ra lei, chipau gu chibamrabe dam chang ze chize herâtewbe-kaira ge rû gai ra lei, zai chipau chângge chipau dui ze ’mpuimi je sak ra pei ra lei.

²⁷Zai pa ne ’mpuimi je hedui sak ra pei gai lu dezai, chigum pa ne pe runne pechu tewhebâ gai ze, pe napeu peireige timsangmakbe tâ tew gai dizai â chi chianggaibe teiwangbe hedui ze pe lung ge gut kai gu, zai tewhereu-desang gai gu lei, zai pe pum pumpat ku lei, zai pe nie sia gu lei, zai pe zatme ruagene chi ’mpuimi ze saka’nsiapui chang ze bam gu lei.

²⁸Kane chi ’mpuimi ze pe runne pechu tewhebâ makse, ’nchi laleu dizai â pa lungtemichai ze pe pumritpat ze bam gu lei.

²⁹“’Nningkategeibe deu hangge aize hingde kaibe lei, pe nâu ze pe napeu gu rezie kangge bam sedu, kezittat ze, pe runne pechu tewkahebâ mei,

³⁰nune ’nningkategeibe lungtak ’mpeumi dage pat ze pa pe nâu je ’nningtegei gai dezai Tingwang masuage ’mpuimi je pa teiwang ze kai ra lei, dezai tingkupeu ne aipau hingde leine ’mpuimi peireige teitatew gai ra lei.

³¹’Mpeumi â pe mâu ga du de lei, kane ’mpuimi â pe gu hemui-helut ze pung gu de lei,” ze kacheu de lei.