Read Zeme Naga PERIAK 9 Bible Online

PERIAK 9 - Zeme Naga bible

PERIAK 9

¹Ijipram gene penui zuapattibe châng patingkum pakenabe zai hekêu raîlangbe ge, Sinai hênamchangbe heram gene Tingwang ne Mosabe je ’mpau ze acheu sa ze,

²“Diegaibe hî sing ge Israelme je peize kapatbe hengi reibam lau,

³Aipau kêu hezie kereu ze medai mai ge, hegî ge diegaibe hî sing ge ningnui aize reibam ra lei; rawdiakkaibe-hingde ramme leine benai hingdetewgaibe ramme leine luigum ze ningnui reibam ra lei,” ze kacheu de lei.

⁴Chigum ze Mosabe ne Israelme je kapatbe-ngi penui reibam ra lei be ze ranglia gai de lei.

⁵Zai hekêu raîlangbe hezie kereu ze medai mai hegî ge, Sinai hênamchangbe bâm gene penui gu kapatbe-ngi reibam de lei; Tingwang ne Mosabe dage samdiegaibe leine luigum ze Israelme ne tew gai de lei.

⁶Zai chige ziemmena hangsename â kechaipum deîtaugaibe gene ’nchimakme bam de lei, chipau mai ge penui â kapatbe-ngi reibamchi lak tai de lei; zai chipau mai ge Mosabe benai Aaronbe masuage penui wang gai de lei;

⁷dadege chime bau ne penai je, “Ziemmena kechaipum deîtaugaibe gene anui â hebâ gai di de lei; ’ndaitew ze Israel ruage diegaibe hî sing ge Tingwang hang herâtewbe ge kela peipatbe gene anui je lupatchâm gai bei lau?” ze kacheu de lei.

⁸Zai Mosabe ne penui je, “Kuâ gai rî lau, ningnui deu ge Tingwang ne ’ndaikau samdie gai mei be I ’ngking gai gu rei lei,” ze kacheu lei.

⁹Tingwang ne Mosabe je,

¹⁰“Israelme suage salia lau, ningnui benai ningnui chaname mi-mige kechaipum deîtaugaibe ziegene ’nchi mak bam mei, nune tebeîtew’ndeu di mei zainedu, Tingwang dage kapatbe-ngi ze pa reibam ra lei.

¹¹Hekêu pakenabe gu hezie kereu ze medai mai hegî ge penui reibam ra lei; hereubuâ gekabe ramme benai ’nduihî kaimakbe tingku penui teu ra lei.

¹²Hechua riâ hangge penui gu hetak ’nsak kai mak ra zai chi hemeira du tewpâng mak ra lei; kapatbe-ngi hang hingde riagaibe leine luigum ze penui reibam ra lei.

¹³Kane ziemmena ’nchi ze bamme tebeîtew mak, acheusede kapatbe-ngi hang reibammakbe kau je â pe kiangname ruagene pechu lutua ne ra lei, diegaibe hî sing ge Tingwang hangge herâtewbe kela pa ne peipatmakbe ziegeneu; chipaupeu ze pe gu hemui pa ne pung ra lei.

¹⁴Zai hesangheluîchâmbe kau ningnui ruage rêu ze kapatbe-ngi gu hingde rawdiakkaibe luigum zai chipau gu hingdetewgaibe luigum ze Tingwang dage kapatbe-ngi nguareibam nei zai â chigum pa tew ra lei; heramna’mpeu hang benai rêugaipeu hangge rawdiakkaibe-hingde kat ne ningnui tei ra lei,” ze kacheu de lei.

¹⁵Kakellumbe paîki tew’nsapchugaibe mai ge, kakellumbe-paîki ge kemâu ne chûm ’ndi de lei, hingdebung bambe paîki ge zeu; zai hegî gene tingbapat mak tâne kakellumbe-paîki peireige hemi taube luigum ze bam lei.

¹⁶Zai chigumbe ne peluî bam bam lei; tingmuî ge hemi taube gum ze bam zai tîngna ge kemâu ne chûmgit ze bam lei.

¹⁷Zai paîki peirei gene kemâu ze tat’mbia di tânege Israelme chize suitat-tat lei; zai kemâu saugaidibe bâm chige Israelme sieki tew lei.

¹⁸Tingwang gu samde gene Israelme zuapat lei, zai Tingwang gu samde gene penui sieki tewka’nsap lei; kakellumbe-paîki peireige kemâu bam tâne sieki lungge penui bam lei.

¹⁹Kakellumbe paîki peireige kemua ne hezie misongga ze hiam bam di leusede, Israelme ne Tingwang gu samde tei bam lei, zai hela zuapat mak lei.

²⁰Ting-dege â kakellumbe-paîki peireige kemua ze hezie gechâmne runne hiam ze bam lei, zai Tingwang ne samdiegaibe luigum ze sieki lungge penui bam bam lei; zai Tingwang ne samdiegaibe luigum ze penui zuapat lei.

²¹Zai ting-dege â kemâu ze hegî gene tingbapatbe riâ hiam ze bam lei; zai tingbapat ze kemâu hiamchu’ngngu gai di dege â penui zuapat lei, zai kemuî-keba peluî bam ze kemua hiamchu’ngngu di dege â penui hela zuapat lei.

²²Hezie kena riâ mei, nune bekêu riâ mei, betinggetie kakellumbe-paîki peireige kemua hiam ze bam bam dizai â Israelme ze sieki lungge bam di di lei, zai hela zuapat mak lei; kane chize tei’mbia gai ’ndi dege â penui hela zuapat lei.

²³Tingwang gu samdiegaibe gene penui sieki tew lei, zai Tingwang gu samdiegaibe gene penui hela zuapat lei; penui Tingwang gu samde tei ze bam lei, Mosabe dage Tingwang gu samdiegaibe geneu.