Read Zeme Naga PERIAK 6 Bible Online

PERIAK 6 - Zeme Naga bible

PERIAK 6

¹Zai Tingwang ne Mosabe je rang gai ze,

²“Israelme je salia lau, mige ’mpeumi lêuzai ’mpuimi lêuzai Tingwang hanggene pe runne pechu lupatchâm gai ra tew’nchigailube kau (Nazir kau ramme) gu kadeseube gu gene kadeseube gechukbe tew dezai,

³wain benai hezau peranchibe gene pe runne ’mbia de ra lei; wain gene mei nune hezau peranchibe gene mei ze tewlube ’nchiângne pa sak mak ra lei, grepchî dui ramme sak mak ra zai grepchî ramme ringchimbe mei nune gekîbe mei lêuzaidu pa mâ de teu mak ra lei.

⁴Pe runne bamchâmcheî bambe ting ramme leine ge grepchîria gene ’nchipatbe pechî mei nune pekuarie mei ’nsangdu teu mak ra lei.

⁵“Pa mâ-deseu ze bamchâmcheî bambe ting tâluî ge pe peî ge ’nseîne kai mak ra lei; Tingwang hangge pa bamchâm ze bambe ting kam mak tâne pa ’nchi ze bam ra lei; pa’nzuakpuî ze ’nzuak’ntie ra lei,

⁶Tingwang dage pe runne bamchâmcheî bambe ting leine ge kechaipum taige pa wang’nna mak ra lei.

⁷Pe peu zai pe pui, zai pe sikina chai di lêuzaidu, pe runne pechu tewhebâ gai mak ra lei; Hera dage pechu lupatchâmgaibe ze pe dage bambe ziegeneu.

⁸Pa bamchâmcheî ze bambe ting leine ge Tingwang hangge pa ’nchi ze bam ra lei.

⁹“Zai pe taige mige luakatne lap kai ze chaigaibeibe gene pe peî tew’nchigai’ndibe peî ze pa tewhebâ gai ’ndizai â pechu tewka’nchibe mai ge pa pe peîtam gut ra lei; pasenabe mai ge pa chize guttua ra lei.

¹⁰Hezie padesatbe mai ge temaune kena mei nune depeine kena mei ze tingkupeu dage ka’nduibe-paîki kemui ge pa teiwang gai ra lei,

¹¹dezai kat ze hemui-râtewbe hang, zai kêdabe kat ze â rûkambe-râtewbe hang tingkupeu ne peipat ze pe hangge kelunbe-râtew gai ra lei, kechaipum ziegene pa hemuigai’ndibe changbe ziegeneu. Zai chipau mai gîmsing ge pa ne pe peî ze ’nnam ze tew’nchi gai ra lei,

¹²zai Tingwang hangge pa bamchâmcheî bambe ting hangge pe runne pechu lupatchâm gai ze kemaube-râtewbe hangge kum kat riâ kau meli’nsei teiwang gai ra lei; kane pa bamchâmcheî bambe ze tewhebâ’ndibe ziegene pe gu besua’ngka gu ting ze â ’ntakûgaidibe hang chang du lei.

¹³“Zai aize Nazir changbe kau, pe runne châmcheîbambe ting ze kamgairabe lua hangge hingde kaibe de lei: ka’nduibe-paîki kemui ge pechu teiwang gai ra lei,

¹⁴zai pa ne pe gu kela kemei’nsei kum kat poine mâ de heziâkgabe ze rûkambe-râtewbe hang, melipui kat kum kat riâ kau mâ de heziâkgabe ze hemui-râtewbe hang, zai meli’nsei kat mâ de heziâkgabe ze desieyibe-râtew ra hang,

¹⁵zai ’nduihîkaimakbe tingku ’ntui kat, zai ’nduihîkaimakbe tingkuliâp ramme taudui ne zuâlube, zai penui gu mâ-himlei-râtewbe benai penui gu kesakbe-râtewbe ramme ze Tingwang dage peipat kai ra lei.

¹⁶Zai chiramme tingkupeu ne Tingwang dage pei gai ze pe gu hemui-râtewbe benai pe gu rûkambe-râtewbe peipat kai ze,

¹⁷desieyibe-râtewbe gu herâtewbe hangge meli’nsei pa ne peigaibe ge ’nduihîkaimakbe tingku ’ntui kat Tingwang dage peipat’mpam gai ra lei; chipau gu mâ-himlei-râtewbe benai kesakbe-râtewbe ze du tingkupeu ne peipat kai ra lei.

¹⁸Zai Nazir changpeu ze ka’nduibe-paîki kemui gene pe peî ze tew’nchilube peîtam ze guttua ra lei, zai hetam ze pe peî tew’nchilube peî gene lu lu ze desieyibe-râtewbe gu herâtewbe kangge bambe hemi peireige chize tuâ gai ra lei.

¹⁹Pechu tew’nchigaibe peîtam guttualube châng dezai ’ntui gene ’nduihîkaimakbe tingku, zai ’nduihîkaimakbe tingkuliâp zai meli’nsei ba’ngkoâk suamei lu dezai chize tingkupeu ne tei lu chiramme ze Nazir changpeu ba kena ge kai ra lei,

²⁰zai kakezapbe-râtewbe hangge Tingwang masuage tingkupeu ne chiramme kezap kai ra lei; kezapkai’ndibe pegara benai herâtew ze peipat’ndibe pa’ngkoa pelane ze tingkupeu hangge ka’nchibe dam hang chang ra de lei; zai chipau châng dezai â Nazir changpeu ze wain sak dui de lei.

²¹“Pa ne mâ-mâ kêdadabe peipatduibe sâu ze, pa Nazir changbe gene pe gu kadeseube luigumbe gene Tingwang dage pe gu mâ-peipat ra de lei; Nazir gu hingde kaibe luigum ze pa ne deseu ze hatkailube ze pa tewpui gai sing ra lei,” ze kacheu de lei.

²²Tingwang ne Mosabe je rang gai ze,

²³“Aaronbe benai pe name ramme je salia lau, Aigum ze Israelme je ningnui ’nnam gai ra lei: penui je ningnui acheu sa ra lei,

²⁴Tingwang ne ningnui je ’nnam gai be lau, zai rehei gai be lau:

²⁵Tingwang ne ningnui peireige peize pe ju lerba gai be lau, zai ningnui je ’nggia gai be lau:

²⁶Tingwang ne pe ma ze ningnui peireige peize ’ngngangchu gai be lau, zai lunghegeikatenaibe ningnui je pei gai be lau.

²⁷“Chigum ze Aaronbe benai pe name ne a ji Israelme peireige kai gu lei, zai I ne penui je ’nnam gai gu lei,” ze kacheu de lei.