Read Zeme Naga PERIAK 8 Bible Online

PERIAK 8 - Zeme Naga bible

PERIAK 8

¹Chunage Tingwang ne Mosabe je,

²“Nang hemibung ramme dung gai dezai, hemibung-kaira suage hemibung sena zene tauba bam gu lei be ze Aaronbe je salia lau,” ze kacheu lei.

³Zai Aaronbe ne chigum ze tew gai de lei; hemibung-kaira suage hemibung ramme tauba bam ra hemibung ramme pa dung gai de lei, Tingwang ne Mosabe dage samdiegaibe luigum zeu.

⁴Zai aize hemibung-kaira chiambepeu ne gechâk ne heki ze tewgaibe tâ de lei; bepîbei gene chu ze bepeirei ge mâpâ ramme kaibe riâ chang ze gechâk ne heki ze tew de lei; Tingwang ne Mosabe je tewrabe luîtak hang teiliagaibe luîrun ze pa ne hemibung kaira ze chiam gai de lei.

⁵Zai Tingwang ne Mosabe je,

⁶“Lebime je Israelme ruagene ngua lu ze penui je tew’nchi gai lau.

⁷Zai chigum ze penui je nang ne tew’nchi ra nang penui je tewgairabe ze: kemaube gene tewka’nchibe gu hedui penui peireige kezin gai ra lei, zai penui pum gêu leine gut lu ze penui je tat ra pei ra, zai penui paî ramme geta’nchi ze penui runne ne penui je tew’nchi ra lei.

⁸Dezai getumseipoine benai mâ-hîmra kela peipatbe gu dekuî yibe taudui ne zuklube penui je peize tei ra lei, zai mâkedabe getumseipoine hemui-râtewbe hang nang ne tei ra lei.

⁹Zai ka’nduibe-paîki suage Lebime je nang ne nguapat kai ra lei, zai Israelme baudime je kûwang’ndui gai ra lei.

¹⁰Lebime je Tingwang masuage nang pei gai dezai Lebime peireige Israelme ne penui ba die gai ra lei,

¹¹zai kakezapbe-râtewbe gum ze Israelme ruagene Aaronbe ne Lebime je Tingwang suage peipat kai ra lei, chidezai Tingwang gu tâtewchibe ze penui gu chang ze bamkuâ ra hangge zeu.

¹²Dezai Lebime ne getumsei ramme peî ge penui ba die gai ra lei; zai hemui-râtewbe hangge kat nang ne peipat kai ra zai kêdabe ze rûkambe-râtewbe hang Tingwang dage pei gai ra lei, Lebime hangge kelunbe-râtew gai ra hangge zeu.

¹³Zai Lebime je Aaronbe benai pe name ramme dage bam ra nang tew gai ra lei, zai kakezapbe-râtewbe gum ze penui je Tingwang dage peipat kai ra lei.

¹⁴“Chigum ze Lebime je Israelme ruagene nang lupatchâm gai ra lei, zai Lebime ze a gume chang ra lei.

¹⁵Zai nang ne penui je tew’nchi gai lu ze kakezapbe-râtewbe gum ze penui je nang peipat kai lu dezai, ka’nduibe-paîki ge tâ’nggua ra Lebime tatgut ra lei.

¹⁶Israelme ruagene penui je â a dage peipat’nchigai’ndibe kau daseu; Israelme dage nebâm letpat kai ze, lungkeuraîlangbe leine kelei ge, penui je a gume hangge I ne lu gai de lei.

¹⁷Israelme ruage meraibe lungkeube leine ze a gu lei, ziemmena benai hekaune zeu; chipau ting ge Ijipram ge meraibe lungkeube leine je I ne tewchatkaibe mai ge a hangge penui je I ne tew’nchi gai de lei,

¹⁸zai Israelme ruagene meraibe lungkeube leine kelei ge Lebime je I ne lu de lei.

¹⁹Zai kela gum ze Aaronbe benai pe name dage Israelme ruagene Lebime je I ne pei gai bei de lei, ka’nduibe-paîki ge Israelme guâ ’nggua ra zai kakellumbe bâm taige Israelme wanghechut ra chang lêuzai Israelme ruagene tewkahereube bam mak ra Israelme hang kelunbe-râtew ra hangge zeu,” ze kacheu de lei.

²⁰Mosabe benai Aaronbe zai Israelme baudime leine ne Lebime dage chigum ze tew de lei; Lebime deu ge Tingwang ne Mosabe dage samdiegaibe luigum ze, Israelme ne penui hangge tew gai de lei.

²¹Dadege Lebime penui runne penui je hemui gene tew’nchi ze penui paî ramme kageta de lei; zai kakezapbe-râtewbe gum ze Aaronbe ne Tingwang masuage penui je peipat kai de lei, zai penui je tew’nchi ra penui hangge Aaronbe ne kelunbe-râtew gai de lei.

²²Zai chipau chângge ka’nduibe-paîki lungge penui tâ-ngeu ge zuagut te lei, Aaronbe benai pe name pie bambe geneu. Lebime deu ge Tingwang ne Mosabe dage samdiegaibe luigum ze Aaronbe benai pe name ne penui dage tew gai de lei.

²³Zai Tingwang ne Mosabe je,

²⁴“Aize Lebime hangge kaibe lei: ka’nduibe-paîki lungge tâ’nggua ra kum ’ngkai ze mengeu gene pa’nrei kau ramme ne zuagut ra lei;

²⁵zai penui tingkum rengeu changdibe gene tâka’ngguabe gene penui sau ra lei, zai tâ’nggua ta ra lei,

²⁶kane ka’nduibe-paîki lungge penui puiname je ’nggua gai ze, reî ze, penui â tâ’nggua ta ra lei. Chigum Lebime je penui tâ-ngeu ramme nang timzi gai ra lei,” ze kacheu de lei.